මිල්කෝ කර්මාන්ත ශාලාවේ මහා පරිමාණ ඩීසල් වංචාවක්… සේවකයින් අනිවාර්ය නිවාඩු යවයි

මිල්කෝ සමාගමට අයත් අඹේවෙල කර්මාන්ත ශාලාවේ මහා පරිමාණ ඩීසල් වංචාවක් සම්බන්ධයෙන් එහි සභාපති රේණුක පෙරේරා මහතා අද (14) පෙරවරුවේ කෘෂිකර්ම, වනජීවි හා වනසම්පත් සංරක්ෂණ අමාත්‍ය මහින්ද අමරවීර මහතා දැනුම්වත් කර තිබේ.

2021 සිට මෙම ආයතනය තුළ මෙම ඉන්ධන වංචාව සිදුවී ඇති බවට තොරතුරු ලැබී ඇතැයි කී සභාපතිවරයා ඩීසල් ලීටර් 45,000කට අධික ප්‍රමාණයක් පුද්ගලික ඉන්ධනහල්වලට විකුණා ඇති බවට තොරතුරු ලැබී ඇති බව ද අවධාරණය කළ බවයි කෘෂිකර්ම, වනජීවි හා වනසම්පත් සංරක්ෂණ අමාත්‍යංශය නිවේදනය කළේ.

මේ සම්බන්ධව පුළුල් විමර්ශනයක් මේ වනවිට ආරම්භ කර ඇතත්, මෙම වංචාවට සම්බන්ධව බවට දැනට චෝදනා එල්ල වී ඇති සියලු සේවකයින් විමර්ශන අවසන් වන තෙක් අනිවාර්ය නිවාඩු යැවීමට පියවර ගන්නා බවද රේණුක පෙරේරා මහතා කෘෂිකර්ම අමාත්‍යවරයාට දැනුම් දුන් බව සඳහන්.

මෙම ඉන්ධන වංචාව මෙම වර්ෂය තුළ දීත් සිදු වී ඇත්ද යන්න සම්බන්ධව පුළුල් විමර්ශනයකින් සොයා බලන්නැයී අමාත්‍යවරයා සභාපතිවරයාට උපදෙස් දී තිබේ.