ප්‍රාදේශීය සභා දෙකක සභාපතිවරුන්ගේ සේවය අත්හිටුවයි

වැලිකන්ද සහ රඹෑව ප්‍රාදේශීය සභාවල සභාපතිවරුන් දෙදෙනාගේ සේවය තාවකාලිකව අත්හිටුවා තිබේ.

ඒ, උතුරු මැද පළාත් ආණ්ඩුකාර මහීපාල හේරත් මහතා නිකුත් කළ අතිවිශේෂ ගැසට් පත්‍රයකිනි.

ඔවුන් දෙදෙනාට එරෙහිව එල්ල වී ඇති චෝදනා විමර්ශනය කරන තෙක් එලෙස සේවය තාවකාලිකව අත්හිටුවන බව ගැසට් නිවේදනයේ සඳහන් වේ.

ඒ අනුව වැලිකන්ද ප්‍රාදේශීය සභාවේ සභාපති කවිදු අබේසූරිය සහ රඹෑව ප්‍රාදේශීය සභාවේ සභාපති අජිත් ප්‍රසන්න තෙන්නකෝන් යන මහත්වරුන්ට එරෙහිව චෝදනා විමර්ශනය කිරීම සඳහා විශ්‍රාමලත් මහාධිකරණ විනිසුරු සමන් වික්‍රමආරච්චි මහතා පත් කර ඇති බව ද එම ගැසට් නිවේදනයේ සඳහන් ය.

වැලිකන්ද ප්‍රාදේශීය සභාවේ සභාපතිවරයාගේ කාර්යයන් ඉටු කිරීමේ බලතල පොළොන්නරුව පළාත් පාලන සහකාර කොමසාරිස්වරයාට පවරා ඇති අතර රඹෑව ප්‍රාදේශීය සභාවේ සභාපතිවරයාගේ බලතල පවරා ඇත්තේ එහි උපසභාපතිවරයාටයි.