ජනපති කැඳ වූ සර්ව පාක්ෂික හමුව අද

ජාතික සංහිඳියාව පිළිබඳව සාකච්ඡා කිරීමට ජනාධිපති රනිල් වික්‍රමසිංහ මහතා කැඳ වූ සර්ව පාක්ෂික හමුව අද (26)දින පස්වරු 5.00ට ජනාධිපති ලේකම් කාර්යාලයේදී පැවැත්වේ.

ප්‍රධාන විපක්ෂය වන සමගි ජන බලවේගය ද සර්ව පාක්ෂික හමුවට සහභාගි වීමට තීරණය කර තිබේ.

කෙසේ වෙතත් විපක්ෂ නායක සජිත් ප්‍රේමදාස මහතා අවධාරණය කළේ, ජනතාව වෙනුවෙන් සාකච්ඡාවට සහභාගී වුවද දේශපාලන උප්පරවැට්ටිවලට හසුවීමට සූදානම් නොමැති බවයි.

දෙමළ ජාතික සන්ධානයේ නායක ආර්. සම්බන්ධන් මහතා සර්ව පාක්ෂික හමුවට සහභාගීවන බව ප්‍රකාශ කර ඇත.

එහෙත් දෙමළ ජාතික ජනතා පෙරමුණේ නායක ගජේන්ද්‍ර කුමාර් පොන්නම්බලම් මහතා තමන් එම හමුවට සහභාගී නොවන බව පවසයි.

ජාතික ජනබලවේගය ද සර්ව පාක්ෂික සමුළුවට සහභාගි නොවීමට තීරණය කර ඇත.

ඒ පිළිබඳ ප්‍රතිචාර දක්වමින් ජාතික ජනබලවේගය පවසන්නේ, ජනාධිපතිවරයා මෙතෙක් ජාතික ප්‍රශ්නය විසඳීමට ලබා දුන් පොරොන්දු ඉටු කර නොමැති බවයි.

The post ජනපති කැඳ වූ සර්ව පාක්ෂික හමුව අද appeared first on Colombo Today.