පසුගියදා පැවති TV දෙරණ Music Video සම්මාන උළෙලේදී, “ජනප්‍රියම මියුසික් වීඩියෝව” සහ “2021 වසරේ වැඩිම දෙනෙකු නැරඹූ මියුසික් වීඩියෝව” යන සම්මාන දෙකින්ම පිදුම් ලබන්නට, දකුණු ආසියානු ජනප්‍රිය සංගීත තාරකාව – යොහානි සමත් විය. ඇගේ කුළුදුල් ගීත ඇල්බමය වූ “කෙල්ල” මීට සති කිහිපයකට පෙර ප්‍රධාන පෙළේ ඩිජිටල් නාලිකා කිහිපයක් ඔස්සේම නිකුත් වී තිබීම ද මෙම ජයග්‍රහණයේ සුවිශේෂී බව වැඩි කරන්නට හේතු විය.
සම්මාන උළෙල වෙනුවෙන් යොහානි සහ ඇගේ කණ්ඩායම නැවත ශ්‍රී ලංකාවට පැමිණියේ දීර්ඝ විදෙස් සංචාරයකින් අනතුරුවයි. ලොස් ඇන්ජලීස්වල පැවති සංදර්ශනයකට සහ Tag Heuer සුඛෝපභෝගී ඔරලෝසු සන්නාමය නියෝජනය කරමින් අබු ඩාබිවල පැවති Formula 1 Grand Prix තරඟාවලියට ද ඇය සහභාගී වී තිබුණි.
සම්මාන උළෙලෙන් පසු මාධ්‍යයට අදහස් දක්වමින් යොහානි “මේ සම්මාන උළෙලේ වැදගත්ම සම්මාන දෙකකින් පිදුම් ලැබීම මට ගෞරවයක්. මාසයක් විතර රටින් බැහැරව ඉදලා නැවත ලංකාවට පැමිණි මොහොතක මේ ලැබුණු ඇගයීම ගැන වගේම අපේ රටේ සංගීත ක්ෂේත්‍රය වෙනුවෙන් කැපවීමෙන් වැඩ කරන මේ සියලු සහෝදර ශිල්පීන් හමු වීමට ලැබීමත් මට ලොකු සතුටක්. මගේ නිර්මාණ කටයුතු වෙනුවෙන් වෙහෙස නොබලා කැප වෙමින් හැම මොහොතකම මට ශක්තියක් වුණු දිලංජන් ඇතුළු කණ්ඩායමටත් මම විශේෂයෙන් ස්තූතිවන්ත වෙනවා.” යනුවෙන් සඳහන් කළාය.
සම්මාන උළෙල වර්ණවත් කරමින්, යොහානි ඇගේ පෙරළිකාර ගීතය වූ “මැණිකේ” සහ කුළුදුල් ඇල්බමයේ “කෙල්ල” යන ගීත ගායනා කරන ලද අතර ඇගේ “කෙල්ල” ගීතය සඳහා කළ ඉදිරිපත් කිරීමට ප්‍රේක්ෂකාගාරයේ උණුසුම් ප්‍රතිචාර හිමි විය. මෙම ගීත ඇල්බමය ජනප්‍රිය රැල්ලේ ගීත 14කින් සමන්විත අතර මෙම ගීත සඳහා තෝරාගන්නා ලද තේමාවන් සැබෑම ස්ත්‍රී ජීවන අත්දැකීම් ඇසුරින් නිර්මාණය කර තිබීම ද විශේෂත්වයකි.
“Derana Music Video Awards කියන්නෙ මගේ හදවතට ඉතාමත් සමීප දෙයක්. වසර 8කට පසු මේ සම්මාන උළෙල නැවත සංවිධාන කිරීමේ අරමුණ වුණේ, ලංකාවේ සංගීත ශිල්පීන් සහ වීඩියෝ නිර්මාණකරුවන් එකට මුණගස්වමින් ඔවුන් ඇගයීමට ලක් කිරීමයි. යොහානි ඇගේ කුළුදුල් නිර්මාණය වූ “කෙල්ල” ගීතය ගායනා කිරීම දැකීම වගේම “වසරේ ජනප්‍රියම වීඩියෝව” රන් සම්මානයෙන් පිදුම් ලැබීමත් සතුට දනවන කාරණාවක්. යොහානි ඉදිරියේදී අපේ රටේ සංගීත ක්ෂේත්‍රය වෙනුවෙන් කරන්නට බලාපොරොත්තු වෙන දැවැන්ත වැඩ ගැනත් අපි ඉතා නොඉවසිල්ලෙන් බලන් ඉන්නවා.” යනුවෙන් TV දෙරණ වැඩසටහන් අධ්‍යක්ෂිකා, ෂර්මිලා ධර්මරාසා පැවසීය.
මෙම සම්මාන රාත්‍රියේදී “2021 වසරේ වැඩිම නැරඹුම් සහිත වීඩියෝව” සඳහා යොහානිගේ “මැණිකේ” ගීතය පළමු සම්මානය දිනාගත් අතර එය මේ වන විට නැරඹුම් වාර මිලියන 245 ඉක්ම වූ වීඩියෝවකි. 2022 වසරේ එම අංශයෙන්ම සම්මානය දිනාගත් ගීතයට වඩා නැරඹුම් වාර මිලියන 200කටත් වඩා ඉදිරියෙන් සිටීම “මැණිකේ” ලැබූ අසමසම ජනප්‍රියත්වයට හොඳම නිදසුනකි. යොහානිගේ මෙම ජයග්‍රහණයට ඇය පසුගිය කාලයේ සංගීත ක්ෂේත්‍රය තුළ ලැබූ දැවැන්ත ජනප්‍රියත්වය හේතුවක් වූ බව සිතිය හැකි අතර පසුගිය වසරේ ලොව පුරා ප්‍රේක්ෂකයන් විනාඩි බිලියන 11ක් ඇගේ ගීත නරඹා තිබුණි. ඇගේ ගීත 37ක ඩිස්කොග්‍රැෆි සඳහා යූටියුබ් මුළු නැරඹුම් වාර ගණන බිලියන 18 ඉක්මවයි.
යොහානිගේ කණ්ඩායමේ කළමනාකරු සහ විධායක නිෂ්පාදක දිලංජන් සෙනවිරත්න මෙම ජයග්‍රහණය පිළිබඳ මෙසේ අදහස් පළ කළේය, “යොහානිගේ “කෙල්ල” ගීතය අපේ රටේදී මේ විදියට ඉදිරිපත් කිරීමට ලැබීම අපට ලැබුණු ඉතාමත් සුවිශේෂී අවස්ථාවක්. ඉදිරියේදී ලංකාවේ පැවැත්වීමට නියමිත ප්‍රසංගය සඳහා සූදානම් කෙරුණු මේ ඉදිරිපත් කිරීම සඳහා අද දවසේ මේ තරු පිරුණු වේදිකාවේ ඉඩක් ලබා දීම ගැන අපි සංවිධායකයන්ට බෙහෙවින්ම ස්තුතිවන්ත වෙනවා. මෙය ආරම්භයක් පමණයි. 2024 ඉතාමත් සුවිශේෂී වසරක් වන බව මට විශ්වාසයි. අනාගතයේදී ශ්‍රී ලංකාව ජාත්‍යන්තර සංගීත ක්ෂේත්‍රයේ දක්ෂයන්ගේ තෝතැන්නක් බවට පත් වනු දැකීම අපගේ බලාපොරොත්තුවයි.”
යොහානි සිය ව්‍යාපාර කළමනාකාර ඩිලන්ජන් සෙනෙවිරත්න සමඟ
TV දෙරණ උප සභාපති ලක්සිරි වික්‍රමගේ මහතා විසින් යොහානි වෙත ඉහළම සම්මානය පිරිනැමූ අයුරු
යොහානි “2021 වඩාත්ම ජනප්‍රිය සංගීත වීඩියෝව” සඳහා වන සම්මානය ලබා ගත් අවස්ථාව
යොහානි ඇගේ පළමු ඇල්බමය වන “කෙල්ල” හි ප්‍රධාන ගීතය ඉදිරිපත් කරමින්
The post TV දෙරණ Music Video සම්මාන උළෙලේ විශිෂ්ටම සම්මානය යොහානිට appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka