එක්සත් ජාතීන්ගේ ආහාර සහ කෘෂිකර්ම සංවිධානය (FAO) විසින් UN-CERF වෙතින් ප්‍රසම්පාදනය කරන ලද යූරියා පොහොර මෙටි්‍රක් ටොන් 780.1ක් කෘෂිකර්ම අමාත්‍යාංශය වෙත අද (15) දිනයේ දී භාර දෙන ලදී.
ඒ අනුව, යාපනය, මුලතිව්, කිලිනොච්චි සහ බදුල්ල යන වැඩි-දරිද්‍රතාවක් සහිත දිස්ත්‍රික්ක හතරක වෙසෙන සහ, අක්කර භාගයක හෝ ඊට අඩු ඉඩම් ප්‍රමාණයක වී වගාවේ යෙදෙන ගොවීන් 15, 619ක් වෙත යූරියා පොහොර කිලෝග්‍රෑම් 50 බැගින් ලබා දෙනු ඇත. කෘෂිකර්ම අමාත්‍යාංශයේ සහ ගොවිජන සංවර්ධන දෙපාර්තමේන්තුවේ පූර්ණ සහයෝගය ඇතිව, එකී යූරියා පොහොර නොමිලේ බෙදා දීම මෙම සතියේ ආරම්භ කෙරෙනු ඇත.
මෑතක දී ඇති වූ ආර්ථික කම්පනයෙහි හා පොහොර හිඟයෙහි බලපෑමෙන් ප්‍රකෘතිමත් වීම සඳහා, දිස්ත්‍රික්ක වලින් හඳුනා ගැනුණු වඩාත් අනතුරාසන්න ගොවීන්ට සහය ලබාදීමට මෙම කර්තව්‍යය හරහා FAO අදහස් කරයි.
යූරියා පොහොර භාර දීමේ අවස්ථාවට සහභාගි වූ ගරු කෘෂිකර්ම අමාත්‍ය, මහින්ද අමරවීර මහතා ශ්‍රී ලංකාවේ කෘෂි නිෂ්පාදනය ඉහළ නැංවීම පිණිස කෘෂිකර්ම අමාත්‍යාංශය ඇප-කැප වී සිටින අයුරු විස්තර කරමින් වැඩිදුරටත් කියා සිටියේ, “වී ගොවීන් වෙත අවශ්‍ය කෘෂිකාර්මික ද්‍රව්‍ය ලැබේ නම්, රටෙහි ආහාර සුරක්ෂිතතාව ප්‍රකෘතිමත් කළ හැකියි. රජය සමග සමීපව කටයුතු කරමින් අත්‍යවශ්‍ය පොහොර සහ අනෙකුත් කෘෂිකාර්මික ද්‍රව්‍ය වඩාත් අනතුරාසන්න ගොවීන් වෙත ලැබෙන බවට සහතික වීම සම්බන්ධයෙන් FAO වෙත මාගේ අවංක ස්තුතිය පුද කරමි” යනුවෙනි.
FAO සමග සමීප සහයෝගීතාව සහිතව කටයුතු කිරීම ගැන ශ්‍රී ලංකාව සහ මාලදිවයින FAO නියෝජිත, විම්ලේන්ද්‍ර ෂරන් මහතා, රජයට ස්තුති කරමින්, “ FAO වශයෙන් අපත්, අපගේ හවුල්කරුවනුත් එක්ව කටයුතු කරමින් සෑම අදියරක දී ම පක්ෂව හඬ නගනුයේ අනතුරාසන්න ගොවීන් සහ ධීවර කාර්මිකයන්ට සිය පවුල් වල කුසගිනි නිවීම පිණිස ජීවනෝපායයන් අත්හැර දැමීමට සිදු නොවන බව සහතික කිරීමටයි. අද දින මේ යූරියා පොහොර ලබා දෙන්නේ රටෙහි ඉතාමත්ම දිළිඳු සහ වඩාත්ම අනතුරාසන්න ගොවි ජනතාවක් වෙසෙන දිස්ත්‍රික්ක වෙතටයි. ඒ හරහා, එකී ගොවි ජනතාවගේ ආහාර සුරක්ෂිතතාව සවිමත් කිරීමටත් රට වෙනුවෙන් කෘෂි නිෂ්පාදනය වැඩිදියුණු කිරීමටත් අපට හැකි වනු ඇත” යැයි වැඩිදුරටත් කියා සිටියේ ය.
ආර්ථික අර්බුදයේ අවදානම් සහගත බලපෑම් සම්බන්ධයෙන් ශ්‍රී ලංකාවේ මහජනතාව වෙත බහු-ආංශික සහය ලබාදීමට එක්සත් ජාතීන්ගේ සංගමය විසින් මෙම වසරේ ජුනි මාසයේ සිටම කටයුතු කර ඇත. මෑතක දී සංශෝධනය කළ මානුෂීය අවශ්‍යතා සහ ප්‍රමුඛතා සැලසුම මගින් අවශ්‍යතා සහිත මිලියන 3.4ක මහජනතාව ඉලක්ක කිරීමත් එහි ම කොටසක් විය. “දේශීය ආහාර නිෂ්පාදනය සහ බෙදා හැරීමේ ක්‍රියාවලීන් පුළුල් කරමින් ඊට සහය ලබාදීම වෙත අපගේ විශේෂ අවධානය යොමු කරමින් සිටිමු. අද දිනයේ දී කෘෂිකර්ම අමාත්‍යාංශය වෙත ලබා දුන් යූරියා පොහොර මගින් රටේ පවතින අනතුරාසන්න ජීවනෝපායයන් පණ ගැන්වෙනු ඇති අතර, ඒ හරහා ශ්‍රී ලංකාවේ ජීවිතාරක්ෂාව තහවුරු කෙරෙනු ඇත” යනුවෙන් සිය අදහස් දැක්වූයේ, එක්සත් ජාතීන්ගේ නේවාසික සම්බන්ධීකාරක, හනා සිංගර්-හැම්ඩි මෙනෙවිය විසිනි.
The post FAO වෙතින් යූරියා පොහොර මෙට්‍රික් ටොන් 780.1ක් කෘෂිකර්ම අමාත්‍යාංශයට appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka