කරන්දෙණිය පී.එච්.අයි ඝාතන සැකකරුවකු රට පනිද්දී අත්අඩංගුවට !

ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ භාණ්ඩාගාරික රොෂාන් කුමාර මහතා ඝාතනය කිරීම ඇතුළු තවත් මිනීමැරුම් ගණනාවක් සදහා අවශ්‍යව සිටි ඇල්පිටිය ප්‍රදේශයේ පදිංචි පුද්ගලයකු ඩුබායි බලා පළා යාමට කටුනායක ගුවන් තොටුපොළ වෙත පැමිණ සිටියදී , ස්වයංක්‍රීය මුහුණු හදුනා ගැනීමේ පද්ධතිය  මගින් හඳුනා ගැනීමෙන් පසුව අපරාධ පරීක්ෂණ දෙපාර්තමේන්තු නිලධාරීන් විසින් ඊයේ (06) රාත්‍රී අත් අඩංගුවට ගෙන ඇත.
මෙම සැකකරු කූඨ ලෙස සකස් කර ගත් ව්‍යාජ ගමන් බලපත්‍රයක් උපයෝගී කරගෙන රටින් පළා යාමට උත්සාහ දරා ඇති බව වාර්තා වේ.

මොහු මහජන සෞඛ්‍ය පරීක්ෂකවරයාට  වෙඩි තැබීම සඳහා ඔත්තු බැලූ බවට පොලිසිය විසින් කරුණු අනාවරණය කර ගෙන ඇති අතර ඔහුගෙන් අදාළ ඝාතනය සම්බන්ද වැඩිදුර තොරතුරු අනාවරණය කර ගත හැකිවනු ඇති බවව පොලිසිය සඳහන් කරයි.

ඇල්පිටිය, කරන්දෙණිය ප්‍රදේශයේ පදිංචි 30 හැවිරිදි පත්තිනි දේවගේ තිවංක මනෝහර නැමැති පුද්ගලයකු මෙසේ අත්අඩංගුවට ගෙන ඇති අතර ඔහු කලක් ශ්‍රී ලංකා යුධ හමුදාවේ කොමාන්ඩෝ රෙජිමේන්තුවේ සේවය කොට හැර ගිය පුද්ගලයෙකි.

මදුරදූවගේ දිල්ෂාන් මධුසංඛ ද සිල්වා යන ව්‍යාජ නමකින් කූඨ ලෙස සකස් කළ ගමන් බලපත්‍රයක් ඔහු විසින් සකස් කරගනු ලැබ ඇති අතර ඔහු ඊයේ (06) දින රාත්‍රී 07.15 ට එමිරේට්ස් ගුවන් සේවයේ ඊ.කේ.- 653 දරන ගුවන් යානයෙන් ඩුබායි බලා පලා යාම සඳහා කටුනායක ගුවන් තොටුපොළ වෙත පැමිණ සිටියදී මෙසේ ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් විසින් අත්අඩංගුවට ගෙන තිබේ.

The post කරන්දෙණිය පී.එච්.අයි ඝාතන සැකකරුවකු රට පනිද්දී අත්අඩංගුවට ! appeared first on ColomboXnews.