කෙසේ වුව ද, සේවක අර්ථසාධක අරමුදල සහ සේවා නියුක්තයන්ගේ භාර අරමුදල වැනි සමාජ ආරක්ෂණ ක්‍රමවේද මඟින් ආවරණය වන්නේ ශ්‍රමිකයින් මිලියන 2.5ක් පමණ වූ අඩු ප්‍රමාණයකි.
ඊට අමතරව, අවිධිමත් රැකියා අංශය සඳහා විවිධ රාජ්‍ය ආයතන මඟින් ගොවි රක්ෂණය, ධීවර රක්ෂණය වැනි විවිධ සමාජ ආරක්ෂණ ක්‍රම ක්‍රියාත්මක කරනු ලබන අතර, ඒ සඳහා වන වැය බර රජය විසින් දරනු ලබයි.
සමාජ ආරක්ෂණ ක්‍රම විවිධ ආයතන මඟින් විවිධ ක්‍රමවේදයන් යටතේ ක්‍රියාත්මක කිරීමත්, ඒ සඳහා වන වැය බර රජය හෝ සේව්‍ය පක්ෂය විසින් දැරිය යුතු වීමත් හේතුවෙන් ඇති වන අපහසුතා නිසා මෙම සමාජ ආරක්ෂණ ක්‍රමයන්හි ඵලදායීතාව හා කාර්යක්ෂමතාව අභියෝගයට ලක්ව ඇති බැවින් දැනට ක්‍රියාත්මක සියලු සමාජ ආරක්ෂණ ක්‍රමවේද එක් ආයතනයක් යටතේ මෙහෙයවීමේ යෝග්‍යතාව හඳුනාගනු ලැබ ඇත.
කම්කරු හා විදේශ රැකියා අමාත්‍යවරයා විසින් ඒ සම්බන්ධයෙන් ඉදිරිපත් කළ යෝජනාව සැලකිල්ලට ගෙන, මෙම කරුණට අදාළ ජාත්‍යන්තර අත්දැකීම් ද අධ්‍යයනය කර දැනට ක්‍රියාත්මක සියලුම සමාජ ආරක්ෂණ ක්‍රමවේද එක් ආයතනයක් යටතේ ක්‍රියාත්මක කිරීමට හැකි වන අයුරින් ක්‍රමවේදයක් හඳුන්වා දීම පිණිස නිර්දේශ ඉදිරිපත් කිරීම සඳහා අදාළ සියලුම පාර්ශ්වයන් නියෝජනය වන පරිදි කමිටුවක් පත් කිරීම පිණිස අමාත්‍ය මණ්ඩලයේ අනුමැතිය ලබා දීමට තීරණය කරන ලදී.
The post EPF, ETF සහ ගොවි-ධීවර රක්ෂණ එක් ආයතනයක් යටතට ගෙනඒමේ සැලසුමක් appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka