‘ගුණදමින් එලිෆන්ට් හවුස්’ සහ Eco Spindles සමාගමට අමතරව මස්කෙළිය ප්‍රාදේශීය සභාව, සීතගඟුලගම ග්‍රාම නිලධාරී කොට්ඨාශය, මස්කෙළිය වෙළඳ සංගමය, සහ ප්‍රාදේශීය සභාවට සම්බන්ධ තවත් පාර්ශ්වයන් රැසක් මෙම වැඩසටහනට දායක වී සිටිති. ශ්‍රී පාද වන්දනා සමයේ මාස 6 ක කාලයක් පුරා මෙම ව්‍යාපෘතිය ක්‍රියාත්මක වනු ඇති අතර, ඒ සඳහා අවශ්‍ය යටිතල පහසුකම් හා අරමුදල් සපයනු ලබන්නේ ‘ගුණදමින් එලිෆන්ට් හවුස්’ විසිනි. දිනපතා ශ්‍රී පාදස්ථානය පිරිසිදු කිරීමට අමතරව මෙම වැඩසටහන යටතේ, පරිසරයට හානියක් නොවන පරිදි ඉවතලන ප්ලාස්ටික් බැහැර කරන අන්දම සම්බන්ධයෙන් බැතිමතුන් දැනුවත් කෙරේ. ශ්‍රී පාද පරිශ්‍රයෙන් ඉවත් කරනු ලබන PET සහ අනෙකුත් ප්ලාස්ටික් වර්ග Eco Spindles පුද්. සමාගම මගින් එක්රැස් කර ප්‍රතිචක්‍රීකරණය කරනු ලබනු ඇත.
“මෙම ව්‍යාපෘතිය ක්‍රියාවට නැංවීම සඳහා Eco Spindles සමග අත්වැල් බැඳගැනීමට හැකි වීම අපට මහත් සතුටක්. මෙය වගකීම්සහගත ලෙස ඉවතලන ප්ලාස්ටික් එකතු කිරීම සහ ප්‍රතිචක්‍රීකරණය ප්‍රවර්ධනය කිරීම සඳහා අප දක්වන කැපවීම පැහැදිලිව පෙන්වා දීමට ලැබුණු අගනා අවස්ථාවක් වුණා. පරිසරයට හානියක් නොවන පරිදි ඉවතලන ප්ලාස්ටික් බැහැර කිරීමේ වැදගත්කම පිළිබඳව ජනතාව දැනුවත් කිරීම මෙම ව්‍යාපෘතියේ ප්‍රධානතම ඉලක්කයයි.” Ceylon Cold Stores සමාගමේ සැපයුම් දාම කළමනාකරණ ප්‍රධානී සහ ජෝන් කීල්ස් හෝල්ඩින්ස් සමාගමේ ජ්‍යෙෂ්ඨ උප සභාපති සංජීව ජයසුන්දර මහතා පැවසී ය.
“පෞද්ගලික අංශය වගකීම්සහගත ලෙස ඉවතලන ප්ලාස්ටික් කළමනාකරණය කිරීම සහ තිරසාර විසඳුම් නිර්මාණය කිරීම සඳහා මේ ආකාරයට ඉදිරියට පැමිණීම සතුටට කරුණක්. පරිසරය ආරක්ෂා කරගැනීම සඳහා එක්ව වැඩ කිරීම තුළින් කෙතරම් සාර්ථක ප්‍රතිඵල ළඟා කරගත හැකිද යන්නට මෙම හවුල්කාරීත්වය ඉතා හොඳ උදාහරණයක් ලෙස මා දකිනවා.” Eco Spindles සමාගමේ ප්‍රධාන විධායක නිලධාරී (ප්‍රතිචක්‍රීකරණ) ප්‍රසන්ත මාලිම්බඩගේ මහතා පැවසී ය.
“මස්කෙළිය ජනතාව සමග එක් වී මෙම පූජනීය ස්ථානය පිරිසිදු කිරීම සම්බන්ධයෙන් මෙම ව්‍යාපෘතියටත්, ඒ සඳහා මූලිකත්වය ගත් මේ දැවැන්ත සමාගම් දෙකටත් අප බෙහෙවින් ස්තූතිවන්ත වනවා. ප්‍රදේශවාසීන් මෙන්ම බැතිමතුන් වෙනුවෙන් වඩාත් පිරිසිදු සහ අලංකාර පරිසරයක් නිර්මාණය කිරීමේ උත්සාහයට දායක වීමට ලැබීම අපට මහත් සතුටක් සහ ආඩම්බරයක්.” නල්ලතන්නිය ග්‍රාම නිලධාරිනී රණවීරගේ මංගලිකා සිසි කුමාරි මහත්මිය පැවසුවා ය.
බැතිමතුන් සහ සංචාරකයන් මෙන්ම ත්‍රාසජනක ක්‍රියාකාරම්වලට ඇල්මක් දක්වන්නන් විශාල පිරිසක් වන්දනා සමයේදී ශ්‍රී පාදස්ථානය වෙත ඇදී එති. එම කාලය තුළදී සිදුවන පරිසර දූෂණයෙහි බරපතළකම පරිසරවේදීන් නොයෙක් වර පෙන්වා දී තිබේ. අවාසනාවකට, මෙම පූජනීය ස්ථානය පිරිසිදු කිරීම සඳහා වැයවන වියදම් තනිව දැරීමට මස්කෙළිය ප්‍රාදේශීය සභාවට හැකියාවක් නොමැත. ‘ගුණදමින් එලිෆන්ට් හවුස්’ සහ Eco Spindles මෙම සත්කාරය දියත් කිරීමට පෙරමුණ ගත්තේ ඒ හේතුවෙනි. මෙම ව්‍යාපෘතිය මගින් ඉවත් කරනු ලබන ප්ලාස්ටික් වෙන්කිරීම සහ පිරිසැකසුම් කිරීම මින් ඉදිරියට Eco Spindles ප්‍රතිචක්‍රීකරණ කර්මාන්තශාලාවේදී සිදුකෙරේ. ඉන් අනතුරුව ඇඟලුම් වර්ග, බුරුසු සහ වෙනත් සුදුසු නිෂ්පාදන සඳහා මෙම ප්ලාස්ටික් භාවිතා කෙරෙනු ඇත.
මෙම පරිසර හිතකාමී වැඩසටහන ‘ගුණදමින් එලිෆන්ට් හවුස්’ මගින් ක්‍රියාවට නංවනු ලබන ප්‍රජා සත්කාරයන් රාශියක් අතරින් එක් වැඩසටහනකි. ඉවතලන PET එක්රැස් කිරීම සඳහා දිවයින පුරා මධ්‍යස්ථාන පිහිටුවීමටද එලිෆන්ට් හවුස් දැනටමත් විශාල ආයෝජනයන් සිදුකර තිබේ. ‘ගුණදමින් එලිෆන්ට් හවුස්’ තම හවුල්කරුවන් සමග එක් වී, ඉවතලන PET වගකීම්සහගත ලෙස බැහැර කිරීම දිරිගැන්වීම සඳහා දිවයින පුරා ප්ලාස්ටික් එක්රැස් කරන්නන් සහ ප්‍රතිචක්‍රීකරණ සමාගම් සමග සමීපව කටයුතු කරමින් සිටී. Elephant House සහ Eco Spindles මේ ආකාරයට මස්කෙළිය ප්‍රදේශයේ පාලන ආයතන සහ ප්‍රදේශවාසී ජනතාව සමග එක්ව මෙම වැඩසටහන ක්‍රියාවට නැංවීම, රටේ පරිසරය තිරසාර සහ අලංකාර ලෙස පවත්වාගෙන යාම සඳහා පෞද්ගලික අංශය දරමින් සිටින උත්සාහයට මනා සාක්ෂියකි.
The post Elephant House සහ Eco Spindles එක් වී පූජනීය ශ්‍රී පාදස්ථානය පිරිසිදු කරයි appeared first on Adaderana Biz Sinhala | Sri Lanka Business News.
Source From biz.adaderana
Author: Bizweb2 Bizweb2
#SriLanka #News #lka