කටුනායක පිහිටි ශ්‍රීලංකන් ඒවියේෂන් කොලේජ් හිදී මෙම වැඩමුළුව පවත්වන ලද අතර, ශ්‍රීලංකන් ගුවන් සේවය සහ පොදුවේ මෙරට ගුවන් සේවා කර්මාන්තය නියෝජනය කරන ප්‍රවීණයෝ පිරිසක් මීට සම්පත් දායකත්වය ලබාදුන්හ. මෙහි සමාරම්භක උත්සවයට සහභාගී වූ ශ්‍රීලංකන් ගුවන් සේවයේ ප්‍රධාන විධායක නිලධාරී රිචර්ඩ් නටාල් මහතා, කලාපයේ ගුවන් සේවා කර්මාන්තයේ වර්තමානය හා අනාගතය සම්බන්ධයෙන් අදහස් පළකළේ ය.
ශ්‍රීලංකන් ගුවන් සේවයේ ආයතනික සන්නිවේදන කළමනාකරු දීපාල් පෙරේරා මහතා විසින් පළමු දිනයේ පිළිගැනීමේ කථාව සහ හැඳින්වීම සිදුකළ අතර, ඉන් අනතුරුව International Air Transport Association (IATA) හි සහකාර අධ්‍යක්ෂ (මෙහෙයුම් සහ ආරක්ෂක කටයුතු – ආසියානු පැසිෆික් කලාපය) කපිතාන් හොසේ ෆනෑන්ඩස් සහ ආයතනික සන්නිවේදන ප්‍රධානී ඇල්බර්ට් ටීජොන්ග් යන මහත්වරුන් විසින් ගුවන් සේවා කර්මාන්තය තුළ ක්‍රියාත්මක වන ආරක්ෂක විධිවිධාන පිළිබඳව අතථ්‍ය (Virtual) සැසියක් පවත්වන ලදි. දවසේ ඉතිරි වැඩසටහන් මෙහෙයවන ලද්දේ ශ්‍රීලංකන් ගුවන් සේවයේ සම්පත් දායක දායිකාවන් විසිනි. එහිදී තාක්ෂණික ගුවන් නියමු කපිතාන් ජයස්ක බරණගේ විසින් ගුවන් ගමන් මෙහෙයුම් පිළිබඳවද, උපදේශක ඉවැන්ජලින් ලැපන් විසින් ගුවන් යානා අභ්‍යන්තර මෙහෙයුම් කටයුතු පිළිබඳවද, ශ්‍රීලංකන් ඉංජිනියරින් හි පුහුණු හා ශක්‍යතා සංවර්ධන කළමනාකරු අමිල ප්‍රනාන්දු විසින් ඉංජිනේරු කටයුතු පිළිබඳවද, ගුවන් තොටුපළ සේවා කළමනාකරු (පුහුණු හා සංවර්ධන) තේරේකා තිලකවර්ධන විසින් ගුවන් තොටුපළ තුළ ගුවන් යානා හැසිරවීම පිළිබඳවද දැනුවත් කරන ලදි.
වැඩමුළුවේ දෙවැනි දිනය ආරම්භ වූයේ ගුවන් ගමන් සුරක්ෂිතතා කළමනාකරු කපිතාන් ශවන්ත පේද්‍රිස් සහ අර්බුද කළමනාකරණ කළමනාකාරිනී ප්‍රසාදිනී පෙරේරා විසින් සුරක්ෂිතතාව සහ අර්බුද කළමනාකරණය සම්බන්ධයෙන් පවත්වන ලද සැසියකිනි. ඉන් අනතුරුව කාර්ය මණ්ඩල දායකත්ව සහ මානව සම්පත් සහය සේවා කළමනාකරු නිරෝෂන් රණවක, අලෙවි හා ව්‍යාපාර සංවර්ධන කළමනාකාරිනී ජයනි සේනානායක සහ ශ්‍රීලංකන් ඒවියේෂන් කොලේජ් හි නියෝජ්‍ය සාමාන්‍යාධිකාරී කාලිංග හිරණ්‍ය යන මහත්ම මහත්මීහුද තමන්ට අදාළ ක්ෂේත්‍රයන් සම්බන්ධ විවිධ මාතෘකා යටතේ අදහස් දැක්වූහ. ශ්‍රී ලංකා සිවිල් ගුවන් සේවා අධිකාරියේ නියෝජ්‍ය අධ්‍යක්ෂ ජනරාල් (ගුවන් ප්‍රවාහන සහ ආරක්ෂක රෙගුලාසි) රේහාන් වන්නිඅප්පා සහ ගුවන් තොටුපළ හා ගුවන් සේවා (ශ්‍රී ලංකා) සමාගමේ අලෙවි හා ආයතනික සන්නිවේදන ප්‍රධානී ආචාර්ය සුමිත් ද සිල්වා යන මහත්වරුන් විසින් සිදුකරන ලද ඉදිරිපත් කිරීම්වලින් අනතුරුව වැඩමුළුවේ දේශන අවසන් විය.
මෙම වැඩමුළුවේදී ගුවන් සමාගම් සහ ගුවන් සේවා කර්මාන්තයේ මූලිකාංග පිළිබඳව එම ක්ෂේත්‍රයන්හි ප්‍රවීණයන් වෙතින් වටිනා කරුණු රාශියක් දැනගැනීමට මාධ්‍යවේදීන්ට අවස්ථාව ලැබිණි. වැඩමුළුව බෙහෙවින් සාර්ථක වූ අතර, ඊට සහභාගී වූවන් පවසා සිටියේ එමගින් තමන්ට වටිනා දැනුම් සම්භාරයක් හිමි වූ බවයි.
වැඩමුළුව අවසානයේදී ශ්‍රීලංකන් ගුවන් සේවයට අයත් 747 ගුවන් යානා අංගණයේ නිරීක්ෂණ චාරිකාවක යෙදීමට මෙම මාධ්‍යවේදීන්ට අවස්ථාව ලැබිණි. ඔවුන් අතරින් ඇතැම් අයට එම අවස්ථාව හිමි වී තිබුණේ ප්‍රථම වරට වන අතර, ඔවුන් ඉමහත් උද්‍යෝගයකින් යුතුව කරුණු විමසන සහ ඡායාරූප ලබාගන්නා ආකාරය දැකගත හැකි විය. වැඩමුළුවේ සමාප්ති උත්සවයේදී ඊට සහභාගී වූ සියලුම දෙනාට සහතිකපත් පිරිනමන ලදි.
The post ශ්‍රීලංකන් ගුවන් සේවය ජනමාධ්‍යවේදීන් වෙනුවෙන් සංවිධානය කළ පුරෝගාමී වැඩමුළුව අතිසාර්ථක ලෙස නිමාව දකී appeared first on Adaderana Biz Sinhala | Sri Lanka Business News.
Source From biz.adaderana
Author: Bizweb2 Bizweb2
#SriLanka #News #lka