වටවල “කළණ මිතුරු“ කොවිඩ් වලින් අසරණ වූ ජනතාවට පිහිටවෙයි

වටවල වැවිලි සමාගම විසින් දියත් කර තිබෙන “කළණ මිතුරු“ සමාජ සත්කාරක සේවාව මගින් කොවිඩ්-19 වසංගත තත්ත්වයෙන් පීඩාවට පත්ව සිටින ජනතාවට සහන සැලසීම සඳහා නව වැඩසටහනක් ආරම්භ කර තිබේ.

මෙම වැඩසටහනේ පළමු පියවර ලෙස පසුගියදා රුපියල් 5000 ක් වටිනා වියලි ආහාර මළු සියයක් සමාගම විසින් නාගොඩ ප්‍රාදේශීය ලේකම් කාර්යාලයේදී පරිත්‍යාග කරන ලදී.

එම අවස්ථාව සඳහා නාගොඩ ප්‍රාදේශීය ලේකම් උපුල් ප්‍රියංකර මහතා, පාර්ලිමේන්තු මන්ත්‍රී සම්පත් අතුකෝරල මහතා සහ වටවල වැවිලි සමාගමේ නිළධාරීන් පිරිසක් සහභාගී විය. වටවල වැවිලි සමාගමේ “කළණ මිතුරු“ සමාජ සත්කාරක සේවාව මගින් ගාල්ල දිස්ත්‍රික්කයේ උඩුගම, නෙළුව, තවලම, නාගොඩ, යක්කලමුල්ල, හිනිදුම, නාකියාදෙණිය වැනි ප්‍රදේශවල ජීවත්වන ජනතාවට අනාගතයේදී සෙත සැලසෙන පරිදි උඩුගම රෝහලේ ඇඳන් 05 කින් සමන්විත අංග සම්පූර්ණ දැඩි සත්කාර ඒකකයක් මේ වනවිට ගොඩනගමින් තිබේ.

උඩුගම රෝහලේ දැඩි සත්කාර ඒකකයක් නොමැති කමින් ප්‍රදේශවාසීන් දැඩි පීඩාවකට ලක්වන අතර එම අඩුපාඩුව මැනවින් හඳුනාගත් වටවල වැවිලි සමාගම සිය “කළණ මිතුරු“ ප්‍රජා සත්කාරක වැඩසටහන යටතේ මෙම පරිත්‍යාගය සිදුකර ඇත.

එසේම, වටවල වැවිලි සමාගම උඩුගම ප්‍රදේශයේ තරුණ තරුණියන්, දරුවන් සහ වැඩිහිටියන් ඉලක්ක කරගනිමින් සිය “කළණ මිතුරු“ ප්‍රජා සත්කාරක වැඩසටහන යටතේ ව්‍යාපෘති කිහිපයක්ම ක්‍රියාත්මක කර තිබේ.