බ්‍රවුන්ස් ඉන්වෙස්ට්මන්ට්ස් සමාගමේ රු. බිලියන 13 ක දැවැන්ත කොටස් ගනුදෙනුවක්

බ්‍රවුන්ස් ඉන්වෙස්ට්මන්ට්ස් පීඑල්සී සමාගමේ කොටස් බිලියන 2 ක දැවැන්ත ගනුදෙනුවක් අද (01) පෙරවරුවේ දී සිදුවිය. මෙහිදී කොටස් 2,095,809,270 ක් කොටසක් රු. 6.40 බැගින් ගනුදෙනු වූ අතර ඒ අනුව එම ගනුදෙනුවෙන් පමණක් රු. බිලියන 13.41 ක පිරිවැටුමක් කොටස් වෙළෙඳපොළට එක්විය.

බ්‍රවුන්ස් ඉන්වෙස්ට්මන්ට්ස් පීඑල්සී කොටස්කරුවන්ගේ ලැයිස්තුවට අනුව එහි තෙවැනියාට විශාලතම කොටස් හිමියා වන Oxford Capital (Private) Limited සතු කොටස් බිලියන 1.11 ක් හා සිව්වැනියාට විශාලතම කොටස් හිමියා වන Churchill Capital (Private) Limited සතු කොටස් මිලියන 985.80 ක් මෙහිදී ගනුදෙනු වී ඇත. මීට අමතරව තවත් කොටස් මිලියන 999 ක් ගනුදෙනු වී තිබේ.

බ්‍රවුන්ස් ඉන්වෙස්ට්මන්ට්ස් පීඑල්සී යනු LOLC සමූහයේ මූලෝපායික ආයෝජන හස්තය යි. එය පසුගිය 2020 දෙසැම්බර් 17 දින චයිනා හාබර් ඉන්ජිනියරින් කම්පැනි ලිමිටඩ් (CHEC) සමඟ අවබෝධතා ගිවිසුමකට අත්සන් තැබූ අතර, කොළඹ ජාත්‍යන්තර මූල්‍ය මධ්‍යස්ථානය ඉදිකිරීමට අදාළ අමෙරිකානු ඩොලර් බිලියනයක වටිනාකමකින් යුතු කොළඹ වරාය නගරයේ පළමුවැනි ආයෝජන ගිවිසුම එය වේ.

The post බ්‍රවුන්ස් ඉන්වෙස්ට්මන්ට්ස් සමාගමේ රු. බිලියන 13 ක දැවැන්ත කොටස් ගනුදෙනුවක් appeared first on Adaderana Biz Sinhala | Sri Lanka Business News.