ශ්‍රී ලංකාව සඳහා වන ජාත්‍යන්තර මූල්‍ය අරමුදලේ විස්තීර්ණ අරමුදල් පහසුකමට අදාළ ණය ප්‍රතිකර්ම සඳහා අනුකූල වන ප්‍රධාන පරාමිතීන් සම්බන්ධයෙන් ශ්‍රී ලංකාව සමඟ ප්‍රතිපත්තිමය එකඟතාවයට එළඹි බව නිල ණය හිමි කමිටුව අද (29) දින දැනුම් දී සිටියේය.
මේ සම්බන්ධයෙන් නිවේදනයක් නිකුත් කරමින් මුදල් අමාත්‍යාංශය පවස්නේ නිල ණය හිමි කමිටුව ශ්‍රී ලංකාවේ ණය ප්‍රතිකර්ම සම්බන්ධයෙන් ප්‍රතිපත්තිමය එකඟතාවයකට පැමිණ ඇති බවත්, ඒ හරහා ඩොලර් බිලියන 5.9ක හිඟ විදෙස් ණය ආවරණය වන බවත්ය. එහිදී ණය ගෙවීමට ඇති කාලය දීර්ඝ කිරීම් සහ පොලී අනුපාතික අඩු කිරීම යන තීරණවල සංයෝගයක් අදාළ ණය ප්‍රතිකර්මයන්ට අන්තර්ගත වනු ඇති බව මුදල් අමාත්‍යාංශය සඳහන් කරයි.
ජාත්‍යන්තර මූල්‍ය අරමුදලේ (IMF) වැඩසටහන් ඉලක්කවලට අනුකූලව රාජ්‍ය ණය තිරසාරභාවය ප්‍රතිෂ්ඨාපනය කිරීම සඳහා අන්‍යෝන්‍ය කැපවීමක් පෙන්නුම් කරන මෙම ගිවිසුමට එළඹීමේදී නිල ණය හිමි කමිටු සාමාජිකයින්ගේ සහයෝගය ශ්‍රී ලංකා රජය අගය කරනු ලබන බව මුදල් අමාත්‍යාංශය මෙහිදී කියා සිටී.
ජාත්‍යන්තර මූල්‍ය අරමුදලේ සහාය දක්වන වැඩසටහනේ පළමු සමාලෝචනය සඳහා ජාත්‍යන්තර මූල්‍ය අරමුදලේ විධායක මණ්ඩලයේ කඩිනම් අනුමැතිය ලබා ගැනීමට, මෙම ගිවිසුම මගින් ශ්‍රී ලංකාවට පහසුකම් සැලසෙන ඇති බවත්, ජාත්‍යන්තර මූල්‍ය අරමුදල විසින් ශ්‍රී ලංකාවට ලබා දීමට නියමිත මීළඟ වාරිකය වන ඇමරිකානු ඩොලර් මිලියන 334 ක් මුදල ලබා ගැනීමට ඒ හරහා ඉඩ ලැබෙනු ඇති බවත් මුදල් අමාත්‍යාංශය මේ පිළිබඳව වැඩිදුරටත් සඳහන් කරයි.
The post නිල ණය හිමියන්ගේ ප්‍රතිචාරය ගැන මුදල් අමාත්‍යාංශය මෙසේ කියයි appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka