කොටස් වෙළෙඳපොළ කඩාවැටෙන්නේ ඇයි?

කොළඹ කොටස් වෙළෙඳපොළ මිල දර්ශක අද (23) දිනයේ දී දැඩි පසුබෑමකට ලක්විය.

දිනයේ ගනුදෙනු අවසානයේ දී සියලු කොටස් මිල දර්ශක අගය ඒකක 11,217.76 ක් හා S&P SL20 දර්ශක අගය ඒකක 3,791.57 ක් ලෙසින් සටහන් වූ අතර පිළිවෙලින් ඒකක 374.54 ක් හා ඒකක 145.38 ක් වශයෙන් මෙම දර්ශක දෙක දිනය තුළ දී පහළ යන ලදී.

අද දිනය තුළ දක්නට ලැබුණු සුවිශේෂී තත්ත්වය නම් අවස්ථා දෙකක දී දෛනික ගනුදෙනු අත්හිටුවීමයි.

S&P SL20 දර්ශකය පෙර දිනයට වඩා 5% ක ප්‍රමාණයකින් පහළ ගිය හෙයින් පෙරවරු 11.17 ට මුල් වරට කොටස් වෙළෙඳපොළ ගනුදෙනු නවත්වනු ලැබුණු අතර මිනිත්තු 30කට පසු නැවත ගනුදෙනු ආරම්භ වුවද පස්වරු 12.13 ට යළිත් වරක් කොටස් වෙළෙඳපොළ අක්‍රීය වූයේ පූර්ව දිනයට වඩා 7.5% ක ප්‍රමාණයකින් S&P SL20 දර්ශකය කඩා වැටුණු බැවිනි.

ඉන් පසු පස්වරු 12.43 ට නැවත ගනුදෙනු ආරම්භ වීමෙන් පසුව කොටස් මිල දී ගැනීම සඳහා ගැනුම්කරුවන්ගෙන් යම් උද්යෝගයක් දැකගත හැකිවිය. එහි ප්‍රතිඵලයක් ලෙස ඒකක 10,794.95 ක් දක්වා කඩා වැටුණු සියලු කොටස් මිල දර්ශක අගය දිනය නිමා වන විට ඒකක 11,217.76 ක් දක්වා යථාතත්ත්වයට පත්වීමක් දක්නය ලැබුණි.

රු. බිලියන 4.52 ක ගනුදෙනු පිරිවැටුමක් දිනය තුළ වාර්තා විය.

මේ අතර පසුගිය සඳුදා (21) දිනයේ දී ද කොටස් වෙළෙඳපොළ ගනුදෙනු අතරමැද නවතා දැමීමක් වාර්තා වූයේ පෙර කී ආකාරයෙන් S&P SL20 දර්ශකය 5% ක් ඉක්මවා පහළ යාම හේතුවෙනි.

කොටස් වෙළෙඳපොළ කඩා වැටෙන්නේ ඇයි? මේ සම්බන්ධයෙන් අද දෙරණ කළ විමසීමකට ප්‍රතිචාර දක්වමින් ෆස්ට් කැපිටල් හෝල්ඩිංග්ස් හි පර්යේෂණ අංශ ප්‍රධානී ඩිමන්ත මැතිව් මහතා මෙලෙස කරුණු දක්වන ලදී.

“මේ සඳහා ආසන්නතම හේතුව වශයෙන් දැනට ක්‍රියාත්මක වන විදුලි කප්පාදු හඳුන්වන්න පුළුවන්. මේ මාසයේ මුල සිටම යම් ආකාරයක විදුලිය කප්පාදු දක්නට ලැබුණා. අද දවසේ සිට පැය 4 1/2 ක විදුලි කප්පාදුවක් ක්‍රියාත්මක වෙනවා. මෙය අපේ ආයෝජකයින්ට දැන් දැන් දැනෙන්න පටන් අරන් තිබෙනවා. සමාගම්වලට අන්‍යාකාරයෙන් බලපෑමක් මෙයින් සිදුවෙනවා. මේ නිසා ඔවුන්ගේ ලාභ ප්‍රතිශතය අඩුවෙන්න පුළුවන්. මේ විශාල පහළ යෑමට එය හේතුවක් වෙන්න පුළුවන් කියලා අපි හිතනවා.“

අද දිනයේ දී සමාගම් 200 ක කොටස් මිල ගණන් ඊයේ දිනයට සාපේක්ෂව පහළ ගොස් තිබුණි.

 

 

The post කොටස් වෙළෙඳපොළ කඩාවැටෙන්නේ ඇයි? appeared first on Adaderana Biz Sinhala | Sri Lanka Business News.