තම විශේෂඥතාවය අනිකුත් වාහන සන්නාම සඳහා ලබාදීමේ දැක්මෙන් යුතුව සමාගමට අයත් කුරුණෑගල පිහිටි සංකීර්ණය තුළ වෙනමම වාහන සේවා සහ අළුත්වැඩියා කිරීමේ මධ්‍යස්ථානයක් ආරම්භ කර තිබෙන අතර එයට නව කාර්ය මණ්ඩලයක් බඳවාගෙන ගෝලීය තත්ත්වයන් යටතේ එම කාර්ය මණ්ඩලයට පුහුණුව ලබාදී ඇත. මෙම සේවා මධ්‍යස්ථානය සඳහා සමාගම විසින් අති නවීන ස්කෑනින් උපකරණ සහ අනිකුත් මෙවලම් මිලදීගෙන තිබෙන බව සමාගම වැඩිදුරටත් සඳහන් කරයි.
මෙම නව බහු-සන්නාම වාහන සේවා ස්ථානය මගින් පළමු අදියර තුළ අලෙවියෙන් පසු සේවා සහ යාන්ත‍්‍රික අළුත්වැඩියා කටයුතු සියළුම වාහන සන්නාම සඳහා ලබාදෙන බවත් දෙවැනි අදියර යටතේ අනතුරු අළුත්වැඩියා කිරීමේ කටයුතු ආරම්භ කරන බවත් සමාගම සඳහන් කරයි. මෙම නව මධ්‍යස්ථානය මගින් නියම අමතර කොටස් අලෙවි කරමින් ජාත්‍යන්තර තත්ත්වයේ අලෙවියෙන් පසු සේවාවක් ලබාදීමට සැලසුම් කර තිබෙන අතර වාහන සේවා සඳහා වගකීමක් ලබාදීමටද කටයුතු කර ඇත. එසේම, මහ මගදි දෝෂයන්ට ලක්වන වාහන සඳහා පැය 24 පුරාම යම් දුර සීමාවකට යටත්ව සේවා ලබා දීමට ද මෙම මධ්‍යස්ථානය විසින් කටයුතු කරයි.
මෙම නව ව්‍යාපාරික කටයුත්ත දියත් කිරීම සමරමින් ඔටෝපොයින්ට් සමාගම සඳහන් කරන්නේ 2021 නොවැම්බර් මාසයේදී මෙම සේවා මධ්‍යස්ථානයට පැමිණෙන ගනුදෙනුකරුවන්හට නොමිලේ වාහන පරික්ෂණ වාර්තාවක්, වැක්ස් කරදීම සහ තවත් සේවා රැසක් ලබාදෙන බවයි.
ඔටෝපොයින්ට් සමාගම විසින් බහු-සන්නාම වාහන සඳහා සේවා ලබාදීම පිළිබඳව අදහස් දක්වමින්, Kia මෝටර්ස් (ලංකා) සමාගමෙහි කළමනාකාර අධ්‍යක්ෂක, ඇන්ඩෲ පෙරේරා මහතා ප‍්‍රකාශ කර සිටින්නේ, ‘මෙම ව්‍යාපාරික කටයුත්තට මෙරට Kia සන්නාමය නියෝජනය කිරීමේ අපගේ වසර 25 ක අතිවිශිෂ්ට අත්දැකීමේ ශක්තිය ලබාදෙනවා. එමගින් අපගේ සේවා සහ අළුත්වැඩියා කිරීමේ විශේෂඥතාව අනිකුත් සන්නාම සඳහාත් ලබාදීම තාර්කික කටයුත්තක්. මේ අනුව, ඔටෝපොයින්ට් මගින් ලබාදෙන්නේ ජාත්‍යන්තර ප‍්‍රමිතියෙන් යුතු සේවාවක් යැයි අපි වාහන හිමියන්ට සහතික වෙනවා.’
ඔටෝපොයින්ට් සමාගම විසින් ලබාදෙන පූර්ණ සේවා පැකේජය යටතේ වාහන පරීක්ෂාව, ඔයිල් සහ ෆිල්ටර් මාරු කිරීම, සේදීම, ඇතුළත පිරිසිදු කිරීම සහ වැකියුම් කිරීමත්, ප‍්‍රමුඛ සේවා පැකේජය යටතේ වාහන ස්කෑන් කිරීම, ට‍්‍රාන්ස්මිෂන් ඔයිල් මාරු කිරීම, ඩිෆෙරෙන්ෂල් ඔයිල් මාරු කිරීම, බ්‍රේක් ඔයිල් මාරු කිරීම සහ පවර්-ස්ටියරින්ග් ඔයිල් මාරු කිරීම සිදු කරනු ඇත. මීට අමතරව, එන්ජින් ටියුන් කිරීම, ට‍්‍රාන්ස්මිෂන්, එන්ජින් සහ සස්පෙන්ෂන් අළුත් වැඩියාවද අනිකුත් සේවා යටතේ ලබාදෙන බව සමාගම සඳහන් කරයි.
එසේම, ඔටෝපොයින්ට් සමාගම මේ ආකාරයෙන් අනිකුත් සන්නාම සඳහා සේවා ලබාදෙන අතරම Kia වාහන හිමිකරුවන්ට ලබාදෙන සුපුරුදු අතිවිශිෂ්ට සේවාව ද ඒ ආකාරයෙන්ම කුරුණෑගල, කොළඹ පාරේ දම්බොක්කේ පිහිටි Kia සේවා මධ්‍යස්ථානයේදී අඛණ්ඩවම ස්වාධීනව ලබාදෙන බව ඇන්ඩෲ පෙරේරා මහතා තව දුරටත් සඳහන් කරයි.
Kia මෝටර්ස් (ලංකා) සමාගම විසින් ශ‍්‍රී ලංකාව පුරා වෙළෙඳ නියෝජිතයින් පත් කිරීම ආරම්භ කිරීමත් සමඟ මුල් වරට 2015 වසරේදී නව ප‍්‍රදර්ශනාගාරයක් සහ සේවා මධ්‍යස්ථානයක් සමඟ කුරුණෑගලට පිවිසුණි. මේ අනුව, රුපියල් මිලියන 150 ක් ආයෝජනය කරමින් අලෙවි, සේවා සහ අමතර කොටස් (3S) ලබාදීම සඳහා කොළඹ-කුරුණෑගල පාරේ මෙම ජාත්‍යන්තර ප‍්‍රමිතියෙන් යුතු සේවා මධ්‍යස්ථානය Kia විසින් ආරම්භ කරන ලදි. පසුව ඔටෝපොයින්ට් ලිමිටඞ් නමින් එම මධ්‍යස්ථානය Kia සමාගමේ පූර්ණ අනුබද්ධ සමාගමක් ලෙස ස්ථාපිත කරන ලදි.
The post ඔටෝපොයින්ට් සමාගම බහු-සන්නාම වාහන සේවා සහ අළුත්වැඩියා ලබාදීම සඳහා පුළුල් කරයි appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka