අඛණ්ඩව දෙවන දිනයටත් කොටස් වෙළෙඳපොළෙ පසුබසී. සියලු කොටස් ඒකක 101කින් පහළට

කොළඹ කොටස් වෙළෙඳපොළ මිල දර්ශකයන් හි පහළ යාමක් අද (01) දිනයේ දීද වාර්තා විය. ඒ අනුව සියලු කොටස් මිල දර්ශක අගය ඒකක 101.0 කින් අද දිනයේ දී පහළ ගොස් දිනය අවසානයේ දී ඒකක 8,567.07 ක් ලෙසින් සටහන් වූ අතර එය පූර්ව ගනුදෙනු දිනය හා සැසඳීමේ දී 1.17% ක පහළ යාමක් වේ. මෙයාකාරයෙන් සියලු කොටස් මිල දර්ශකයේ පහළ යාමක් වාර්තා වූ අඛණ්ඩ දෙවැනි දිනය අදයි. මීට පෙර පසුගිය ජනවාරි 29 දිනයේ දී ඒකක 143.94 ක දැවැන්ත පහළ යාමක් සියලු කොටස් මිල දර්ශකයෙන් වාර්තා විය.

මේ අතර S&P SL20 දර්ශකය ද පෙර දිනයට සාපේක්ෂව ඒකක 75.03 කින් පහළ ගොස් ඒකක 3,439.15 ක් ලෙසින් වාර්තා වී තිබේ.

අද දිනය තුළ දැකිය හැකි වූ සුවිශේෂී සිදුවීම නම්රු. බිලියන 23.75 ක දැවැන්ත පිරිවැටුමක් දිනය තුළ දී වාර්තා වීමයි. ඒ සඳහා වැඩි දායකත්වය බ්‍රවුන්ස් ඉන්වෙස්ට්මන්ට්ස් පීඑල්සී ගිවිසාගනු ලැබූ (crossings) ගනුදෙනු කිහිපයක් හරහා ලැබී තිබුණි.  එහිදී ගනුදෙනු 5 ක් හරහා කොටස් 2,634,352,470 ක් කොටසක් රු. 6.40 බැගින් හුවමාරු වී තිබුණු අතර රු. බිලියන 16.85 ක පිරිවැටුමක් එමගින් ජනනය වී තිබුණි. අද දින සාමාන්‍ය ගනුදෙනු තුළින් වැඩි දායකත්වයක් දෛනික පිරිවැටුමට ලැබී තිබුණේ LOLC හෝල්ඩිංග්ස් කොටස් ගනුදෙනු මගිනි. එය රු. බිලියන 1.37 කි.

දිනය තුළ දී සමාගම් 55 ක කොටස් මිල ගණන් ඉහළ යද්දී සමාගම් 153 ක කොටස් මිල ගණන් පහළ යන ලදී.

 

 

The post අඛණ්ඩව දෙවන දිනයටත් කොටස් වෙළෙඳපොළෙ පසුබසී. සියලු කොටස් ඒකක 101කින් පහළට appeared first on Adaderana Biz Sinhala | Sri Lanka Business News.