සල්ලි ඉල්ලා නොලැබුණාම කිරිඅම්මාගේ ගෙල සිරකර මරලා කරාබු දෙක ගලවාගෙන

78 හැවිරිදි වයෝවෘද්ධ කිරිඅම්මා ගෙල සිර කර මරා සැඟවී සිටි මුණුපුරෙකු කිරි අම්මාගේ හත්දවසේ දානය පැවැති දා අත්අඩංගුවට ගැනීමට ගිරිඋල්ල පොලිස් කණ්ඩායමකට හැකි වී ඇත.

කිරිඅම්මා ඝාතනය කිරීමෙන් පසු ඇගේ කරාබු දෙක ගලවාගෙන ගොස් ගිරිඋල්ල පොලිස් වසමේ උකස් කඩයකට අලෙවිකොට සැකකරු රුපියල් හත්දහසක් ලබාගෙන තිබිණි.

සිද්ධියෙන් ජීවිතක්ෂයට පත්ව තිබුණේ දඹදෙණිය කිතුලදෙණිය පදිංචි 78 හැවිරිදි හඳුන්කුට්ටි පතිරණලාගේ සොපිනෝනා නමැති කාන්තාවකි.

පොලිසිය පවසන අන්දමට අත්අඩංගුවට ගත් සැකකරු නාරං ගෙඩි කෑමට ගිජුකමක් දක්වන අයකු බව ත් ඔහු තදින් මත්ද්‍රව්‍යවලට ඇබ්බැහිව සිටි අයෙකු බව ත් වාර්තා වේ.

සැකකරු ඉකුත් 4 වන දා මෙම කිරිඅම්මාගේ නිවසට ගොස් රුපියල් 1,500ක් ඉල්ලා ඇත ත් ඇය එම ඉල්ලීම ප්‍රතික්ෂේප කර ඇත. ඒ අතරතුර සැකකරු ඇගේ වත්තේ තිබූ නාරං ගසෙන් ෂොපින් බෑගයකට නාරං ගෙඩි කඩාගෙන ඇති අතර කිරිඅම්මා ලබා දුන් බුලත් ද කා තිබේ.

ඒ අතරතුර කිරිඅම්මා නිවස තුළට යද්දී ඒ පිටුපසින් ගොස් ඇති සැකකරු ඇයට පහරදී ඇය වැටුණු පසු ඇගේ ගෙල රෙදිකඩකින් හිර කර තිබේ. ඒ වනවිට ඇය සිහිසුන්ව ඇද වැටී තිබේ. එහෙත් ඇය එකවර අතක් සොලවා ‘පුතේ…’ යනුවෙන් ඇය ආමන්ත්‍රණය කර ඇති අතර ඇය මියගොස් නැති බව දත් සැකකාර මුණුපුරා කොට්ටයකින් මුහුණ තදකොට පසුව චීත්තයකින් ගෙල සිර කර තිබේ. 

ඉන් අනතුරුව කිරිඅම්මාගේ කනේ තිබූ කරාබු දෙක ගලවාගෙන පසුව මත්ද්‍රව්‍ය පානයට ඇබ්බැහි වූ අයෙකු ලවා උකස් කොට රුපියල් හයදහසක් ලබාගෙන ඉන් රුපියල් තුන්දහසක ම මත්කුඩු පානය කර තිබේ.

සිද්ධිය සම්බන්ධයෙන් ගිරිඋල්ල පොලිසියට ලැබුණු පැමිණිල්ලක් මත විමර්ශන ඇරඹුණු අතර මරාදැමුණු කාන්තාවගේ නිවෙසේ තබූ නාරං ගෙඩි සහිත මල්ලක් ඔස්සේ නිලධාරීන් විමර්ශන අරඹා තිබේ. ඒ අනුව නාරං කෑමට රුසියෙකු වූ ඇගේ මුණුපුරා ගැන සැකයක් ඇතිකරගත් පොලිසිය ඔහු සොයද්දී ඔහු ගමෙන් පළා ගොස්  ඇති බව අනාවරණය කොටගෙන තිබේ.

පසුව රන් කරාබු දෙක උකස් කළ සැකකරුවා මාර්ගයෙන් උපාය දූතයන් සේ වෙස්වළා ගෙන ගොස් දුරකතන මාර්ග ඔස්සේ සැකකරු සමග සබඳතා පවත්වා සැකකාර මුණුපුරා කැලණි පාලමට නුදුරු ඉඟුරුකඩේ හන්දියේදී අත්අඩංගුවට ගෙන තිබේ.

සැකකරු කුලියාපිටිය මහෙස්ත්‍රාත් අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාර ගත කර තිබේ.

කුරුණෑගල දිසාව භාර නියෝජ්‍ය පොලිස්පති අනිල් ප්‍රියන්ත, කුලියාපිටිය කොට්ඨාසය භාර ජ්‍යෙෂ්ඨ පොලිස් අධිකාරි කාවින්ද පියසේකර, සහකාර පොලිස් අධිකාරි චන්න අබේරත්න, ගිරිඋල්ල පොලිස් ස්ථානාධිපති ප්‍රධාන පොලිස් පරීක්ෂක පී.ඒ. සමරකෝන් යන  මහත්වරුන්ගේ උපදෙස් මත අපරාධ විමර්ශන අංශයේ ස්ථානාධිපති පොලිස් පරීක්ෂක ටී.ආර්.පී.එස්. තෙන්නකෝන් ප්‍රමුඛ උප පොලිස් පරීක්ෂකවරුන් වන සරත්, ජයසූරිය, දිසානායක, ලයනල්, සැරයන් පුෂ්පකුමාර (33587), තෙන්නකෝන් (37981) හා කොස්තාපල්වරුන් වන ජයතිලක (49234) හා නිර්මාල් (37301)  යන නිලධාරීහු මේ පිළිබඳ විමර්ශන පැවැත්වූහ.

The post සල්ලි ඉල්ලා නොලැබුණාම කිරිඅම්මාගේ ගෙල සිරකර මරලා කරාබු දෙක ගලවාගෙන appeared first on ColomboXnews.