සන්ධානගත වනවා ද? ජවිපෙ ස්ථාවරය ගැන ලාල්කාන්ත කියයි

ස්ථිරවම සිය පක්ෂය මෙතෙක් රට පාලනය කල කිසිදු පක්ෂ සමග සන්ධානගත නොවන බව ජනතා විමුක්ති පෙරමුණේ දේශපාලන මණ්ඩල සභික කේ.ඩී. ලාල්කාන්ත මහතා පවසයි. මාධ්‍ය වෙත අදහස් දක්වමින් ඔහු සඳහන් කළේ, එම පක්ෂවල සිටින ප්‍රගතශීලි පිරිස් තම පක්ෂය සමග එකතු වීමට හැකි බව ය.

කෙසේ නමුත් එලෙස එකතු වෙන අය පිළිබඳ පරීක්ෂාවකට ලක් කිරීමෙන් පසු ඔවුන් පක්ෂයට සම්බන්ධ කර ගන්නා බව කේ.ඩී. ලාල්කාන්ත මහතා පැවසීය.

මේ පිළිබඳ වැඩිදුරට ත් අදහස් දක්වමින් ඔහු මෙසේ ප්‍රකාශ කළේ ය.

”ඒ දේශපාලන පක්ෂ පිළිබඳ තියෙන විශ්වාසය මුළුමනින් ම කඩවෙලා තමයි ජනතාව මේ වන කොට ජාතික ජන බලවේගය වටා එකතු වෙලා ඉන්නේ. එහෙම වෙලාවක ජාතික ජන බලවේගය ගිහිල්ලා ඒ පක්ෂ බදා ගත්තොත් මේ ආපු ජනතාව ආපහු හැරෙනවා. ජනතාවට යන්න දිහාවකුත් නැති වෙනවා. ජනතාව ඒකට කැමති ත් නැහැ. ජනතාව එන්නේ ඒවා අත්හැරලා නම් අපි මොකට ද ගිහිල්ලා ඒක බදා ගන්නේ. 

ඒ නිසා එක්සත් ජාතික පක්ෂය, ශ්‍රී ලංකා නිදහස් පක්ෂය, සමගි ජන බලවේගය මේ ආණ්ඩුව ඇතුළේ දැනට ඉඳලා හෙට දවසේ එලියට බහින අය ඒ කිසි ම පක්ෂයක් එක්ක සන්ධානයක් ස්ථිරව ම හදන්නේ නැහැ.

හැබැයි එම පක්ෂවල ඉන්න යම් ප්‍රගතශීලි පිරිස් එකතු වෙලා ඉන්නවා නම් ඒ අයට සම්බන්ධ වෙන්න පුළුවන් අනිවාර්යයෙන් ම අපි ඒගොල්ලොන්ට ආරාධනා කරනවා හැබැයි එන අය පිළිබඳ පරීක්ෂාවකට ලක් කිරීමෙන් තමයි සම්බන්ධ කිරීම සිද්ධ වෙන්නේ.”

The post සන්ධානගත වනවා ද? ජවිපෙ ස්ථාවරය ගැන ලාල්කාන්ත කියයි appeared first on ColomboXnews.