”විදුලිය කප්පාදු කලොත් ලොකුගේගේ, ගම්මන්පිලගේ කතාවලට නොරැවටී නීතිය හමුවට යන්න” – රංජන් ජයලාල්

විදුලිබල ඇමති ගාමිණී ලොකුගේ හා උදය ගම්මන්පිල දෙදෙනාගේ විවිධ ප්‍රකාශවලට තවදුරටත් නොරැවටී ලබන 22 දායින් පසු විදුලිය කප්පාදු කරන්නේ නම්, ජනතාව තමන්ගේ වගකීම අතට ගෙන නීතිමය මාර්ගවලට පිවිසෙන ලෙස සමස්ත ලංකා විදුලි පොදු සේවක සංගමයේ ප්‍රධාන ලේකම් රංජන් ජයලාල් අවධාරණය කළේ ය.

විදුලි බිල නියමිත දිනට පාරිභෝගිකයා විසින් ගෙවනු ලබන්නේ නම්, මෙවන් අවස්ථාවකදී ජනතාවට නීතිමය පියවර ගත හැකි බව ඒ මහතා පෙන්වා දුන්නේ ය. 

ගාමිණී ලොකුගේ පවසන පරිදි ලබන 22 වන දා තෙක් ඉන්ධන ඇති බව ත් ඉන් පසු ඉන්ධන නොලැබුණහොත් විදුලිය කප්පාදු කිරීමට සිදුවනු ඇති බව ත් එසේ වුවහොත් කොරෝනාවලින් පසු රට වසන්නට සිදු වූ ලෙසින් ම අනිවාර්යයෙන්  විදුලිය කප්පාදුවකට යාමට සිදුවුවහොත් දෙවන වතාවට ත් රට වසා දැමීමට සිදුවන බවත් ඒ මහතා ‘මව්බිම’ට පැවසීය. 

විදුලිය කප්පාදුවකට ගිය පසු සියලු ආයතන ඇනහිටින බවත් මැති ඇමතිවරුන්ගේ ප්‍රකාශ අනුව හැඟෙන්නේ ඔවුන්ට කූඹියකුට තරම්වත් මොළයක් නොතිබෙන බව ත් යැයි හැඟී යන බවත් ඔහු පැවසීය. 

විදුලිබල ඇමතිවරයා ත් පුනර්ජනනීය බලශක්ති ඇමතිවරයා ත් එකිනෙකට පරස්පර ලෙස කරන කතා ජනතාවට අදාළ නොවන බව ද ඒ මහතා අවධාරණය කළේ ය.

වත්මන් ආණ්ඩුවේ ජනාධිපතිවරයා හෝ ඇමතිවරුන්ගෙන් ජාතික ප්‍රශ්නවලදී කලින් කියූ දේවල් නොව ඊට හාත්පසින් වෙනස් දේවල් සිදු වූ බැවින් මේ යන ආකාරයට අඛණ්ඩව විදුලි කප්පාදුවක් වුවහොත් වත්මන් ආණ්ඩුවට අනිවාර්යයෙන් ම බලය පසෙක තබා ගෙදර යාමට සිදුවනු ඇති බවත් ජයලාල් මහතා කීය.

ඊට හේතුව විදුලිය රටේ ප්‍රධාන ම අත්‍යවශ්‍ය සේවාවක් වන හෙයින් විශේෂයෙන් ම ඉන්ධන ගෙනා නෞකාවලින් ඉන්ධන ගොඩබා ගත යුතු ය. එසේ කර ගැනීමට ඩොලර් නොමැති අතර නැව් ප්‍රමාද ගාස්තුව වශයෙන් පමණක් දැනට රුපියල් කෝටි හයක් රජය ගෙවා ඇති බව ත් මෙවැනි අපරාධ සිදු කරන්නේ පාලකයන්ගේ දිගින් දිගට ම තිබූ නාස්තිකාර වියදම් නොසැලකිල්ල, දූෂණ හා වංචා හේතුවෙන් බව ත් හෙතෙම වැඩිදුරට ත් පැවසීය.

අනුරාධා හේරත් – මව්බිම

The post ”විදුලිය කප්පාදු කලොත් ලොකුගේගේ, ගම්මන්පිලගේ කතාවලට නොරැවටී නීතිය හමුවට යන්න” – රංජන් ජයලාල් appeared first on ColomboXnews.