රාජකුමාරිගේ මරණය: වැලිකඩ වැඩබලන ස්ථානාධිපතිවරයාව සිටි උපපොලිස් පරීක්ෂකවරයා රිමාන්ඩ්

රන් භාණ්ඩ සොරකමක් සම්බන්ධයෙන් වැලිකඩ පොලිසිය මගින් අත්අඩංගුවට ගෙන සිටි රාජකුමාරි නමැති මෙහෙකාර කාන්තාවට මොට ආයුධයකින් පහර දී ඝාතනය කළ බව කියන සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව මගින් අත්අඩංගුවට ගත් එම පොලිසියේ වැඩබලන ස්ථානාධිපතිවරයාව සිටි උපපොලිස් පරීක්ෂකවරයෙකු සැප්තැම්බර් මස 11 දින දක්වා රක්ෂිත බන්ධනාගාරගත කරන ලෙස කොළඹ අතිරේක මහේස්ත්‍රාත් හර්ෂණ කැකුණවල ඊයේ (අගෝ. 29) නියෝග කළේ ය.

අජිත් කුමාර නමැති උපපොලිස් පරීක්ෂකවරයෙක් එසේ රක්ෂිත බන්ධනාගාරගත කෙරිණි.

අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරී මෙරිල් රන්ජන් ළමාහේවා සැකකාර පොලිස් පරීක්ෂකවරයා අධිකරණයට ඉදිරිපත් කරමින් කියා සිටියේ, මෙම උපපොලිස් පරික්ෂකවරයා වැඩබලන ස්ථානාධිපතිවරයාව සිටි දිනයේදී මෙම පහර දීම සිදුව ඇති බව මේ සම්බන්ධයෙන් සිදුකළ විමර්ශනවලදී හෙළිව ඇති බව ය.

එම මෙහෙකාර කාන්තාව පාරේ වැටී සිටියදී රෝහල්ගත කළ බවට පොලිසිය අධිකරණයට කරුණු වාර්තා කර තිබූ නමුත් එම මෙහෙකාර කාන්තාවට පොලිසිය තුළදී මොට ආයුධයකින් සිදු කළ පහර දීමක් හේතුවෙන් රෝහල්ගත කිරීමෙන් අනතුරුව මියගොස් ඇති බවට අධිකරණ වෛද්‍ය නිලධාරිවරයා සිය වාර්තාව මගින් පෙන්වා දී ඇති බව මෙරිල් රන්ජන් ළමාහේවා අධිකරණයට දැන්වීය.

මෙම උපපොලිස් පරීක්ෂකවරයා වැඩබලන ස්ථානාධිපතිවරයා වශයෙන් රාජකාරියේ යෙදී සිටි දිනයකදී මෙම පහර දීම සිදුව ඇති බව ත් මේ සම්බන්ධයෙන් තවත් පොලිස් නිලධාරීන් සිව් දෙනෙකු සැකකරුවන් වශයෙන් හඳුනාගෙන ඇති බව ද සහකාර පොලිස් අධිකාරීවරයා අධිකරණයට පැවසීය.

මෙම සිද්ධිය සම්බන්ධයෙන් විමර්ශනයෙන් හඳුනාගත් තොරතුරු වැඩිදුර වාර්තාවක් මගින් අධිකරණයට ඉදිරිපත් කර ඇති බව ත් මීට අදාළ සියලු ම සැකකරුවන් තරාතිරම නොබලා අත්අඩංගුවට ගැනීමට පියවර ගෙන ඇති බව ද සහකාර පොලිස් අධිකාරිවරයා අධිකරණයට දැන්වීය.

උපපොලිස් පරීක්ෂකවරයා පොලිසියේ භාරකාරවරයාව සිටියදී මෙවැනි සිද්ධියක් සිදුවීම සම්බන්ධයෙන් ඔහු වගකිව යුතුව ඇති බව ත් මේ පිළිබඳව පොලිස් කණ්ඩායම් තුනක් යටතේ තවදුරටත් විමර්ශන සිදුකරන බව ත් ඔහු ප්‍රකාශ කළේ ය.

මෙහිදී සැකකාර උපපොලිස් පරික්ෂකවරයා වෙනුවෙන් පෙනී සිටි රන්ජන් තිලකරත්න හා සාරතී දිසානායක යන නීතීඥවරුන් අධිකරණය හමුවේ කියා සිටියේ, වැලිකඩ පොලිසියේ ස්ථානාධිපතිවරයා වෙනත් රාජකාරි කටයුත්තක් සඳහා පොලිසියෙන් පිටත්ව ගොස් සිටි නිසා උපපොලිස් පරීක්ෂකවරයා එදින වැඩබලන ස්ථානාධිපතිවරයා වශයෙන් කටයුතු කර ඇති නමුත් ඔහු පොලිසියේ වෙනත් අංශයක් භාරව කටයුතු කරන අයෙකු බව ත් ය.

එම නිසා මෙම උපපොලිස් පරීක්ෂකවරයා මෙම සිද්ධියට අදාළ අයෙකු නොවන බැවින් ඔහුව ඇප මත මුදා හරින ලෙස ද සැකකරු වෙනුවෙන් පෙනී සිටි නීතිඥවරු අධිකරණයෙන් ඉල්ලා සිටියහ.

සිද්ධිය සම්බන්ධයෙන් දෙපාර්ශවය දැක් වූ කරුණු සම්බන්ධයෙන් අවධානය යොමු කළ මහේස්ත්‍රාත්වරයා සැකකරු ලබන එකොළොස් වන දින දක්වා රක්ෂිත බන්ධනාගාරගත කළ අතර සිද්ධිය සම්බන්ධයෙන් පූර්ණ සාක්ෂි සම්පින්ඩණ වාර්තාවක් අධිකරණයට ඉදිරිපත් කරන ලෙස ද අපරාධ පරීක්ෂණ දෙපාර්තමේන්තුවට නියෝග කළේ ය.

තව ද සැකකාර පුද්ගලයා මැගසින් බන්ධනාගාරයේ රඳවා තබන ලෙස ද බන්ධනාගාර අධිකාරිවරයාට නියෝග කළේ ය.

රාජකුමාරි නමැති මෙහෙකාර කාන්තාවට මොට ආයුධයකින් පහර දීම හේතුවෙන් ඇගේ මරණය සිදුව ඇති බවට පශ්චාත් මරණ පරීක්ෂණ වාර්තාවෙන් හෙළි වී ඇති බැවින් එම සිද්ධියට සම්බන්ධ පොලිස් නිලධාරීන් ඇතුළු සියලු සැකකරුවන් වහා ම අත්අඩංගුවට ගෙන අධිකරණයට ඉදිරිපත් කරන ලෙස කොළඹ අතිරේක මහේස්ත්‍රාත් හර්ෂණ කැකුණවෙල ඉකුත් (අගෝ. 25) අපරාධ පරීක්ෂණ දෙපාර්තමේන්තුවට කළ නියෝගයක් අනුව සැකකාර උපපොලිස් පරීක්ෂකවරයා අත්අඩංගුවට ගෙන ඊයේ අධිකරණයට ඉදිරිපත් කර තිබිණි.

රාජකුමාරි නමැති කාන්තාව බොරැල්ල ප්‍රදේශයේ පදිංචි නෙත්තිකුමාර නමැති කාන්තාවකගේ නිවසේ මෙහෙකාරියක් ලෙස සේවය කරමින් සිට ඇති බව ත් එම නිවසේ තිබූ රන් භාණ්ඩ කීපයක් නැතිවූ බවට නිවසේ හිමිකාරිය වන නෙත්තිකුමාර වැලිකඩ පොලිසිය වෙත කර තිබූ පැමිණිල්ලක් අනුව වැලිකඩ පොලිසිය මගින් රාජකුමාරි නමැති කාන්තාව ඉකුත් මැයි මස 11 වන දින සැකපිට අත්අඩංගුවට ගෙන ඇති බව ත් අපරාධ පරීක්ෂණ දෙපාර්තමේන්තුව අධිකරණය වෙත දන්වා තිබිණි.

එසේ අත්අඩංගුවට ගෙන පොලිසිය වෙත රැගෙන ගිය රාජකුමාරි නමැති කාන්තාවට පොලිසිය තුළදී සිදු කළ පහරදීම් හේතුවෙන් රෝගාතුර වී ඊට පසු දින ඇයව කොළඹ ජාතික රෝහලට ඇතුළත් කර ඇති බව ත් එහිදී ඇය ජීවිතක්ෂයට පත්ව ඇති බවට තොරතුරු හෙළි වී ඇති බව ත් එම දෙපාර්තමේන්තුව මෙම නඩුව අධිකරණය හමුවේ ගොනු කරමින් කරුණු දක්වා තිබිණි.

එම නිවසේ ආරක්ෂාවට යොදවා සිටි පෞද්ගලික ආරක්ෂක නිලධාරි අජිත් විජේසිංහ නමැති අය මෙන් ම රාජකුමාරිගේ සැමියා වන ජේසුදාසන් හා ඇයව බොරැල්ල ප්‍රදේශයේ නිවසේ මෙහෙකාර සේවය සඳහා රැගෙන ආ බව කියන මහේන්ද්‍රන් සුරේෂ් යන පුද්ගලයන් ද සිද්ධිය සම්බන්ධයෙන් අධිකරණයට සාක්ෂි ලබා දී තිබිණි.

අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරි මෙරිල් රන්ජන් ළමාහේවාගේ අධීක්ෂණය මත ප්‍රධාන පොලිස් පරීක්ෂක මාධව ගුණවර්ධන යන නිලධාරීහු පැමිණිල්ල මෙහෙයවූහ.

The post රාජකුමාරිගේ මරණය: වැලිකඩ වැඩබලන ස්ථානාධිපතිවරයාව සිටි උපපොලිස් පරීක්ෂකවරයා රිමාන්ඩ් appeared first on ColomboXnews.