බේරූට් අගනුවර සිදු වූ පිපිරීමෙන් තුවාල ලැබූ ශ්‍රී ලාංකිකයන් සංඛ්‍යාව 10 දක්වා ඉහළ ගොස් ඇති බව ලෙබනනයේ සිටින ශ්‍රී ලාංකික තානාපතිනිය පවසයි. “දැනට දැන ගැනීමට ඇති පරිදි මොවුන්ගේ තත්ත්වය බරපතල නෑ,” යනුවෙන් තානාපතිනි ශානි කරුණාරත්න කියා සිටියාය.
තවදුරටත් තොරතුරු ලැබෙමින් පවතින බැවින් ඒ සම්බන්ධයෙන් සම්පූර්ණ වාර්තාවක් ලබා දීමේ හැකියාවක් නොමැති බව ඇය වැඩිදුරටත් සඳහන් කළාය.
පිපිරීම හේතුවෙන් එහි සිටින ශ්‍රී ලාංකිකයන් දෙදෙනෙකු තුවාල ලබා ඇති බව මීට ඉහතදී වාර්තා විය.
පිපිරීම සම්බන්ධයෙන් සිදු කෙරෙන විමර්ශන යටතේ බේරුට් වරාය බලධාරීන් ගණනාවක් නිවාස අඩස්සියට පත් කරන ලද බව ලෙබනන් ආණ්ඩුව බදාදා නිවේදනය කළේය.
ඒ සඳහා වගකිවයුතු යයි හඳුනා ගනු ලබන පුද්ගලයන් “උපරිම දඬුවමකට” මුහුණ දෙනු ඇතැයි එරට උත්තරීතර ආරක්ෂක කවුන්සිලය අවධාරණය කර තිබේ.
පිපිරීම හේතුවෙන් අවම වශයෙන් 137 දෙනෙකුවත් මරණයට පත්ව ඇති අතර තුවාල ලබා ඇති සංඛ්‍යාව 5,000 කට ආසන්නය. තවත් ගණනාවක් පිළිබඳ තවමත් තොරතුරක් නොමැත. මේ වන විට එහි සති දෙකක හදිසි තත්ත්වයක් ප්‍රකාශයට පත් කර තිබේ.
The post බේරූට් අගනුවර සිදු වූ පිපිරීමෙන් තුවාල ලැබූ ශ්‍රී ලාංකිකයන් සංඛ්‍යාව 10 දක්වා ඉහළට appeared first on ColomboXnews.
Source From Colomboxnews
Author: Kamal Dhammika
#SriLanka #News #lka