බන්ධනාගාර නිලධාරීන් අවම බලය පාවිච්චි කළා… රෝහල්ගත කිරීමේදී රැදවියා මියගියා – බන්ධනාගාර කොමසාරිස් (පාලන)

මොණරාගල බන්ධනාගාරයේ රැඳවියන් අතර ඇතිවී නොසන්සුන්තාවයක් පාලනය කිරීමේදී බන්ධනාගාර නිලධාරීන් අවම බලය පාවිච්චි කර සැකකරුවකු බන්ධනාගාර රෝහලට ඇතුලත් කළ බවත් පසුව ඔහුව මොණරාගල රජයේ රෝහලකට ඇතුළත් කරන අවස්ථාවේදී ඔහු මියගිය බවත් බන්ධනාගාර කොමසාරිස් (පාලන ) චන්දන ඒකනායක මහතා පවසයි. 

“ගලකින් පහරදීම නිසා බන්ධනාගාර නිලධාරියාගේ අතට බරපතළ තුවාල සිදුවී ඔහු වහාම කිරිගල රෝහලට ඇතුළත් කරලා තියෙනවා. 

මෙම සැකකරුවා දිගින් දිගටම කළහකාරී ලෙස හැසිරීම නිසා නිලධාරීන් විසින් අවම බලය පාවිච්චි කරලා බන්ධනාගාර රෝහලට ඇතුළත් කරලා ඉන්පසුව බන්ධනාගාර වෛද්‍යවරයාගේ උපදෙස් මත සැකකරු මොණරාගල කිරිගල රෝහලට ඇතුළත් කරලා තියෙනවා. ඒ අවස්ථාවේ සැකකරු මියගිහින් තියෙනවා. 

බන්ධනාගාර නිලධාරීන් විසින් මීට සම්බන්ධ අවස්ථා ගණනාවකදීම මෙම සැකකරු බන්ධනාගාරගත වූ හැම අවස්ථාවකදීම මේ වගේ ආයතනයේ පරිපාලන කටයුතුවලට සහ හැසිරීම් වලට තිබ්බ නොසන්සුන්තාවයන් මත ඒ කියන්නෙ ඔහුගේ විනය විරෝධී හේතු මත බන්ධනාගාර විනිශ්චය මණ්ඩලය වෙත පමුණුවා ඔහුට දඬුවම් ලබාදීලා තියෙනවා. 

මේ සම්බන්ධව මොණරාගල පොලිසිය විසින් පරීක්ෂණයක් පවත්වනවා, ඒ වගේම බන්ධනාගාර දෙපාර්තමේන්තුවේ බදුල්ල අධිකාරීවරයා මේ සම්බන්ධයෙන් පරීක්ෂණයක් පවත්වන්න පත් කරලා තියෙනවා” යනුවෙනුයි ඒ මහතා සඳහන් කළේ. 

කෙසේවෙතත් සිරකරු අයිතිවාසිකම් සුරැකීමේ කමිටුවේ ලේකම් සුදේශ් නන්දිමාල් මහතා පැවසුවේ බහින්බස් වීමේ සිද්ධියක් දුරදිග ගිය පසුව පෞද්ගලික කෝන්තරයක් මත බන්ධනාගාර නියාමකවරයකු සහ ජේලර්වරයකු එකතු වී අදාළ රැඳවියාට ඉතාම අමානුෂික ලෙස පහරදී ඝාතනය කර ඇති බවයි. 

විවිධාකාරයෙන් සැකකරුවන් ඝාතනය කිරීමේ රැල්ලක් පසුගිය කාලය තුළ ශ්‍රී ලංකා පොලිසිය විසින් ආරම්භ කර තිබෙනු පැහැදිලිවම දක්නට තිබුණු අතර දැන් ඊට බන්ධනාගාර දෙපාර්තමේන්තුවත් එකතු වී ඇති බව පෙනේ. සමස්තයක් ලෙස මේවායින් පෙන්නුම් කෙරෙන්නේ රටේ නීතියෙහි ආධිපත්‍යයේ සහ පාලනයේ බිඳවැටීමකි. මෙය කිසිසේත්ම රටකට හිතකර තත්වයක් නොවන බව අමුතුවෙන් කිවයුතු නැත. 

(LNW)

The post බන්ධනාගාර නිලධාරීන් අවම බලය පාවිච්චි කළා… රෝහල්ගත කිරීමේදී රැදවියා මියගියා – බන්ධනාගාර කොමසාරිස් (පාලන) appeared first on ColomboXnews.