පොහොර තහනම් කර වී, එළවලු, පළතුරු පිටරටින් ගෙන්නනවා – මහින්දානන්ද

රසායනික පොහොර නොමැති වීමෙන් වී, එළවළු, පළතුරු නිෂ්පාදනය පහළ වැටුණු විට ඒවා පිටරටින් ආනයනය කිරීමට පියවර ගන්නා බව කෘෂිකර්ම අමාත්‍ය මහින්දානන්ද අලුත්ගමගේ මහතා පවසයි. ඇමති මහින්දානන්ද අලුත්ගමගේ මහතා මේ බව පැවසුවේ ඊයේ (30) කෘෂිකර්ම අමාත්‍යාංශයේ පැවති විශේෂ මාධ්‍ය හමුවක් අමතමිනි.

“අපි මේ යල කන්නයට අවශ්‍ය පොහොර ටික දැන් ගෙන්නලා ඉවරයි. අපිට මේකට මුහුණදෙන්න වෙන්නෙ ඊළඟ මහ කන්නයේ. ඊළඟ මහ කන්නයේ ඉඳලා තමයි අපි ගොවියාට පොහොර දෙන්නෙ කොහොමද කියලා තීරණය කරන්නෙ. අපි රසායනික පොහොර ආනයනය කරන්නෙත් නෑ ගොවියාට පොහොර හිඟයක් ඇතිවෙන්න දෙන්නෙත් නෑ කියන සහතිකය අපි මේ රටේ ගොවි ජනතාවට ලබාදෙනවා. ඔබ මේ පරිවර්තනයට යෑමේදී ඔබට යම් අසාධාරණයක් සිදුවුණොත් රජය හැටියට ඒ සඳහා ඔබට වෙන පාඩුවට වන්දිය ගෙවන්න අපි සූදානම්. ඔබ මතක තියාගන්න කාබනික පොහොරවලින් පමණක් කෘෂිකර්මාන්තයේ යෙදෙන ලෝකයේ එකම දූපත බවට ශ්‍රී ලංකාව පත්වෙනවා. අපි රසායනික පොහොරවලට දීපු සහනාධාරය දෙනවා කාබනික පොහොර එකට” යනුවෙනුයි ඒ මහතා සඳහන් කළේ. 

කෘමිනාශකත් තහනම් කෙරෙන්නේ මහ කන්නයේ සිටදැයි කළ විමසීමකට පිළිතුරු දෙමින් ඒ මහතා පැවසුවේ “දැනට ආනයනය කරලා තියෙන කිසිවක් නවත්තන්න තහනම් කරන්න බෑ අපට. ආනයනය නවත්තලා තියෙන්නෙ. එනිසා මින් ඉදිරියට ආනයනය කරන්න බෑ, රටේ ගෙන්නපු නිෂ්පාදන ටික තියෙනවා” යනුවෙනි. 

වී සහ එළවලු පළතුරු නිෂ්පාදනය පහළ වැටුණොත් ඒවා පිටරටින් ආනයනය කරන බවත් ඒ මහතා පැවසුවේය. “ආනයනය කරනවා, ආනයනය කරනවා ! මිනිස්සු මරණවාද කන්නයක් දෙකක් රටින්හරි ගෙනල්ලා කන්න දෙනවද ?” යනුවෙන් ඒ මහතා එහිදී ප්‍රකාශ කළේය. 

The post පොහොර තහනම් කර වී, එළවලු, පළතුරු පිටරටින් ගෙන්නනවා – මහින්දානන්ද appeared first on ColomboXnews.