ජනතාව පුද්ගලිකව තමන්ගේ ආරක්ෂාව සලසාගෙන කොරෝනා රෝගයෙන් බේරී සිටිය යුතුයි ! – ජනාධිපති ගෝඨාභය රාජපක්ෂ

මෙරට කොවිඩ් වෛරස් ව්‍යාප්තිය රජය විසින් සාර්ථකව පාලනය කර තිබියදී මාධ්‍ය සහ ජනතාව සියල්ල අමතක කිරීම සහ වගකීම් පැහැර හැරීම නිසා දෙවැනි රැල්ලක් ඇතිවූ බවත්  බවත් එම නිසා ජනතාව තමන්ගෙ ආරක්ෂාව තමන් විසින් පුද්ගලිකව සලසාගෙන ගෙන කොවිඩ් 19 රෝගයට ගොදුරු නොවී සිටිය යුතු බවත් ජනාධිපති ගෝඨාභය රාජපක්ෂ මහතා අවධාරණය කරයි. 

ජනාධිපති ගෝඨාභය රාජපක්ෂ මහතා මේ බව ප්‍රකාශ කර තිබුණේ ඊයේ (09) පැවති දෛනික කොවිඩ්  මර්දන කාර්ය සාධක බලකායේ රැස්වීමේදීය. 

ජනාධිපතිවරයාගේ නිල ෆේස්බුක් පිටුවෙහි තබා ඇති සටහන පහතින් දැක්වේ. 

——————————————————————————-

මෙරට සෞඛ්‍ය සේවයට ඉතා පහසුවෙන් කොවිඩ් මර්දනය කළ හැකි බවත්, අවශ්‍ය වන්නේ ජනතා සහය බවත්, ජනාධිපති කාර්යාලයේ දී දෛනිකව හමුවන කොවිඩ් මර්දන කාර්ය සාධක බලකාය අද (09) පෙරවරුවේ රැස් වූ අවස්ථාවේ දී මා පැවසුවෙමි. 

කොවිඩ් වසංගතය “සෞඛ්‍ය” ගැටළුවකි. ඉන් ජනතාව රැකගෙන රට ඉදිරියට ගෙන යාම සෞඛ්‍ය සේවාව සහ රජය සතු වගකීමයි. ලොව ඉහළම දැනුමකින් සමන්විත මෙරට වෛද්‍යවරුන්ට සහ සෞඛ්‍ය ක්ෂේත්‍රයට එය කළහැකි බව මා දැඩි ලෙස විශ්වාස කරමි. 

වසංගත ව්‍යාප්තිය හමුවේ අපට ගත හැකි විකල්ප 03කි. ඒවානම් ඇඳිරි නීතිය පනවා රටම ලොක් ඩවුන් කිරීම, කිසිවක් නොකර සිටීම හා රෝගය පාලනය කරන අතර, රට සාමන්‍ය පරිදි පවත්වාගෙන යාම වේ. මේවයින් අප තෝරාගත්තේ තුන්වැනි විකල්පයය. 

කොවිඩ් රෝගීන් හඳුනාගෙන නිසි ප්‍රතිකාර දෙමින් පළමු අදියරේදීම සුවපත් කිරීමට වෛද්‍යවරුන්ට සහ කාර්ය මණ්ඩලයට හැකි වී තිබේ. එබැවින් දැඩි සත්කාර සේවා අවශ්‍ය නොවීය. රෝග ව්‍යාප්තිය මර්දනයට සහ අසාදනය වීමෙන් වැළකී සිටීමට ජනතාව ද නොමඳව සහය විය යුතුය. ඒ සඳහා අනුගමනය කළ යුතු සෞඛ්‍ය උපදෙස් වෛද්‍යවරුන් මගින් ජනතාව ගෙන යාම මාධ්‍ය ක්ෂේත්‍රයේ විශාල වගකීමක් සහ යුතුකමක් වේ. 

කොවිඩ් සතුටුදායක ලෙස පාලනය කළ පසු මාධ්‍ය මෙන්ම ජනතාව ද සියල්ල අමතක කිරීම සහ වගකීම පැහැර හැරීම වත්මන් තත්ත්වයට හේතු විය. වසංගතය ලොවෙන් තුරන් කරන තෙක් රට වසාගෙන සිටිය නොහැක. යථා තත්ත්වය අවබෝධ කරගෙන ක්‍රියා කළයුතුය. දින 40කට ආසන්න කාලයක් වසා දැමුණු ප්‍රදේශවලින් ද දෛනිකව ආසාදිතයන් වාර්තා වේ. ඉන් පෙනී යන්නේ වසා දැමීමෙන් පමණක් වසංගතය මර්දනය කළ නොහැකි බවයි. පහසුම දේ රට වසා දැමීමයි. නමුත් මිනිසුන් ජීවත් කළයුතුය. රැකියා කෘෂි, ධීවර ඇතුළු සියලු කටයුතුවල නිරත වෙමින් ආර්ථිකය ආරක්ෂා කිරීම මගේ වගකීමක්. PCR පරීක්ෂණ සඳහා රජය දිනකට වැය කරන මුදල රුපියල් මිලියන 60කට අධිකය. නිරෝධායනය ඇතුළු සමස්ත ක්‍රියාවලිය සඳහා දෛනිකව අතිවිශාල මුදලක් වැය කෙරේ. ජනතාව මේ තත්ත්වය අවබෝධ කරගෙන රෝගයට ගොදුරු වීමෙන් වැළකී සිටීමට පුද්ගලිකව වගකීම ගැනීම සැමගේ යුතුකමකි. 

ඇමතිණි පවිත්‍රා වන්නිආරච්චි, අමාත්‍ය කෙහෙළිය රඹුක්වැල්ල, පාර්ලිමේන්තු මන්ත්‍රී මධුර විතානගේ, ජනාධිපති ලේකම් පී.බී. ජයසුන්දර, ජනාධිපති ප්‍රධාන උපදේශක ලලිත් වීරතුංග යන මහත්වරු සහ කොවිඩ් කාර්ය සාධක බලකායේ සාමාජිකයෝ සාකච්ඡාවට එක්ව සිටියහ.

The post ජනතාව පුද්ගලිකව තමන්ගේ ආරක්ෂාව සලසාගෙන කොරෝනා රෝගයෙන් බේරී සිටිය යුතුයි ! – ජනාධිපති ගෝඨාභය රාජපක්ෂ appeared first on ColomboXnews.