කොළඹ වරායේ බටහිර පර්යන්තය ඉන්දියාවේ අදානි සමාගමට ලබාදෙයි (වීඩියෝ)

කොළඹ වරායේ බටහිර බහාලුම් පර්යන්තය ඉන්දියාවේ අදානි සමාගම සමග එක්ව රාජ්‍ය-පෞද්ගලික ව්‍යාපාරයක් ලෙස ක්‍රියාත්මක කිරීම සඳහා කැබිනට් මණ්ඩලයේ අනුමැතිය හිමිව තිබෙනවා. ඊයේ පැවති කැබිනට් මණ්ඩල රැස්වීම සඳහා ඊට අදාල කැබිනට් පත්‍රිකාව ඉදිරිපත්ව තිබේ.

ඒ අනුව වසර 35 ක කාලයක් සංවර්ධනය කර ක්‍රියාත්මක කර ආපසු ශ්‍රී ලංකා රජයට බාරදීමේ පදනම යටතේ මෙම ව්‍යාපෘතිය ක්‍රියාත්මක වනු ඇත.

බටහිර පර්යන්තය සඳහා සුදුසු ආයෝජකයෙකු ‍නම් කරන්නැයි රජය ඉන්දීය මහ කොමසාරිස් කාර්යාලය ‍වෙත සහ ජපාන තානාපති කාර්යාලය වෙත දැනුම් දී තිබිණි. ඒ අනුව ඉන්දියාව විසින් ඒ සඳහා අදානි සමාගම යෝජනා කර ඇති අතර ජපාන රජය කිසිදු ආයෝජකයෙකු නම්කර නොමැත.

දැනට ඉදිවෙමින් පවතින නැගෙනහිර පර්යන්තයේ 49% ක කොටස් අදානි සමාගමට සහ ජපාන සමාගමකට පැවරීමට සූදානම් වූ නමුත් එල්ල වූ විරෝධය හමුවේ එය නතර කිරීමට ආණ්ඩුවට සිදුවිය. ඒ වෙනුවට බටහිර පර්යන්තය ඉන්දියාවේ අදානි සමාගමට පැවරීමට යෝජනා ඉදිරිපත් කෙරිණි.

The post කොළඹ වරායේ බටහිර පර්යන්තය ඉන්දියාවේ අදානි සමාගමට ලබාදෙයි (වීඩියෝ) appeared first on ColomboXnews.