ආණ්ඩුවෙන් පොහොර සහනාධාරය කැපීමේ සැලැස්මක්..

වී වගා කරන සෑම ඉඩම් හෙක්ටයාරයකින්ම වී කිලෝ 1000 ක් රජයට අලෙවි නොකරන්නේ නම් එම ගොවීන්ට පොහොර සහනාධාරය අහිමි වන බව කෘෂිකර්ම අමාත්‍ය මහින්දානන්ද අළුත්ගමගේ මහතා පවසනවා.

එපමණක් නොව එම ගොවීන්ට කෘෂි රක්ෂණයද අහිමි වන බවයි ඇමතිවරයා පවසන්නේ. ගොවීන් අවම වශයෙන් හෙක්ටයාරයකට කිලෝ 1000 ක් හෝ ආණ්ඩුවට අලෙවි කළයුතු බවත් එසේ නොහැකි නම් ඊළඟ කන්නයේ සිට ඔවුන්ට වෙළඳපොලේ පවතින සාමාන්‍ය මිලට පොහොර මිලදී ගැනීමට සිදුවන බවත් කෘෂිකර්ම ඇමතිවරයා පවසනවා.

කෙසේ වෙතත් ගොවීන් පවසන්නේ ආණ්ඩුවේ වී මිලදී ගැනීමේ වැඩපිලිවෙලට අනුව ඔවුන් ඉල්ලන එම කොන්දේසි යටතේ වී ලබාදීම අපහසු බවයි. විශේෂයෙන් තෙතමනය 14%ක් සලකා බලන නිසා වී වේලාගැනීමට අවශ්‍ය පහසුකම් නොමැතිවීම බරපතල ගැටළුවන් බව ඔවුන් පවසයි.

එමෙන්ම අක්කර දෙක හමාරක් හෙවත් වී බුසල් 05ක් වන එකම කුඹුර පවුලේ කීහිපදෙනෙකු අතර මේ වනවිට බෙදී ගොස් ඇති බවත් සමහර ගොවීන් අස්වැන්න නෙලා ගන්නේ අලෙවිය සදහාම නොව තම නිවසේ පරිභෝජනය සදහා වීමද තවත් ගැටළුවකි.

මීට අමතරව ආණ්ඩුව මේ වනවිටද අවශ්‍ය සම්පුර්ණ පොහොර ප්‍රමාණය ලබානොදෙන අතර මඩ පොහොර හෙවත් කැට පොහොර ලැබෙන්නේ කිලෝ 25ක් වැනි සුළු ප්‍රමානයකි. ආණ්ඩුව මේ සැරසෙන්නේ එම ප්‍රමාණය පවා ගොවියට අහිමිකිරීමේ සැලැස්මක් බව බොහෝ ගොවීන් පවසයි.

The post ආණ්ඩුවෙන් පොහොර සහනාධාරය කැපීමේ සැලැස්මක්.. appeared first on ColomboXnews.