රජයේ සහ අනුමත පෞද්ගලික පාසල් සඳහා මෙවර අගෝස්තු මාසයේදී නිවාඩු ලබා නොදෙන බව අධ්‍යාපන අමාත්‍ය සුසිල් ප්‍රේමජයන්ත පවසයි. ඒ අනුව, නොවැම්බර් මාසයේ අවසානය දක්වා පාසල් අඛණ්ඩව පැවැත්වෙන බව අමාත්‍යවරයා පැවසීය.
එමෙන් ම, දැනට ක්‍රියාත්මක සතියකට දින 3ක් පමණක් පාසල් පැවැත්වීමේ ක්‍රමවේදය නුදුරේදී ම ඉවත් කිරීමට කටයුතු කරන බව ද අමාත්‍යවරයා ප්‍රකාශ කළේ ය.
ඔහු මේ බව ප්‍රකාශ කළේ, අධ්‍යාපන අමාත්‍යංශයේ අද (ජූලි 29) පැවති සාකච්ඡාවකදී ය.
මේ අතර, මෙවර උසස් පෙළ විභාගයට පෙනී සිටින සිසුන් වෙනුවෙන් ප්‍රධාන විෂයන් 24ක් සඳහා පළාත් අන්තර් සම්බන්ධීකරණයක් සහිතව විශ්වවිද්‍යාල පද්ධතිය මගින් පුහුණු සැසි පවත්වන අතර, පසුගිය දෙවසරක කාලය තුළ රට තුළ පැවති කොරෝනා තත්ත්වය සහ පවතින අර්බුදකාරී වාතාවරණය හේතුවෙන් නිසියාකාරව අධ්‍යාපන කටයුතු කරගත නොහැකිවූ දරුවන් ඉලක්ක කරගෙන මෙම වැඩපිළිවෙළ ක්‍රියාත්මක වන බව අමාත්‍ය සුසිල් ප්‍රේමජයන්ත පැවසීය.
ඒ අනුව, සැකසෙන මූලික පොදු පසුබිමක් යටතේ සැප්තැම්බර් මස මුල සිට පන්ති කාමර තුළ කණ්ඩායම් ක්‍රමයකට අනුව ප්‍රශ්නෝත්තර සහිත අතිරේක ඉගැන්වීම් මගින් විභාගයට සිසුන් සූදානම් කිරීමට ගුරුවරුන්ට හැකියාව ලැබෙනු ඇත.
ප්‍රමාද වූ 5 ශ්‍රේණිය ශිෂ්‍යත්ව විභාගය නොවැම්බර් මස 27 වන දා පැවැත්වීමෙන් පසු උසස් පෙළ විභාගය ද නොවැම්බර් 28 සිට දෙසැම්බර් 23 දක්වා කාලය තුළ පැවැත්වීමට ත් ඒ අනුව ලබන සඳුදා සිට නිවාඩු නොමැති ව නොවැම්බර් මස අග වන තෙක් පාසල් පවත්වමින් අතපසු වූ අධ්‍යයන කටයුතු ආවරණය කිරීමට සැලසුම් කර තිබේ.
එමෙන් ම 1 සහ 2 ශ්‍රේණිවල ප්‍රාථමික අධ්‍යාපනය අහිමිව 3 රේණියට පිවිසෙන දරුවන්ගේ පවත්නා සාධනීය මට්ටම් හඳුනා ගැනීමට විද්‍යාත්මක ක්‍රමවේද ඔස්සේ මේ වන විටත් සමීක්ෂණ සිදු කර ඇති අතර එම වාර්තා මත පදනම් ව එම සිසුන්ගේ ඉදිරි අධ්‍යාපන කටයුතු සැලසුම් කරන බව ද අමත්‍යවරයා පැවසීය.
මෙහිදී පාසල් ප්‍රවාහනය සම්බන්ධයෙන් ද අදහස් දැක්වූ අමාත්‍යවරයා, ‘සිසුසැරියට‘ අමතර ව ‘පාසල් සේවය‘ නමින් පාසල් ළමුන් ප්‍රවාහනය සඳහා පෞද්ගලික බස් රථ යොදා ගනිමින් බස් රථසේවයක් ලබන සඳුදා වන විට දීපව්‍යාප්තව ධාවනයේ යෙදවීමට අපේක්ෂා කරන බව සඳහන් කළේ ය.
The post ආගෝස්තු පාසල් නිවාඩුව අවලංගුයි appeared first on ColomboXnews.
Source From Colomboxnews
Author: Kamal Dhammika
#SriLanka #News #lka