ශෂී වීරවංශගේ ඇප ඉල්ලීම සලකා බැලීමට දින නියම වෙයි

සිර දඬුවම් නියම වී සිටින ශෂී වීරවංශ මහත්මිය ඇප මත මුදා හරින ලෙස ඉල්ලා ඇයගේ නීතිඥවරුන් විසින් ගොනුකර තිබෙන ඇප ඉල්ලීම හෙට (මැයි 31) දින සලකා බැලීම සඳහා කොළඹ මහෙස්ත්‍රාත් අධිකරණය දින නියම කර තිබේ.

මෙම ඉල්ලීම සම්බන්ධයෙන් සිය ස්ථාවරය පැහැදිලි කරන ලෙස දන්වමින් කොළඹ ප්‍රධාන මහෙස්ත්‍රාත් අමරසිංහ මහතා විසින් නීතිපතිවරයා වෙත නොතීසි ද නිකුත් කර ඇත.

අවිධිමත් රාජතාන්ත්‍රික විදේශ ගමන් බලපත්‍රය සන්තකයේ තබා ගැනීමේ චෝදනාවට වරදකාරිය කෙරුණු ශෂී වීරවංශ මහත්මියට සිකුරාදා (මැයි 27) කොළඹ මහෙස්ත්‍රාත් අධිකරණය මගින් වසර දෙකක බරපතළ සිරදඬුවම් හා රුපියල් ලක්ෂයක දඩයක් නියම කළේ ය.

ඒ අනුව, ඊට එරෙහිව ශෂී වීරවංශ මහත්මියගේ නීතිඥවරු විසින් ඉකුත් සිකුරාදා අභියාචනයක් ඉදිරිපත් කරනු ලැබීය.

අදාළ අභියාචනය විභාග කොට අවසන් තීන්දුවක් ප්‍රකාශයට පත්කරන තුරු ශෂී වීරවංශ මහත්මිය ඇප මත මුදා හරින ලෙස ඉල්ලමින් ඇයගේ නීතිඥවරුන් විසින් එම ඇප ඉල්ලීම ඉදිරිපත් කරනු ලැබ තිබිණි.

එම අභියාචනා දැන්වීම සලකා බැලීම සඳහා අද (මැයි 30) කැඳවීමට කොළඹ අතිරේක මහේස්ත්‍රාත් හර්ෂණ කැකුණවල මහතා නියම කර තිබිණි.