වෛරසය පෙන්නා අයේෂා රිෂාඩ්ට සහ පියාට ඇප ඉල්ලයි. | අධිකරණය ඇප ඉල්ලීම තුන්වන වරටත් ප්‍රතික්ෂේප කරයි.

පාර්ලිමේන්තු මන්ත්‍රී රිෂාඩ් බදියුදීන්ගේ බිරිඳ වන අයේෂා රිෂාඩ් සහ ඇගේ පියා වෙනුවෙන් ගොනු කළ ඇප අයදුම්පත් තුන්වන වරටත් කොළඹ ප්‍රධාන මහේස්ත්‍රාත් අධිකරණය අද(30) ප්‍රතික්ෂේප කළේය.

විත්තිකරුවන් දෙදෙනාට කොවිඩ් -19 එන්නත ලබා දී නොමැති බව පවසමින් විත්තියේ නීතිඥවරයා මෝසමකින් ඇප ඉල්ලා සිටියේය.

රිෂාඩ් බදියුදීන්ගේ බිරිඳ වන අයේෂා සිහබ්දීන් වෙනුවෙන් පෙනී සිටි විත්තියේ නීතිඥවරයා කියා සිටියේ තම සේවා දායිකාවගේ දරුවන් දෙදෙනා මේ වන විට මවගේ භාරයේ සිටින බවත් ඇගේ මව දින කිහිපයකට පෙර කොවිඩ් -19 වැළඳී ඇති බවට තහවුරු වූ බවත්ය.

සැකකරුවන් ඇප මත මුදා හැරීම සඳහා මෙම කරුණු සලකා බැලිය යුතු යැයි ඔහු අධිකරණයට කරුණු ඉදිරිපත් කළේය. කරුණු සැලකිල්ලට ගෙන කොළඹ අතිරේක මහේස්ත්‍රාත්වරයා සැකකරුවන් දෙදෙනා වෙනුවෙන් ගොනු කළ ඇප අයදුම්පත් ප්‍රතික්ෂේප කිරීමට තීරණය කළේය. අගෝස්තු 23 වෙනිදා රිෂාඩ් බදියුදීන් මන්ත්‍රීවරයාගේ බිරිඳ, ඇගේ පියා සහ ඇගේ සහෝදරයා ඇතුළු සැකකරුවන් සිව්දෙනා සැප්තැම්බර් 6 දක්වා තවදුරටත් රක්ෂිත බන්ධනාගාර ගත කිරීමට කොළඹ අතිරේක මහේස්ත්‍රාත් රජින්ද්‍ර ජයසූරිය මහතා නියෝග කළේය.

මෙම නඩුවේ පස්වන සැකකරු ලෙස හිටපු අමාත්‍ය රිෂාඩ් බදියුදීන් නම් කර තිබේ. පාස්කු ඉරිදා ප්‍රහාරය සම්බන්ධයෙන් බදියුදීන් දැනට රක්ෂිත බන්ධනාගාර ගත කර සිටී. දැරියගේ මරණය පිළිබඳ පළමු සහ දෙවන පශ්චාත් මරණ පරීක්ෂණ වාර්තා අතර නොගැලපීම් කිහිපයක් පවතින බව අධිකරණයට දන්වා ඇත.