රේගුවේ ඇති කිරිපිටි බහලුම් 6 ආනයන අපනයන රේගුලාසි උල්ලංඝණය කරලා

රේගුවේ රඳවා ඇති කිරිපිටි බහලුම් 6 ආනයන අපනයන රේගුලාසි උල්ලංඝණය කරමින් මෙරටට ආනයනය කර ඇති බව මුදල් රාජ්‍ය අමාත්‍ය රංජිත් සියඹලාපිටිය පවසයි.

අද (29)දින ඒ සම්බන්ධයෙන් අමාත්‍යංශයේ නිවේදනය පාර්ලිමේන්තුවට ඉරිදිපත් කරමින් අමාත්‍යවරයා මේ බව සඳහන් කළේ‍ය.

“ආනයන අපනයන පාලක වෙත ඉදිරිපත් කර ඇති ලේඛන අනුව මෙම කිරිපිටි තොගය කිරිපිටි වශයෙන් වෙළෙඳපොළට ඉදිරිපත් කිරීමට හේතුවක් නොවන අතර කර්මාන්ත අමාත්‍යංශයේ ලේකම්ගේ නිර්දේශය අනුව ඒවා චොකලට් සහ කිරි තේ නිපදවීමට ආනයනය කළ අමුද්‍රව්‍යයි.”

අමාත්‍යවරයා පෙන්වා දුන්නේ, 1969 අංක 1 දරන ආනයන සහ අපනය පනත සමග කියවන රේගු ආඥා පනතේ 12 වන වගන්තිය උල්ලංඝණය කරමින් නීති විරෝධී ලෙස මෙරටට ආනයනය කරන ලද මෙම කිරිපිටි තොගය ඍජු පරිභෝජනය සඳහා කිරිපිටි ආනයනය කිරීමට ලබා දී තිබූ පහසුකම භාවිත කරමින් වෙනත් නිෂ්පාදන සඳහා අමුද්‍රව්‍යයක් ලෙස කිරිපිටි ආනයනය කළ අවස්ථාවක් බව ආනයනය අපනයන දෙපාර්තමේන්තුව සහ රේගු දෙපාර්තමේන්තුව මේ සම්බන්ධයෙන් නිකුත් කළ වාර්තා අනුව පෙනී යන බව ය.

තව ද ඒ සම්බන්ධයෙන් ඉදිරි නීතිමය පියවර ගැනීමට රේගු නිලධාරීන් කඩිනමින් පියවර ගන්නා බව ද අමාත්‍යවරයා පැවසීය.

ඔහු වැඩිදුරටත් අවධාරණය කළේ, කිරිපිටි ආනයනය කිරීම සීමා කර නොමැති බැවින් ඒ හේතුවෙන් වෙළෙඳපොළ තුළ කිසිසේත් ම කිරිපිටි හිඟයක් ඇතිවීමේ අවදානමක් නොමැති බව ය.

මේ අතර, අදාළ කිරිපිටි බහාලුම් සම්බන්ධයෙන් ශ්‍රී ලංකා රේගුව ද නිවේදනයක් නිකුත් කර ඇත.

එහි දැක්වෙන්නේ, අදාළ ආනයනවල නීත්‍යනුකූලභාවය සොයා බැලීම සඳහා ශ්‍රී ලංකා රේගුව විසින් විමර්ශනයක් ආරම්භ කරන ලද බව ය.

එම විමර්ශනයේ පියවරක් ලෙස කිරිපිටි වශයෙන් රේගුවට ප්‍රකාශ කළ බහලුම් 6ක් වැඩිදුර විමර්ශන සඳහා රඳවා ගත් බව එහි සඳහන් කර ඇත.

ඒ අනුව සිදු කරන ලද විමර්ශනයේදී ආනයනය හා අපනය පාලක ජනරාල් එම ආනයනය නීති විරෝධීව සිදු කර ඇති ආනයනයක් බවට තහවුරු කළ බව අදාළ නිවේදනය මගින් පෙන්වා දී තිබේ.

ශ්‍රී ලංකා රේගුව සඳහන් කරන්නේ, ඒ පිළිබඳව විමර්ශන තවමත් සිදු කෙරෙමින් පවතින බව ය.

පසුගිය දා පැවති මාධ්‍ය හමුවකදී කිරිපිටි නිෂ්පාදන සමාගමක සභාපති වන ලක්ෂ්මන් වීරසූරිය සඳහන් කළේ, දින 25ක් මුළුල්ලේ කොළඹ වරාය තුළ බහාලුම් 15ක් රඳවා තබා ඇති බව ත් ආනයන පාලක ජනරාල්වරිය මේ පිළිබඳව කිසිදු තීරණයක් නොගන්නා බව ත් ය.

ඒ හේතුවෙන්, ඉදිරියේදී රට තුළ කිරිපිටි හිඟයක් ඇති විය හැකි බවට ඔහු අනතුරු ඇඟවීමක් කළේ ය.

කෙසේ වෙතත්, රේගු විමර්ශන සහ පරීක්ෂණවලට බලපෑම් කිරීමේ අරමුණින් අදාළ මාධ්‍ය සාකච්ඡාව පවත්වා ඇති බව ශ්‍රී ලංකා රේගුව නිකුත් කළ නිවේදනයේ වැඩිදුරටත් සඳහන් කර ඇත.

The post රේගුවේ ඇති කිරිපිටි බහලුම් 6 ආනයන අපනයන රේගුලාසි උල්ලංඝණය කරලා appeared first on Colombo Today.