ප්‍රහාරක ජෙට් යානයක් යවා මගී ගුවන් යානයක් බස්සවාගෙන, ජනාධිපතිට විරුද්ධ මාධ්‍යවේදියෙකු අත්අඩංගුවට ගනියි.

තම රටේ ගුවන් සීමාවෙන් ගමන්කරමින් තිබු රයන්යාර් ගුවන් සේවයට අයත් ගුවන් යානයක් ප්‍රහාරක ජෙට් යානයක් යවා හදිසි ගොඩබෑමක් කරන ලෙසට බල කිරීමක් සිදුකර ගොඩබස්සවා ගැනීමට බෙලරුස් (Belarus) ජනාධිපති ඇලෙක්සැන්ඩර් ලූකෂෙන් කටයතු කර ඇත. ඒ ඔහුට විරුද්ධ මාධ්‍යවේදියෙකු අත්අඩංගුවට ගැනීම සඳහායි.

මේ වනවිට යුරෝපීය රටවල් විසින් “රාජ්‍ය ත්‍රස්තවාදය” සහ “පැහැර ගැනීම” ක්‍රියාවක් ලෙස හඳුන්වා හෙලා දැක ඇත.

මේ අතර මින්ස්ක් ගුවන්තොටුපළ පැවසුවේ බෝම්බ තර්ජනයක් හේතුවෙන් ගුවන් යානය ගොඩබෑමට සිදු වූ බවයි.

යානය සෝදිසි කිරීමේදී කිසිදු බෝම්බයක් හමු නොවූ නමුත් පසුගිය කාලයේදී ලූකෂෙන්කෝ මහතාට එරෙහිව ඇති වූ මහජන විරෝධතා පිළිබඳව වාර්තා කළ සමාජ මාධ්‍ය නාලිකාවක් වන නෙක්ස්ටා හි නිර්මාතෘ හා සංස්කාරක රෝමන් ප්‍රොටසෙවිච් අත්අඩංගුවට ගැනීමට බෙලරුස් නිලධාරීන් කටයුතු කර ඇත.

“ලුකාෂෙන්කෝගේ මෙම විකාර ක්‍රියාව බරපතල තත්වයක් අඟවයි” යනුවෙන් එක්සත් රාජධානියේ විදේශ ලේකම් ඩොමිනික් රාබ් ට්විටර් පණිවුඩයක් නිකුත් කරමින් කියා සිටියේය.

පෝලන්ත අග්‍රාමාත්‍ය මාටියුස් මොරාවික් කියා සිටියේ මෙම යානය “රාජ්‍ය ත්‍රස්තවාදයේ නින්දිත ක්‍රියාවකින්” පැහැරගෙන ගොස් ඇති බවත් ඊට ප්‍රතිචාර වශයෙන් බෙලරුසියාවට එරෙහිව නව සම්බාධක පැනවිය යුතු බවත්ය.

අනතුරු ඇඟවීමෙන් පසු යානය මින්ස්ක් වෙත ගොඩබෑමට ලූකෂෙන්කෝ මහතා පෞද්ගලිකව නියෝග ලබා දී ඇති බවත්, යානය එහි බැස්සවීමට මිග් -29 ජෙට් යානයක් යවා ඇති බවත් බෙලාරුසියානු රාජ්‍ය මාධ්‍ය පවසයි.

“බෙලරුස් රජය විසින් ජාත්‍යන්තර සිවිල් ගුවන් සේවයට එල්ල වී ඇති තර්ජනයට වහාම ප්‍රතිචාර දක්වන ලෙස මම නේටෝ සහ යුරෝපා සංගම් සගයන්ගෙන් ඉල්ලා සිටිමි. මෙය නැවත සිදු නොවීමට ජාත්‍යන්තර ප්‍රජාව වහාම පියවර ගත යුතුය” යනුවෙන් ලිතුවේනියානු ජනාධිපති ගීතානාස් නෞසාඩා පැවසීය.

සිදුවූ දෙය පිළිබඳව “ක්ෂණික පැහැදිලි කිරීමක්” ලබා දෙන ලෙස ජර්මනිය බෙලරුස් රජයෙන් ඉල්ලා සිටි අතර යුරෝපා සංගමයේ සභාපති උර්සුලා වොන් ඩර් ලේන් පැවසුවේ “ඇතන්ස් සිට විල්නියූන් දක්වා ගමන්කරමින් තිබූ රයන්යාර් ගුවන් යානය මින්ස්ක් වෙත ගොඩබෑමට බල කිරීම සම්පූර්ණයෙන්ම පිළිගත නොහැකි” බවයි.

“ජාත්‍යන්තර ගුවන් ප්‍රවාහන නීති උල්ලංඝනය කිරීමක් සිදුවුවහොත් එහි ප්‍රතිවිපාක ලැබිය යුතුය.”

එක්සත් ජනපද රාජ්‍ය ලේකම් ඇන්ටනි බ්ලින්කන් පැවසුවේ බලහත්කාරයෙන් ගුවන් යානය ගොඩ බැස්සවීම සහ පසුව ප්‍රොටසෙවිච් මහතා අත්අඩංගුවට ගැනීම දැඩි ලෙස හෙළා දකින බවයි.

“ඔහු වහාම නිදහස් කරන ලෙස අපි ඉල්ලා සිටිමු,” ඔහු පැවසීය. “ලූකෂෙන්කා තන්ත්‍රය විසින් සිදු කරන ලද මෙම කම්පනකාරී ක්‍රියාව එක්සත් ජනපද පුරවැසියන් ඇතුළු මගීන් 120 කට වැඩි පිරිසකගේ ජීවිත අනතුරේ හෙළීය.