තාවකාලික සටන් විරාමය රුසියාව කඩ කරයි

යුක්රේනයේ මරියුපොල් වරාය නගරයට සහ වොල්නොවකා නගරයට තාවකාලිකව ක්‍රියාත්මක කළ සටන් විරාමය අත්හිටුවා තිබේ.

යුක්රේන බලධාරින් සඳහන් කර ඇත්තේ රුසියානු හමුදා සටන් විරාමයට ගරු කරමින් කටයුතු නොකිරීම හේතුවෙන් මෙලෙස සටන් විරාමය තාවකාලිකව අත්හිටුවන බවයි.

යලිත් නිවෙස් වෙත ගොස් වැඩිදුර තොරතුරු ලබාදෙන තෙක් ආරක්ෂිතව රැදී සිටින ලෙස මරියුපොල් වරාය නගරයේ සහ වොල්නොවකා නගරයේ බලධාරින් නගර වැසියන්ට ශබ්ද විකාශන යන්ත්‍ර මගින් දැනුම්දී ඇති බව විදෙස් වාර්තා සඳහන් කරයි.

එමෙන්ම යුරෝපා කලාපයේ විශාලතම න්‍යෂ්ටික බලාගාරය ලෙසට සැලකෙන Zaporizhzhia බලාගාරය රුසියාව විසින් අත්පත් කර ගැනීමට විරෝධතා දක්වන ලෙසට යුක්රේන ජනාධිපති Volodymyr Zelenskiy රුසියානුවන්ගෙන් ඉල්ලීමක් කරයි.

පවතින ගැටුම් අතරතුර Zaporizhzhia න්‍යෂ්ටික බලාගාරයේ ගොඩනැගිල්ලක් රුසියානු හමුදා විසින් ගිනිබත් කළ බවයි යුක්රේන බලධාරීන් සිකුරාදා ප්‍රකාශ කළේ.