ජාතික ආරක්ෂාව කොයිබට ද ? ෆෙඩරල් වෙනුවෙන් පෙනී සිටි සිංගප්පුරුවේ පුරවැසි රොහාන් ගුණරත්නට ආරක්ෂක අමාත්‍යංශයේ ලොකු පුටුවක්

දශක තුනක පමණ කාලයක් ඇදී ගිය ඊළාම් බෙදුම්වාදී කුරිරු යුද සමයේ, එනම් 2005 දී බලයට පත් මහින්ද රාජපක්ෂ ජනාධිපතිතුමන්ගේ දේශපාලන නායකත්වයෙන් සහ ගෝඨාභය රාජපක්ෂ ආරක්ෂක ලේකම්වරයාගේ මග පෙන්වීමෙන් ඊළාම් බෙදුම්වාදයට ඒරෙහි සටන ඇරඹු විට, අවසාන මොහොත දක්වා ම එනම් 2019 දක්වා එය කිසිදු ලෙස යුද ජයග්‍රහණයකින් නිම කළ නොහැකි බවට අනාවැකි පළ කළ දේශපාලන න්‍යායචාර්යන්, සාම දුතයන්, යුද විශ්ලේෂකයන් ආදී රාජ්‍ය නොවන සංවිධානවලින් යැපුන රැලක් විය. ඒ් විශ්ලේෂකයන් අතර එක් අයෙකු වූයේ ආචාර්ය රොහාන් ගුණරත්නය.

සිව්වන නැතිනම් අවසාන ඊළම් යුද්ධය ආරම්භයේ සිට කුඩා ළමයෙකු පවා අපේ ජයග්‍රහණය සහතික කරන විට ද ඔහු සිටියේ සන්ධීය (ෆෙඩරල්) මතවාදීන්ගේ කඳවුරේය. එනම් මේ යුද්ධය කිසිදු දවසක සන්නද්ධ යුද්ධයකින් අපට ජයග්‍රහණය නොකළ හැකි බවත් අවම වශයෙන් සන්ධිය (ෆෙඩරල්) බලය අරමුණ කොට සාකච්ඡා මගින් විසදා ගත යුතු බවත්ය. එසේ කියු මේ යුද විශ්ලේෂකයා යුද්ධයේ අවසාන මොාහාතේ වහා ”දිනන පැත්තට හෝයියා” කියමින් යුද ජයග්‍රහණය තම ඊනියා විශ්ලේෂණ මතය කර ගත්තේය.

එහෙත් අද එම පුද්ගලයා ආරක්ෂක අමාත්‍යාංශයට අනුබද්ධ ”ශ්‍රී ලංකාවේ ජාතික ආරක්ෂක අධ්‍යයන ආයතනයේ (INSSSL)” උපදේශකයෙකු මෙන්ම නොනිල අධ්‍යක්ෂ ජනරාල් වශයෙන් කටයුතු කරන බව විශ්වාසදායක ආරංචි මාර්ග මගින් බවට දැන ගැනීමට ඇත. ඒ ආයතන සංග්‍රහයට පටහැනිව කොළඹ සිට විදේශයට මග සොයන රාජ්‍ය නොවන සංවිධානයක පුද්ගලයෙකු එහි වැඩ බලන අතරතුර දී ය.

රොහාන් ගුණරත්න තම ජිවිතයෙන් වැඩි කාලයක් සිංගප්පුරුවේ වාසය කළ සිංගප්පුරු ජාතිකයෙකි. සිංගප්පූරුවට ආසියානු කලාපයේ වැඩිම බලපෑමක්, තරගකාරිත්වයක් ඇති කළ හැකි රටක් වශයෙන් ශ්‍රී ලංකාවේ ජාතික ආරක්ෂාව සම්බන්ධ තොරතුරු ඉතා වැදගත් වනවා නොවනුමානය. රොහාන් ගුණරත්න මහතා උපතින් සිංහලයෙකු වුවද සිංහල බෞද්ධ අනන්‍යතාව නොපිළිගන්නා බහුජාතික, බහුආගමික, බහුසංස්කෘතික, බහුත්වසමාජ බහුබුත වෙනුවෙන් පෙනි සිටින අයෙකි. එවැනි අයෙකුට තම උපන් රට පිළිබඳ බැඳීමක් නොතිබීම නිසැකය. රටට යම් බැඳීමක් තිබුණානම් කිසිදු දිනක ශ්‍රී ලංකාවේ පුරවැසිභාවය අතහැර විදේශ පුරවැසි‌යෙකු නොවනු ඇත.

රොහාන් ගුණරත්න සිංගප්පූරු ජාතිකයෙකු වීමත් සමග ඔහු නිත්‍යානුකූලව එම (තම) රට සිංගප්පූරුව වෙනුවෙන් පමණක් පෙනි සිටීමට සිදුවීම අනිවාර්යය. ඒ මන්දයත් සිංගප්පූරුවේ භූදේශපාලනික පිහිටීම නිසා, ජාතික අර්බුදකාරී අවස්ථාවක දී ද්විත්ව පුරවැසියන් තම පක්ෂපාතීත්වය සිංගප්පුරුවට ඒරෙහිව අනෙක් රටට පක්ෂ වීමට ඉඩ දිය නොහැකි බැවින් ද්විත්වපුරවැසිභාවය තම රටට නුසුදුසු බව සිංගප්පූරු රජයේ ස්ථාවරයයි. ලී ක්වානු යූ වැනි පරිණත නායකයෙකු රටක ජාතික ආරක්ෂාව සම්බන්ධයෙන් එවැනි දුරදර්ශී තීරණය අපට ද ආදර්ශයකි. ඒහෙත් අවසනාවකට අපට එවැනි මඟපෙන්විමක් නැත.

මෙම රජයට පෙර පැවති රනිල්-මෛත්‍රි රජයේ කුප්‍රකට මහ බැංකු මංකොල්ලයේ ප්‍රධාන විත්තිකරුවෙකු වුයේ එවකට මහ බැංකුවේ අධිපති වූ ශ්‍රී ලංකා සම්භවයක් අති සිංගප්පුරු ජාතික අර්ජුන් මහෙන්ද්‍රන් නොහොත් හර්ජාන් ඇලෙක්සැන්ඩර්ය. අද වෙන තෙක් මෙම සිංගප්පුරු ජාතිකයාව අධිකරණ කටයුතු සඳහා මෙරටට ගෙනාවා ගැනීමට පසුගිය රජය මෙන්ම මෙම රජය ද අපොහොසත්ව ඇත. වඩාත් පැහැදිලිව කිවහොත් සිංගප්පුරු රජය ලක් රජයේ ඉල්ලීම නොතකා තම පුරවැසියා ආරක්ෂා කර ඇත. ඉදිරියට ද තම පුරවැසියන් ආරක්ෂා කරනු ඇත.

මහා බැංකුවෙන් කොල්ල කැවේ මහා භාණ්ඩාගාරයේ ඇති මුදල්ය. එහෙත් ජාතික ආරක්ෂාව සම්බන්ධ තොරතුරු විදේශිකයෙකු/විදේශයක් අතට පත් වූවොත් එහි ඵලවිපාක කෙතරම් බරපතල විය හැකිද? නැවත ව්‍යසනයක් වන තුරු බලා සිටිමු ද?

පානි වෑවල