කොවිඩ් අසාදනයෙන් මියගිය බිළිඳාගේ දේහය භාර ගැනීම දෙමව්පියන් ප්‍රතික්ෂේප කරයි

ඉකුත් දෙසැම්බර් 08 වනදා කොළඹ රිජ්වේ ආර්යා ළමා රෝහලේදී කොවිඩ් නියුමෝනියාවෙන් මියගිය දින 20 ක් වයසැති බිළිඳාගේ දේහය භාර ගැනීම දෙමව්පියන් විසින් ප්‍රතික්ෂේප කර තිබේ.

ඒ සම්බන්ධයෙන් රිජ්වේ ආර්යා ළමා රෝහලේ අධ්‍යක්ෂ වෛද්‍ය ජී.විජේසූරිය මහතා අද (10)දින කරුණු පැහැදිලි කළේය.

“මව ප්‍රකාශ කරලා තියෙනවා මේ දරුවා දවස් එකහමාරක් පමණ නිදිමත ගතියෙන් සිටි බව. ඒ නිදිමත ගතිය ගොඩාක්ම රෝගී තත්ත්වය උත්සන්න වීම නිසා. ඒ වගේම මවගේ ප්‍රකාශවලින් කියැවෙනවා මව කිරිදෙන විට මේ දරුවාට කිරි හිරවීමක් සිදුවුවා කියලා. හැබැයි දෙමාපියන් මීට වඩා කලින් මේ දරුවා රෝහල්ගත කරේ නම් මේ දරුවාගේ ජීවිතය සමහරක් වෙලාවට බේරා ගැනීමට හැකියාවක් තිබුණා. ඇන්ටිජන් ටෙස්ට් එකෙන් හා පීසීආර් පරීක්ෂණයෙන් යන දෙකෙන්ම තදබල ලෙස මේ දරුවාට කොරෝනා වෛරසය ශරීරගතවී ඇති බව සනාථ වුණා. දෙමාපියන් කිසිකෙනෙක් දරුවාගේ මෘත දේහය භාරගැනීමට පැමිණියේ නැහැ. ඊට පස්සේ අපි මෘත ශරීරාගාරයට යැව්වා. දෙමාපියන්ට පොලීසිය මඟින් අපි දැනුම්දුන්නා. ඒත් ඔවුන් පැමිණියේ නෑ දේහය භාරගැනීම සඳහා. අවසානයේ දී සන්ධ්‍යා කාලයේ දී රජයේ වියදමින් ආදාහන කටයුතු කිරීමට සිදුවුණා. “