SLT-MOBITEL සහ Orient Residencies අතර තොරතුරු හා සන්නිවේදන තාක්ෂණ පහසුකම් සඳහා විශේෂ ගිවිසුමක්

ජාතික තොරතුරු හා සන්නිවේදන තාක්ෂණ විසඳුම් සම්පාදක වන SLT-MOBITEL, මෙරට ප්‍රමුඛ පෙළේ ඉදිකිරීම් සමාගමක් වන Orient Construction Company (පුද්.) සමාගම සමග විශේෂ ගිවිසුමකට පසුගියදා අත්සන් තැබීය. මෙම ගිවිසුම යටතේ SLT-MOBITEL විසින්, නුගේගොඩ ජම්බුගස්මුල්ල ප්‍රදේශයේ පිහිටා ඇති ‘Orient Residencies’ සුඛෝපභෝගී මහල් නිවාස සංකීර්ණයට අතිනවීන තොරතුරු හා සන්නිවේදන තාක්ෂණික පහසුකම් ලබාදීම සිදුකරයි.

SLT-MOBITEL වෙනුවෙන් එහි ප්‍රධාන ප්‍රාදේශීය විකිණුම් නිලධාරී ඉමන්ත විජේකෝන් සහ සාමාන්‍යධිකාරී (බස්නාහිර පළාත් මධ්‍යම) චේතන අත්තනායක යන මහත්වරුන් ද, Orient Construction Company (පුද්.) සමාගම වෙනුවෙන් එහි අධ්‍යක්ෂ/සාමාන්‍යාධිකාරී නුවන් අමරසේකර සහ අධ්‍යක්ෂ/ඉංජිනේරු විජය රුද්‍රිගු යන මහත්වරුන් ද මෙම ගිවිසුමට අත්සන් තැබූහ.

මෙම ගිවිසුමට අනුව ‘Orient Residencies’හි පදිංචිකරුවන්ට නවීනතම දුරකථන සන්නිවේදන සේවා මෙන්ම SLT-MOBITEL Fibre තාක්ෂණය ඔස්සේ අධිවේගී අන්තර්ජාල සම්බන්ධතා සහ SLT-MOBITEL PEO TV සේවාවන් ද ලබාදීමට  SLT-MOBITEL කටයුතු කරනු ඇත.

මෙම ගිවිසුම සම්බන්ධයෙන් අදහස් දක්වමින්,  SLT-MOBITEL ප්‍රධාන ප්‍රාදේශීය විකිණුම් නිලධාරී ඉමන්ත විජේකෝන් මහතා මෙසේ පැවසී ය. “ශ්‍රී ලංකාවේ ප්‍රමුඛ පෙළේ ඉදිකිරීම් සමාගමක් සමග අත්වැල් බැඳගනිමින් ඔවුන්ගේ ඉලක්ක ළඟා කරගැනීමට ශක්තියක් වීමට ලැබීම අපට සතුටක්. ශ්‍රී ලංකාවේ ප්‍රමුඛතම ඩිජිටල් විසඳුම් සම්පාදකයා ලෙස, තොරතුරු තාක්ෂණය සහ ඩිජිටල්කරණය ඔස්සේ ජනතාවගේ ජීවන තත්ත්වය හා ජීවන රටා වැඩිදියුණු කිරීමට අප සෑම විටම උත්සාහ කරනවා. Orient Construction සමාගමේ අරමුණ වන්නේ හුදෙක් නිවාස ඉදිකිරීම නොව, තම පාරිභෝගිකයන්ගේ සිහින සැබෑ කරන ආකාරයේ ජීවන අවකාශ නිර්මාණය කිරීමයි. ජාත්‍යන්තර තලයේ තොරතුරු හා සන්නිවේදන යටිතල පහසුකම් සපයමින්, එම අරමුණ යථාර්ථයක් බවට පත්කිරීමට ඔවුන්ට සහය වීමේ හැකියාව අප සතු බව අප විශ්වාස කරනවා.”

Orient Construction Company (පුද්.) සමාගමේ අධ්‍යක්ෂ/සාමාන්‍යාධිකාරී නුවන් අමරසේකර මහතා මෙසේ අදහස් දැක්වී ය. “අපගේ ව්‍යපෘතිවලදී ඉහළම ප්‍රමිති මට්ටම් පවත්වා ගැනීමට අප සෑම විටම උත්සාහ කරනවා. හවුල්කරුවන් තෝරාගැනීමේදී ද අපගේ අවධානය යොමුවන්නේ ඉහළම ගුණාත්මක භාවය පිළිබඳවයි. SLT-MOBITEL යනු ජාත්‍යන්තර තලයේ තොරතුරු හා සන්නිවේදන තාක්ෂණ පහසුකම් සැපයීම සම්බන්ධයෙන් නොසැලෙන කීර්තියක් දිනූ සමාගමක්. මෙම ව්‍යාපෘතියේ හවුල්කරුවෙකු ලෙස SLT-MOBITEL තෝරාගැනීමට ප්‍රධානතම හේතුවක් වූයේ මෙම සාධකයයි. අප මේ සිදුකරන්නේ හුදෙක් නිවාස ඉදිකිරීමක් නොව, පදිංචිකරුවන්ගේ සිහින සැබෑ කරන ළෙන්ගතු අවකාශ නිර්මාණය කිරීමක් බව අප දැඩිව විශ්වාස කරනවා.”

Orient Construction Company යනු ශ්‍රී ලාංකික වෙළඳපොළ ඉලක්ක කරගත්, පූර්ණ පහසුකම් සහිත ඉදිකිරීම් සමාගමකි. සහනදායී මිලගණන් යටතේ ශ්‍රී ලාංකිකයන්ට සුඛෝපභෝගී සහ අර්ධ සුඛෝපභෝගී නිවාස මිලදී ගැනීමට අවස්ථාව සලසාදීමේ උත්සාහයේ තවත් අදියරක් වශයෙන් එම සමාගම Orient Residencies ව්‍යාපෘතිය ක්‍රියාවට නංවා ඇත.  ඉහළම ප්‍රමිතීන්ට අනුව තම ඉදිකිරීම් කටයුතු සිදුකරන Orient Construction Company (පුද්.) සමාගම මෙරට ඉදිකිරීම් ක්ෂේත්‍රයේ ප්‍රමුඛතම සමාගමක් ලෙස සැලකෙන අතර, ඉදිකිරීම් පුහුණු හා සංවර්ධන ආයතනයේ (Institute of Construction Training and Development – ICTAD) පිළිගැනීම ද එයට හිමි වී ඇත.

ඡායාරූපය: (වමේ සිට) Orient Construction Company (පුද්.) සමාගමේ ප්‍රධාන මූල්‍ය පාලක අනුර දිසානායක, අධ්‍යක්ෂ/ඉංජිනේරු විජය රුද්‍රිගු, සහ අධ්‍යක්ෂ/සාමාන්‍යාධිකාරී නුවන් අමරසේකර යන මහත්වරුන් සමග SLT-MOBITEL හි ප්‍රධාන ප්‍රාදේශීය විකිණුම් නිලධාරී ඉමන්ත විජේකෝන්, සාමාන්‍යධිකාරී (බස්නාහිර පළාත් මධ්‍යම) චේතන අත්තනායක, කළමනාකරු/ව්‍යාපාර සංවර්ධන කැලුම් ප්‍රියන්ත සහ අලෙවි නිලධාරිනී කසුනි දිල්හාරා යන මහත්ම මහත්මීන්

The post SLT-MOBITEL සහ Orient Residencies අතර තොරතුරු හා සන්නිවේදන තාක්ෂණ පහසුකම් සඳහා විශේෂ ගිවිසුමක් appeared first on Adaderana Biz Sinhala | Sri Lanka Business News.