ජාතික පාරිභෝගික මිල දර්ශකයෙහි (NCPI, 2013=100) වාර්ෂික ලක්ෂ්‍යමය වෙනස මගින් මනිනු ලබන මතුපිට උද්ධමනය, 2021 මාර්තු මාසයේ පැවති සියයට 5.1හි සිට 2021 අප්‍රේල් මාසයේ දී සියයට 5.5 දක්වා ඉහළ ගියේය. 2020 අප්‍රේල් මාසයේ පැවති පහළ පදනම් අගය මගින් ඇති වූ සංඛ්‍යානමය බලපෑම මේ සඳහා ප්‍රධාන වශයෙන් හේතු විය. මේ අතර, ආහාර කාණ්ඩයෙහි වාර්ෂික ලක්ෂ්‍යමය උද්ධමනය 2021 මාර්තු මාසයේ දී පැවති සියයට 8.8හි සිට 2021 අප්‍රේල් මාසයේ දී සියයට 9.7 දක්වා ඉහළ ගිය අතර ආහාර නොවන කාණ්ඩයෙහි වාර්ෂික ලක්ෂ්‍යමය උද්ධමනය 2021 මාර්තු මාසයේ පැවති සියයට 2.0හි සිට 2021 අප්‍රේල් මාසයේ දී සියයට 2.2 දක්වා ඉහළ ගියේය.
වාර්ෂික සාමාන්‍ය පදනම මත මනිනු ලබන ජා.පා.මි. දර්ශකයෙහි වෙනස, 2021 අප්‍රේල් මාසයේ දී සියයට 5.3හි නොවෙනස්ව පැවතුණි.
2021 අප්‍රේල් මාසයේ දී ජා.පා.මි. දර්ශකයෙහි මාසික වෙනස සුළු වශයෙන් ඉහළ යෑමක් වාර්තා කළේය. මේ සඳහා, ආහාර සහ ආහාර නොවන කාණ්ඩ දෙකෙහිම අයිතමවල මිල ගණන්හි සිදු වූ ඉහළ යෑම් හේතු විය. ඒ අනුව, 2021 අප්‍රේල් මාසයේ දී ආහාර කාණ්ඩයේ, ප්‍රධාන වශයෙන්, පොල්තෙල්, නැවුම් මත්ස්‍ය, සහ පලතුරු මිල ගණන්වල ඉහළ යෑමක් දක්නට ලැබුණි. එසේ වුවද, මාසය තුළ දී පොල් සහ එළවළු මිල ගණන්හි පහළ යෑමක් වාර්තා විය. තවද, රෙදිපිළි සහ පාවහන් (රෙදිපිළි), ප්‍රවාහන (ලිහිසි තෙල්) සහ විවිධ භාණ්ඩ සහ සේවා (කොණ්ඩය සහ රැවුල කැපීමේ ගාස්තු) උප කාණ්ඩවල මිල ගණන් ඉහළ යෑම හේතුවෙන්, ආහාර නොවන කාණ්ඩයෙහි අයිතමවල මිල ගණන්හි ඉහළ යෑමක් 2021 අප්‍රේල් මාසයේ දී වාර්තා විය.
තවද, වාර්ෂික ලක්ෂ්‍යමය පදනම මත මූලික උද්ධමනය 2021 මාර්තු මාසයේ දී පැවති සියයට 4.3හි සිට 2021 අප්‍රේල් මාසයේ දී සියයට 4.1 දක්වා පහළ ගිය අතර, වාර්ෂික සාමාන්‍ය මූලික උද්ධමනය 2021 මාර්තු මාසයේ දී පැවති සියයට 4.3හි සිට 2021 අප්‍රේල් මාසයේ දී සියයට 4.4 දක්වා සුළු වශයෙන් ඉහළ ගියේය.
The post NCPI උද්ධමනය 2021 අප්‍රේල් මාසයේ දී ඉහළට appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka