JAT Holdings මූලික කොටස් නිකුතුව වෙනුවෙන් පැවැත්වූ Virtual සමුළුව සාර්ථකයි

ශ්‍රී ලංකාවේ ආලේපන ක්ෂේත්‍රයේ විශ්වාසය දිනූ ප්‍රමුඛයා වන JAT Holdings හි මූලික කොටස් නිකුතුව (Initial Public Offering – IPO) පිළිබඳ උනන්දුවක් දක්වන ආයෝජකයන් වෙනුවෙන් 2021 ජූලි 08 දින පවත්වන ලද විශේෂ අතථ්‍ය සමුළුවක් (Virtual Forum) සාර්ථක ලෙස අවසන් විය. මෙම ප්‍රථම කොටස් නිකුතුව නිල වශයෙන් දියත් කිරීමද එදින සිදුකරන ලද අතර, මෙම අවස්ථාවට Zoom, Facebook Live, සහ YouTube Live ඔස්සේ විශාල පිරිසක් එක්වූහ. මූල්‍ය විශ්ලේෂකයන් සහ අරමුදල් කළමනාකරුවන් ඇතුළුව මේ සම්බන්ධයෙන් උනන්දුවක් දක්වන බොහෝ දෙනෙකු මෙම අතථ්‍ය සමුළුවට සහභාගී වූ අතර එහිදී සමාගමේ ව්‍යාපාරික මෙහෙයුම්, මූල්‍ය ක්‍රියාකාරීත්වය සහ වර්ධන දිශානතිය ඇතුළු වැදගත් කරුණු රැසක් පිළිබඳව දීර්ඝ වශයෙන් සාකච්ඡා කරන ලදි.

CAL සමාගම සහ NDB Investment බැංකුව මගින් කළමනාකරණය කරනු ලබන මෙම මූලික කොටස් නිකුතුව තුළදී සාමාන්‍ය ඡන්ද හිමි කොටස් 82,904,846 ක් නිකුත් කෙරෙනු ඇත. කොටසක වටිනාකම වන රු. 32.70 ට සාපේක්ෂව ආයෝජකයන්ට මෙම කොටස් නිකුතුව තුළදී 21% ක වාසියක් අත්විඳිමින්, කොටසක් රු. 27.00 බැගින් මිලදී ගැනීමට අවස්ථාව ලැබේ. වට්ටම් කරන ලද මුදල් ප්‍රවාහය (Discounted Cash Flow – DCF) සහ ඉදිරි මිල ඉපයුම් අනුපාතය (Forward-earnings Ratio (PER) යන තක්සේරු විධික්‍රම නිසා මෙම අවස්ථාව උදාකර දීමට හැකි වී ඇත.

මෙම මූලික කොටස් නිකුතුව මගින් ලැබෙන ආදායම, සමාගමේ පර්යේෂණ හා සංවර්ධන අංශය සියලුම තීන්ත වර්ග සම්බන්ධයෙන් පර්යේෂණ හා සංවර්ධන කටයුතු සිදුකළ හැකි ආකාරයට අතිනවීන පහසුකම් සමගින් වැඩිදියුණු කිරීම, බංග්ලාදේශයේ නිෂ්පාදන කර්මාන්තශාලාවක් ආරම්භ කිරීම, WHITE by JAT නිෂ්පාදන පෙළ සම්බන්ධ ප්‍රවර්ධන හා සංවර්ධන වැඩසටහන් ක්‍රියාත්මක කිරීම සහ නැගෙනහිර අප්‍රිකාවේ නිෂ්පාදන කර්මාන්තශාලාවක් ආරම්භ කිරීම යන අරමුණු උදෙසා යොදවනු ඇත.

” JAT Holdings ප්‍රථම කොටස් නිකුතුව සම්බන්ධ මෙම කටයුතු වල සාර්ථකත්වය දෙස අප බලා සිටින්නේ ඉතාමත් උනන්දුවෙන්. COVID-19 නිසා ඇතිවී තිබෙන අභියෝග හමුවේ පවා සමාගමේ ඉදිරි ගමන සම්බන්ධ වැදගත් තීරණ ගැනීමටත්, සංවර්ධනය හා නවෝත්පාදනය ඔස්සේ ක්ෂේත්‍රය තුළ ඉදිරියට යාමටත් JAT Holdings කිසිසේත්ම පසුබට වන්නේ නැහැ. ආයෝජකයන් වෙනුවෙන් පවත්වන ලද මෙම විශේෂ Virtual සමුළුව, අනාගත ආයෝජකයන් සම්බන්ධ කරගනිමින් අපගේ මූලික කොටස් නිකුතුවට අදාළ වැදගත් කරුණු සාකච්ඡා කිරීම සඳහා මනා අඩිතාලමක් බවට පත්වුණා.” JAT Holdings සමාගමේ කළමනාකාර අධ්‍යක්ෂ ඊලියන් ගුණවර්ධන මහතා පැවසී ය.

www.ipo.jatholdings.com වෙත පිවිසීමෙන් මෙම මූලික කොටස් නිකුතුවට අදාළ සංස්ථා ප්‍රකාශය (prospectus) පරිශීලනය කිරීමටත්, ඒ පිළිබඳ වැඩිදුර තොරතුරු ලබාගැනීමටත් අවස්ථාව හිමි වේ. එමෙන්ම මෙම වෙබ් අඩවියට චැට් සේවාවක්ද ඇතුළත් කර ඇති අතර, ක්ෂණික ඇමතුම් අංකයක් සහ මගහැරුණු ඇමතුම් (Missed-call) අංකයක්ද හඳුන්වා දී ඇත. මේ සියල්ලෙහි අරමුණ වන්නේ, කොටස් නිකුතුව සම්බන්ධයෙන් හොඳින් දැනුවත්ව තීරණ ගැනීම සඳහා ආයෝජකයන්ට අවශ්‍ය සියලු තොරතුරු ඉතාමත් පහසුවෙන් ලබා ගැනීමට අවස්ථාව සලසා දීම ය.

The post JAT Holdings මූලික කොටස් නිකුතුව වෙනුවෙන් පැවැත්වූ Virtual සමුළුව සාර්ථකයි appeared first on Adaderana Biz Sinhala | Sri Lanka Business News.