ඇයගේ ශ්‍රී ලංකා සංචාරයේ අරමුණ වූයේ රටේ තරුණ තරුණියන් සඳහා අධ්‍යාපනික සහ පුහුණු අවස්ථා වැඩිදියුණු කිරීම සඳහා හවුල්කාරීත්වයක් සහිත දැක්මක් ඉදිරිපත් කරමින් BCI සහ ICC අතර අන්තර් සහයෝගීතාවයන් ඇතිකරන මුලපිරීම් පිළිබඳව සාකච්ජා කිරීමයි.
මෙම අවස්ථාව සඳහා ශ්‍රී ලංකා වාණිජ මණ්ඩලයේ සභාපති ඇන්තනී එම්. ශනිල් ප්‍රනාන්දු, එහි උප සභාපති ජොනී ප්‍රනාන්දු, BCI Campus හි ප්‍රධානී, උපකුලපති අති ගරු ක්වින්ටස් ප්‍රනාන්දු පියතුමන්, BCI Campus හි වෘත්තීය මාර්ගෝපදේශ පිළිබඳව සම්බන්ධීකාරක ජාමී වර්ණකුලසූරිය සහ එහි ව්‍යාපාරික පීඨයේ වැඩසටහන් ප්‍රධානී කථිකාචාර්ය සසිනි ප්‍රනාන්දු යන මහත්ම මහත්මීන් සහභාගී විය.
විශේෂයෙන්ම උසස් අධ්‍යාපන කටයුතු සඳහා අවතීර්ණය වීමට නොහැකි ශ්‍රී ලංකාවේ තරුණ තරුණියන් සවිබල ගැන්වීම සඳහා බලපෑමක් ඇති කෙරෙන අධ්‍යාපනය සහ වෘත්තීය පුහුණු වැඩසටහන් ඇති කිරීම සඳහා සහයෝගයෙන් ක්‍රියා කිරීමට මෙම සාකච්ජාවේදී දෙපාර්ශවයම එකඟ විය. ආර්ථික අවශ්‍යතාවයන් පදනම් කරගනිමින් සකස් කරන ලද වෘත්තීය පාඨමාලා නිර්මාණය කිරීම සහ ජීවනෝපායන් වැඩිදියුණු කිරීම සඳහා අවශ්‍ය කුසලතාවලින් තරුණ තරුණියන් බලගැන්විය හැකි නැගී එන වෘත්තීන් පිළිබඳව මෙහිදී සාකච්ඡා විය. ජාත්‍යන්තර වාණිජ මණ්ඩලය සහ BCI අතර නිර්මාණය වන සහයෝගීතාවය ශ්‍රී ලංකාවේ අධ්‍යාපන ක්ෂේත්‍රයේ අභියෝගවලට විසඳුම් සෙවීම සඳහා සාධනීය ආරම්භයක් ලබා දෙනු ඇත.
විශේෂයෙන්ම ගම්පහ, පුත්තලම සහ කුරුණෑගල ඇතුළු දිස්ත්‍රික්කවල උසස් අධ්‍යාපන අවශ්‍යතාවය සඳහා BCI වැනි පෞද්ගලික ආයතනවල වැදගත්කම පිළිබඳව මෙම සාකච්ජාවේදී BCI Campus හි ප්‍රධානී උපකුලපති අති ගරු ක්වින්ටස් ප්‍රනාන්දු පියතුමන් අවධානය යොමු කරන ලදී. උන්වහන්සේගේ අදහස් දැක්වීම හරහා කතෝලික අධ්‍යාපන මෙහෙවර සහ සමස්ත නවීන අධ්‍යාපන ඉගෙනුම් ආකෘතිය (K-Sam model) ඇතුළත් BCI හි පෙළගැස්ම පිළිබඳව ඉස්මතු කළහ. එමෙන්ම සා.පෙළ සහ උ.පෙළ විභාග අසමත් වීම සහ විශ්වවිද්‍යාල ප්‍රවේශය අහිමිවී ගිය ශිෂ්‍ය ප්‍රජාවන්ගේ දත්ත ඇතුළත් සංඛ්‍යාලේඛන අනූව, එම සිසුන් සඳහා සුදුසු පාඨමාලා නිර්මාණය කිරීම අවශ්‍ය බව පියතුමන් විසින් මෙහිදී අවධාරණය කළහ.
උපදේශන සේවා ඇතුළුව තාක්ෂණික සේවා සපයන මධ්‍යස්ථානයක් හරහා කාන්තා සවිබල ගැන්වීම සහ ව්‍යවසායකත්වය කෙරෙහි අවධානය යොමු කරමින් ICC ඇකඩමිය සහ BCI හි වෘත්තීය සංවර්ධන මධ්‍යස්ථානය අතර යෝජිත සහයෝගීතාවවය පිළිබඳව මෙහිදී සාකච්ඡාවට බඳුන් විය.
ශ්‍රී ලංකා වාණිජ මණ්ඩලයේ සභාපති ශනිල් ප්‍රනාන්දු මෙහිදී අදහස් දක්වමින් තිරසරභාවය සඳහා අවශ්‍ය කැපවීම ඇතුළුව බිම් මට්ටම සඳහා පවතින ජාත්‍යන්තර වාණිජ මණ්ඩලයේ අවස්ථා පිළිබඳව සාකච්ඡාවට ලක් කළේය. සාමාන්‍ය පෙළ අසමත් තරුණ තරුණියන්ට නාවික ක්ෂේත්‍රයේ බලපත්‍ර සහ නිදහස් වෙළඳ කලාප රැකියා ලබා ගැනීමට හැකි වන පරිදි ‘බහු මාදිලියේ සැපයුම් සේවා සහ ප්‍රවාහන’ (Multi-Modal Logistics and Transportation) පාඨමාලාව පිළිබඳව ඔහු තම අදහස් ප්‍රකාශ කළේය. පුහුණුවීම් තුළින් සැපයුම් දාමයේ පවතින රැකියා හිඟය පියවීමේ අවශ්‍යතාව පිළිබඳව ද හෙතෙම මෙහිදී සඳහන් කළේය. තවද, ජාත්‍යන්තර වාණිජ මණ්ඩලයේ සැලකිය යුතු හිඩැස් පවතින ක්ෂේත්‍ර වන සයිබර් අපරාධ (Cyber-Crimes), කෘෂිකාර්මික අධ්‍යාපනය (Agricultural Education) සහ මූල්‍ය සාක්ෂරතාවය (Financial Literacy) වැනි විශේෂිත ක්ෂේත්‍ර සහ සංහිඳියාව සඳහා උසස් පෙළ අසමත් සිසුන්ට මග පෙන්වීමක් ලබා දිය යුතු බවට ඔහු මෙම සාකච්ජාවේදී යෝජනා කළේය.
ජාත්‍යන්තර වාණිජ මණ්ඩලයේ සභාපතිනී මාරියා ෆර්නැන්ඩා ගාර්සා මහත්මිය කාන්තා සවිබල ගැන්වීම සම්බන්ධව අදහස් ඉදිරිපත් කරමින්, ශ්‍රී ලංකාවේ ආර්ථිකයට සමගාමීව උද්‍යාන විද්‍යාව, කෘෂිකාර්මික වෙළඳාම සහ රූපලාවණ්‍ය ක්ෂේත්‍රය සමග සම්බන්ධ විය හැකි අංශ පිළිබඳව කතිකා කළාය. ජාත්‍යන්තර වාණිජ මණ්ඩලයේ නව කෘෂිකාර්මික ප්‍රතිපත්තිය සහ ආහාර සුරක්ෂිතතාවයට සහය වන ආහාර සුරක්ෂිතතා සහ සැපයුම් දාම කමිටුව සැලකිල්ලට ගනිමින් ඇය තාක්ෂණය මත පදනම් වූ කෘෂිකාර්මික අධ්‍යාපනය සඳහා මධ්‍යස්ථානයක් පිහිටුවීමට නිර්දේශ කළාය. ඒ සම්බන්ධයෙන් වන මූලික කරුණු තුනක් පිළිබඳව අවධාරණය කරමින් ගාර්සා මහත්මිය පරිසර හිතකාමීබාවයේ සහ සේවක සුබසාධනයේ ඇති වැදගත්කම පිළිබඳවද නැවත වරක් අවධාරණය කරමින් ආයතනයක සාර්ථකත්වය, සේවක යහපැවැත්ම සමගින් බැඳී පවතින බවට ප්‍රකාශ කළාය.
සමස්තයක් වශයෙන්, ජාත්‍යන්තර වාණිජ මණ්ඩලය වැනි පිළිගත් ගෝලීය ආයතනයක් සමග BCI හි සබඳතාවය හරහා සම්පත්, විශේෂඥතා දැනුම, දැක්ම සහ ජාලකරණය, අධ්‍යාපන වැඩසටහන් සහ නව අවස්ථා නිර්මාණය කරනු ඇත. ජාත්‍යන්තර වාණිජ මණ්ඩලයේ ගෝලීය ජාලය සහ සම්පත් (Global Network and Resources) සමග සහයෝගයෙන් කටයුතු කිරීම තුළින් නව අධ්‍යාපනය හා පුහුණුව වර්ධනය කිරීම් හරහා BCI හි වැඩසටහන් ඉදිරිපත් කිරීම තවත් පුළුල් කිරීමට හැකිය. මීට අමතරව, ජාත්‍යන්තර වාණිජ මණ්ඩලයෙහි විශේෂඥතාව සහ උසස් මට්ටමේ දැනුම තුළින් ඉහළ ඉල්ලුමක් පවතින වෘත්තීන් කෙරෙහි අවධානය යොමු කරන පාඨමාලා නිර්මාණය කිරීමට හැකිවේ.
එපමණක් නොව, ව්‍යවසායකත්වය සහ කාන්තාවන් සවිබල ගැන්වීම සඳහා පූර්ව ලියාපදිංචි තක්සේරු මධ්‍යස්ථානයක් පිහිටුවීමේදී ජාත්‍යන්තර වාණිජ මණ්ඩලය මගින් ලැබෙන සහයෝගය BCI හි නවෝත්පාදන සහ ව්‍යවසාය නංවාලීම සඳහා වැදගත් කාර්යභාරයක් ඉටු කරයි.
ජාත්‍යන්තර වාණිජ මණ්ඩලය මගින් හිමිවන අනුමැතිය හරහා BCI හි අධ්‍යාපනික ගුණාත්මකභාවය ද, ඒ තුළින් BCI සරසවියෙහි සාධනීය ප්‍රතිරූපය ඉහළ නැංවීමට අවස්ථාව හිමිවේ. මීට අමතරව, ජාත්‍යන්තර වාණිජ මණ්ඩලයේ ප්‍රධාන ආයතනික සාමාජිකත්වය සමග අනාගත සහයෝගීතාවයන්, සීමාවාසික පුහුණුව වැනි කටයුතු මගින් BCI සිසුන්ට ප්‍රතිලාභ හිමිකර ගැනීමේ අවස්ථා ද සැලසේ.
The post BCI Campus හි සත්කාරකත්වය දරන ජාත්‍යන්තර වාණිජ මණ්ඩලයේ සභාපති මෙරටේ තරුණයන්ගේ පුහුණුව සහ අධ්‍යාපන කටයුතු වැඩි දියුණුවට මුලපුරයි appeared first on Adaderana Biz Sinhala | Sri Lanka Business News.
Source From biz.adaderana
Author: Bizweb2 Bizweb2
#SriLanka #News #lka