සියයට 7ක් කොමිස් ගෙවා ඩොලර් බිලියන 2.5ක ණයක් ගන්න යන හේතුව ඇමති ගම්මන්පිල පහදයි

ලංකා ඛනිජ තෙල් සංස්ථාව ලංකා බැංකුවට හා මහජන බැංකුවට ඩොලර් බිලියන 3.6 ක් ණය බවත්, එම ඩොලර් ණය සඳහා වාර්ෂිකව 5.5% ක පොළියක් ගෙවනු ලබන බවත් බලශක්ති අමාත්‍ය උදය ගම්මන්පිල මහතා පවසයි. අද (11) පැවති මාධ්‍ය හමුවක දී අමාත්‍යවරයා මේ බව අනාවරණය කළේය. එසේම සියයට 7 ක කොමිස් මුදලක් ගෙවා ඩොලර් බිලියන 2.5ක ණයක් ගැනීමට යන බවට තමාට එල්ල වී ඇති චෝදනාව සම්බන්ධයෙන් අමාත්‍යවරයා වැඩිදුරටත් මෙහිදී කරුණු පැහැදිලි කළේය.

මෙහිදී අදහස් දැක්වූ බලශක්ති අමාත්‍ය උදය ගම්මන්පිල මහතා,

“අනුර කුමාර දිසානායක මන්ත්‍රීතුමත්, ආචාර්ය හර්ෂ සිල්වා මන්ත්‍රීතුමාත් තෙල් සංස්ථාව විශාල කොමිස් මුදලක් ගෙවලා ඩොලර් බිලියන 2.5ක ණය මුදලක් ගන්න යන බවට මාධ්‍ය ඉදිරියේත් පාර්ලිමේන්තුවේ දීත් චෝදනාවක් කළා. ඇත්තෙන්ම ඛනිජ තෙල් සංස්ථාව ඩොලර් බිලියන 3.6 ක් රාජ්‍ය බැංකු දෙකට, ලංකා බැංකුවට සහ මහජන බැංකුවට ණයයි. මේ ඩොලර් ණය සඳහා අපි වාර්ෂිකව 5.5% ක පොළියක් ගෙවනවා. ඒ අතරේ පසුගිය වසර ගණනාවක් තෙල් සංස්ථාවට විවිධ යෝජනා ලැබිලා තිබුණා, ඊට වඩා අඩු පොළියට අපිට ණය අරන් දෙන්න පුළුවන් කියලා. මේ යෝජනා නොසලකා හිටියොත් අඩුපොළියට ණය ගැනීමේ හැකියාව තිබිය දී සංස්ථාව වැඩි පොළියට ණය අරගෙන ජනතාව මත බර පටවනවා කියන චෝදනාව එල්ල වෙන්න පුළුවන්. ඒ නිසා ප්‍රසිද්ධ දැන්වීමක් පළකරලා විධිමත් යොජනා කැඳවීමකින් අඩු පොළියට ණය ලබා ගැනීම සඳහා කැබිනට් මණ්ඩලයේ අවසරය මම ඉල්ලා සිටියා. මුදල් අමාත්‍යාංශයේ නිරීක්ෂණය වුණේ මේ වෙලාවේ ප්‍රසිද්ධ දැන්වීමක් පළකරලා, ඩොලර් ණය මේ වගේ දැවැන්ත මුදලක් ගන්න යන විට කවුරුවත් ඉදිරිපත් වුණේ නැතිනම් ආණ්ඩුව විසින් දැනට විදේශවලින් ඩොලර් ණය ගැනීමට දරන උත්සාහයට අවාසිදායක ලෙස බලපාන්න පුළුවන්. ඒ නිසා අලුතෙන් යෝජනා කැඳවීමක්, ප්‍රසිද්ධ දැන්වීමකින් කරන්නේ නැතුව මුදල් අමාත්‍යාංශය විසින් පත්කරන ප්‍රසම්පාදන කමිටුවක් හරහා ලැබිලා තියෙන යෝජනා ඇගයීමකට ලක්කරලා පිළිගත හැකි යෝජනාවක් තියෙනවා නම් ඒක භාර ගන්න කියලා මුදල් අමාත්‍යාංශය නිර්දේශ කරලා තිබුණා. ඒකට තමයි අමාත්‍ය මණ්ඩලයේ අනුමැතිය ලැබුණේ.

“ඒ ඉදිරිපත් වී තිබුණු යෝජනා අතුරෙන් රජයේ ස්වෛරී ඇපකරයක් මත ණය දෙන්න කැමති වී සිටියේ එකම එක සමාගමයි. ඒ තමයි ඇමරිකා එක්සත් ජනපදයේ නිව්ජර්සිවල පිහිටි BSL America Incorporation කියන සමාගම.  අනෙක් අය ත්‍රිත්ව A ශ්‍රේණිගත කිරීම් තියෙන බැංකුවකින් හරි, ලෝකයේ ප්‍රමුඛතම බැංකු 25න් එකකින් හරි ඇපකරයක් ඉල්ලා සිටියා. ඒ නිසා මේ සමාගමෙන් අදාළ ණය මුදල ලබා ගැනීමට ප්‍රසම්පාදන කමිටුව තීරණය කරලා ඔවුන්ගේ නිර්දේශය මම අමාත්‍ය මණ්ඩලයට ඉදිරිපත් කළා. ඒ අය සියයට 7 ක ගාස්තුවක් අයකරන බව ඇත්තක්. ඒ පිළිබඳව ප්‍රසම්පාදන කමිටුව ප්‍රශ්න කළ අවස්ථාවේ ඔවුන් කියා තිබුණේ, ලංකාව ශ්‍රේණිගත කිරීම්වල ඉතාම පහත් තැනක තියෙන්නේ, ඛනිජ තෙල් නීතිගත සංස්ථාව කියන්නෙත් දැඩි මූල්‍ය අර්බුදයකට ලක්වෙලා තියෙන ආයතනයක්. ඒ නිසා මේ ණය මුදල ලබා දීමේ අපිට තියෙන අවදානම යම්දුරකට ආවරණය කර ගන්න අපිට රක්ෂණය කරන්න විශාල මුදලක් ගෙවන්න වෙනවා. ඒ නිසා මේ මුදල අඩුකරන්න බැහැ කියලා. අපේ පැත්තෙන් බැලුවාම මේ සියයට 7 කපා හරින්නේ සමස්ත මුදලෙන්. ඒ කියන්නේ මේ අයගේ පොළී අනුපාතය සියයට 3 යි. සියයට 3 යි කිව්වාට 7 ක් කපා ගන්න හින්දා අපිට හම්බුවෙන්නේ 93 යි. අපි පොළිය ගෙවන්නේ සියයට 3 ක් නෙමෙයි, 93 ට 3 ක්. ඒක 100 ට ගණන් හදලා බැලුවාම සියයට 3.23 යි. අපි දැන් බැංකුවලින් ණය ගත්තාම කීයක් පොළී ගෙවනවාද? 5.5ක්. එහෙම බලද්දී මිලියන ගණනක ඉතිරියක් අපිට වාර්ෂිකව කරන්න පුළුවන්, මේ ණය මුදල ලබා ගත්තොත්. ඒ නිසා මේක වාසිදායක යෝජනාවක් විදියට අපිට අමාත්‍ය මණ්ඩලයට පෙනුණා. මෙතරම් දැවැන්ත මුදලක් ඔය කියන ආයතනය අපිට ලබා දේවි කියලා මම නම් විශ්වාස කරන්නේ නැහැයි කියන එකත් මම අමාත්‍ය මණ්ඩලයට මෙම පත්‍රිකාව ඉදිරිපත් කරපු අවස්ථාවේ දීම දැනුම් දුන්නා. නමුත් මෙවැනි යෝජනාවක් නොසලකා හැරියොත්, අඩු පොළියට ණය ගන්න අවස්ථාව දීලා තිබිය දී, තෙල් සංස්ථාව එය නොසලා හැරියාය කියන චෝදනාවෙන් ගැලවෙන්න තමයි මෙම ණය මුදල සම්බන්ධයෙන් අපි වැඩකරගෙන ගියේ. ලැබුණොත් හොඳයි, නොලැබුණොත් ඉතින් කරන්න දෙයක් නැහැ.“

The post සියයට 7ක් කොමිස් ගෙවා ඩොලර් බිලියන 2.5ක ණයක් ගන්න යන හේතුව ඇමති ගම්මන්පිල පහදයි appeared first on Adaderana Biz Sinhala | Sri Lanka Business News.