සමන්ත කුමාරසිංහ මුදල් මණ්ඩලයෙන් ඉවත්වෙයි

ශ්‍රී ලංකා මහ බැංකුවේ මුදල් මණ්ඩල සාමාජිකයෙකු වශයෙන් කටයුතු කළ ව්‍යාපාරික සමන්ත කුමාරසිංහ මහතා පසුගිය සතියේ දී සිය ඉල්ලා අස්වීම භාර දී ඇත.

මේ අතර ඊයේ (10) දිනයේ දී ශ්‍රී ලංකා මහ බැංකු අධිපති ආචාර්ය පී. නන්දලාල් වීරසිංහ මහතා කියා සිටියේ, මුදල් මණ්ඩලයේ සාමාජිකයන් ලෙස පත් කරන ලද ජනාධිපති නීතීඥ සංජීව ජයවර්ධන මහතා සහ ආචාර්ය රානී ජයමහ මහත්මිය මුදල් මණ්ඩලයේ අඛණ්ඩව සේවය කිරීමට එකඟ වීම ගැන ශ්‍රී ලංකා මහ බැංකුවේ නව අධිපතිවරයා ලෙස තමන් ඉමහත් සතුටට පත්වන බවයි.

මේ අනුව වත්මන් මුදල් මණ්ඩලයේ සාමාජිකත්වය පහත පරිදි වනු ඇත.

ආචාර්ය පී. නන්දලාල් වීරසිංහ, අධිපති – මුදල් මණ්ඩලයේ සභාපති
කේ. එම්. එම්. සිරිවර්ධන, භාණ්ඩාගාර හා මුදල් අමාත්‍යංශ ලේකම් – නිල සාමාජික
ජනාධිපති නීතීඥ සංජීව ජයවර්ධන – පත් වූ සාමාජික
ආචාර්ය රාණි ජයමහ – පත් වූ සාමාජික

ශ්‍රී ලංකා මහ බැංකුව සංස්ථාපිත ආයතනයක් නො වන නිසා එයට ම ආවේණික වූ නීතිමය ව්‍යුහයක් මහ බැංකුවට ඇත. මුදල් නීති පනතට අනුව සියලු ම බලතල සහ කාර්යයන් හිමි මුදල් මණ්ඩලයට සංස්ථාපිත වගකීම පැවරී ඇත. පාලන අධිකාරිය ලෙස මහ බැංකුවේ කළමණාකරණයට, මෙහෙයුමට සහ පරිපාලනයට සම්බන්ධ සියලු ම ප්‍රතිපත්ති තීරණ ගැනීම සඳහා මුදල් මණ්ඩලය වගකිව යුතු ය.

මහ බැංකු මුදල් මණ්ඩලය සාමාජිකයින් පස් (5) දෙනෙකුගෙන් සමන්විත ය.

අධිපති

මුදල් අමාත්‍යාංශයේ ලේකම් (නිල බලයෙන්)

විධායක නො වන සාමාජිකයින් තිදෙනෙකු (3)

අධිපති මුදල් මණ්ඩලයේ සභාපතිවරයා වන අතර මහ බැංකුවේ ප්‍රධාන විධායක නිලධාරියා ලෙස ද ක්‍රියා කරයි. මුදල් අමාත්‍යවරයාගේ නිර්දේශ මත ජනාධිපති විසින් අධිපති සහ මුදල් මණ්ඩලයේ විධායක නො වන සාමාජිකයින් පත් කරනු ලැබේ. මුදල් මණ්ඩලයේ විධායක නො වන සාමාජිකයින් පත් කිරීම සඳහා ව්‍යවස්ථාපිත මණ්ඩලයේ අනුමැතිය අවශ්‍ය වේ. අධිපතිගේ සහ මුදල් මණ්ඩලයේ විධායක නො වන සාමාජිකයින්ගේ නිල කාලය අවුරුදු හය (6) කි. මුදල් මණ්ඩල රැස්වීම් සඳහා සාමාජිකයින් තිදෙනෙකුගෙන් (3) යුතු ගණපූරණයක් තිබිය යුතු ය. මුදල් මණ්ඩලයේ තීරණ වලංගු වීම සඳහා සාමාජිකයින් තිදෙනෙකුගේ (3) අනුමැතිය අවශ්‍ය වේ. කෙ සේ වුවත් ඒකමතික තීරණයක් ගැනීමට අවශ්‍ය වූ විටක දී සාමාජිකයින් පස් (5) දෙනාගේ ම අනුමැතිය අනිවාර්ය වේ.

The post සමන්ත කුමාරසිංහ මුදල් මණ්ඩලයෙන් ඉවත්වෙයි appeared first on Adaderana Biz Sinhala | Sri Lanka Business News.