SRMW ව්‍යාපෘතිය වෙනුවෙන් මෙම පර්යේෂණය මෙහෙයවා ඇත්තේ ප්‍රතිපත්ති අධ්‍යයන ආයතනයයි (IPS). ආර්ථිකය යළි නඟා සිටුවීමේදී ශ්‍රමිකයින්ගේ හැකියාවන් හා අභිලාෂ හඳුනාගෙන සමාජය හා බද්ධ කිරීම සඳහා වන අභියෝග කෙරෙහි අවධානය යොමු කරන මෙම පර්යේෂණය මඟින් නැවත පැමිණි සංක්‍රමණික සේවකයන් පිළිබඳව පවතින තොරතුරු සහ දත්ත අන්තරය පූරණය කරයි. මෙම ව්‍යාපෘතිය සඳහා නියැදිය තෝරාගෙන ඇත්තේ අනුරාධපුර, මහනුවර, කුරුණෑගල, පුත්තලම සහ වවුනියාව යන තෝරාගත් දිස්ත්‍රික්කවල විදෙස් රැකියා සඳහා ගොස් පැමිණි පුද්ගලයින් වන අතර ඉන් බහුතරය විදේශ රැකියාවල නිරතව පැමිණි කාන්තාවන් වේ.
පර්යේෂණ වාර්තාව පිළිගැන්වීමේ අවස්ථාවට සහභාගී වූ ප්‍රතිපත්ති අධ්‍යයන ආයතනයේ (IPS) පර්යේෂණ නියෝජිත ආචාර්ය බිලේෂ වීරරත්න ප්‍රමුඛ කීර්තිමත් විශේෂඥ මණ්ඩලයක් විසින් ප්‍රතිපත්ති සම්පාදකයින් වෙත වාර්තාව පිළිබඳ දළ විශ්ලේෂණයක් ඉදිරිපත් කරන ලදී. එහිදී නිපුණතා සංවර්ධනය, ස්වයං රැකියා සහ ව්‍යවසායකත්වය, පුනරුත්ථාපන සේවා සහ ස්ත්‍රී පුරුෂ සමාජභාවය පදනම් කර ගත් අභියෝග පිළිබඳ සාකච්ඡාවට ලක් කරන ලදී. සාකච්ඡා මණ්ඩපය සමන්විත වූයේ අධ්‍යාපන අමාත්‍යාංශයේ නිපුණතා සංවර්ධන අධ්‍යක්ෂ දසිත නිරෝෂන්, කාන්තා හා මාධ්‍ය සාමූහිකයේ කාන්තා ආර්ථික අයිතීන් සහ මාධ්‍ය අධ්‍යක්ෂ ආචාර්ය සේපාලි කෝට්ටේගොඩ, ‘Venture Frontier Sri Lanka’හි සම නිර්මාතෘ සහ අධ්‍යක්ෂක හේමින්ද ජයවීර සහ විදේශ රැකියා අමාත්‍ය උපදේශක පද්මිණී රත්නායක යන මහත්ම මහත්මීන්ගෙනි.
මෙම අවස්ථාවට සහභාගී වූ කම්කරු හා විදේශ රැකියා අමාත්‍යාංශයේ ලේකම් ආර්.පී.ඒ. විමලවීර මහතා පැවසුවේ, බොහෝ ශ්‍රී ලාංකිකයන් රැකියා සඳහා සංක්‍රමණය වීමත් සමඟ ඔවුන් ආපසු පැමිණීමෙන් පසු නැවත සමාජගත කිරීමට සුදුසු සහ ඵලදායී ක්‍රම හඳුනා ගැනීම නිරන්තර අවශ්‍යතාවක් බවත් මෙම පර්යේෂණයේ නිගමන සංක්‍රමණික සේවකයින් නැවත සමාජය හා බද්ද කිරීම සඳහා අවැසි උපක්‍රම හා ප්‍රතිපත්ති වැඩිදියුණු කිරීම සඳහා ප්‍රයෝජනවත් වනු ඇති බවත්ය.
ශ්‍රී ලංකාවේ ස්විස්ටර්ලන්ත තානාපති කාර්යාලයේ නියෝජ්‍ය දූත මණ්ඩල ප්‍රධානී, රාවුල් ඉම්බඛ් මහතා විසින් ආරක්ෂිත ශ්‍රම සංක්‍රමණ වැඩසටහනේ SRMW ව්‍යාපෘතියේ කාර්යභාරය අවධාරණය කරමින් පවසා සිටියේ, සංවර්ධන සහ සහයෝගීතාවය සඳහා වන ස්විස් ඒජන්සිය (SDC) විසින් ආරම්භ කර ඇති සුරක්ෂිත ශ්‍රම සංක්‍රමණ වැඩසටහනෙහි මූලික අරමුණ වන්නේ නැවත පැමිණෙන සංක්‍රමණික සේවකයින්ගේ ඔරොත්තු දීමේ හැකියාව වර්ධනය කිරීම බවයි. එය මේ වන විට සිව්වන අදියරෙහි ක්‍රියාත්මක වන බව පැවසු ඒ මහතා වැඩි දුරටත් පවසා සිටියේ, SRMW ව්‍යාපෘතියට අරමුදල් යෙදවීමෙන් ශ්‍රී ලංකාවේ ජාතික කම්කරු සංක්‍රමණ ප්‍රතිපත්තිය වැඩිදියුණු කිරීම සඳහා සහය දැක්වීමට අපේක්ෂා කරන බවත්, ජාතික කම්කරු ප්‍රතිපත්ති ක්‍රියාවට නැංවීම මඟින් සංක්‍රමණික සේවකයින් සවිබල ගැන්වීමට අඛණ්ඩව සහයෝගය ලබාදෙන බවත්ය.
ශ්‍රී ලංකාවේ සංක්‍රමණික සේවකයින් සවිබල ගැන්වීම සඳහා ‘ජාත්‍යන්තර සංවර්ධනය සඳහා වූ එක්සත් ජනපද නියෝජිතායතනය’හි (USAID) කැපවීම පිළිබඳව අවධාරණය කරමින් එහි ශ්‍රී ලංකාවේ හා මාලදිවයිනේ වැඩබලන නියෝජ්‍ය දූත මණ්ඩල අධ්‍යක්ෂ, අලි එසට්යාර් මහතා පැවසුවේ “බොහෝ ශ්‍රී ලාංකිකයන් විදේශගතවීම සඳහා අවස්ථා සොයමින් සිටින අවධියක ජාත්‍යන්තර සංවර්ධනය සඳහා වූ එක්සත් ජනපද නියෝජිතායතනයේ අරමුණ වන්නේ ඔවුන් රටින් පිටවීමෙන් ඔවුන්ටත් රටටත් ඇතිවිය හැකි අහිතකර බලපෑම් අවම කිරීම සහ නැවත පැමිණි ශ්‍රමිකයින් විදේශයන්හි ලබාගත් අත්දැකීම් ශ්‍රී ලංකාවේ සංවර්ධනය සඳහා යොදා ගැනීමට අවැසි සහයෝගය ලබාදීමටයි” යනුවෙනි.
නිපුණතා සංවර්ධනය සහ පිළිගැනීම මඟින් ශ්‍රී ලංකාවේ සංක්‍රමණික සේවකයන්ට සමාජයට ඔරොත්තු දීමේ හැකියාව වැඩිදියුණු කිරීම සඳහා වන මාර්ගෝපදේශ සේවා සහ තොරතුරු වෙත ප්‍රවේශය ලබාදීම SRMW ව්‍යාපෘතියේ පුරෝගාමී අරමුණකි. එසේම මෙම පර්යේෂණය SRMWහි ප්‍රතිපත්ති සම්බන්ධ මැදිහත්වීම් අතර පළමුවැන්න සනිටුහන් කරයි.
සමුහ ඡයාරූපය
‘විදෙස්ගතව සිට නැවත සිය රට පැමිණෙන ශ්‍රමිකයන් සතු කුසලතාවයන්, ඔවුන්ගේ අභිලාෂයන් සහ ඔවුන් නැවත සමාජගත කිරීමේ අභියෝග: ශ්‍රී ලංකාවේ තෝරාගත් දිස්ත්‍රික්ක වලින් ලබාගත් සාක්ෂි / තොරතුරු ඇසුරින්’ වාර්තාවේ පළමු ප්‍රකාශය Youlead නියෝජ්‍ය ව්‍යාපෘති අධ්‍යක්ෂ ක්‍රිෂාන් පෙරේරා මහතා විසින් කම්කරු හා විදේශ රැකියා අමාත්‍යාංශයේ ලේකම් ආර්.පී.ඒ.විමලවීර මහතා වෙත පිළිගැන්වීමෙන් අනතුරුව, වාර්තාවේ පිටපත් ශ්‍රී ලංකාවේ සහ මාලදිවයිනේ ස්විස්ටර්ලන්ත තානාපති කාර්යාලයේ නියෝජ්‍ය දූත මණ්ඩල ප්‍රධානී ගරු රාවුල් ඉම්බඛ් මහතා (Raoul Imbach) සහ සංවර්ධනය සඳහා වන එක්සත් ජනපද නියෝජිතායතනයේ (USAID ) ශ්‍රී ලංකා සහ මාලදිවයිනේ වැඩබලන නියෝජ්‍ය දූත මණ්ඩල අධ්‍යක්ෂ අලි එසට්යාර් (Ali Ezzatyar) මහතා වෙත ද පිළිගන්වන ලදී.
ඡායාරූපයෙහි සිටින අනෙක් මහත්ම මහත්මීන් :
සංවර්ධනය සහ සහයෝගීතාවය සඳහා වූ ස්විස් ඒජන්සිය (SDC)ජාතික වැඩසටහන් නිලධාරී ඉමැක්ෂන් එමානුවෙල් (Eimackshan Emmanuel) මහතා, සංවර්ධන ය සඳහා වන ස්විස්ටර්ලන්ත ජ්‍යෙෂ්ඨ ජාතික වැඩසටහන් නිලධාරී රංගිතා බාලසූරිය මහත්මිය, සංවර්ධනය සඳහා වන එක්සත් ජනපද නියෝජිතායතනයේ (USAID) ආර්ථික වර්ධන කාර්යාලයේ නියෝජ්‍ය අධ්‍යක්ෂ මයික් ග්ලෝබසන් (Micah Globerson) මහතා, ව්‍යාපෘති කළමනාකරණ ආචාර්ය ජනක විජයසිරි මහතා , ප්‍රතිපත්ති අධ්‍යයන ආයතනයේ (IPS) පර්යේෂණ සහකාර ආචාර්ය බිලේෂ වීරරත්න මහතා සහ SRMW ව්‍යාපෘති අධ්‍යක්ෂ රුක්ෂාන් ලවෙල් (Rukshan Lovell) මහතා.
The post සංක්‍රමණික සේවකයින් ප්‍රතිසංවිධානය කිරීමේ අභියෝග පිළිබඳව ප්‍රතිපත්ති සම්පාදකයින්ට මඟ පෙන්වන පර්යේෂණයක් appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka