මෙහිදී වැඩිදුරටත් අදහස් දැක්වූ ශ්‍රී ලංකා මහ බැංකු අධිපති මහාචාර්ය ඩබ්. ඩී. ලක්ෂ්මන් මහතා,
“මහ බැංකුවේ මුදල් ප්‍රතිපත්ති ස්ථාවරය නොවෙනස්ව පවත්වා ගැනීමට මුදල් මණ්ඩලය ඊයේ (07) තීරණය කළා. මෙම තීරණයට එළඹීමේ දී මුදල් මණ්ඩලය දේශීය හා ගෝලීය වශයෙන් වන සාර්ව ආර්ථික තත්ත්වයන් සහ ආර්ථිකය මුහුණ දෙන විවිධ අවදානම් සැලකිල්ලට ගත්තා. විදේශ ණය සේවාකරණ වගකීම් හා විද්ශීය සංචිත තත්ත්වය පිළිබඳ සැලකීමේ දී රජය සහ මහ බැංකුව වඩා අභියෝගාත්මක කාලපලරිච්ඡේදයක් මධ්‍යයේ දැනට අපි ඉන්නේ. එසේ වුවත් රටේ අඛණ්ඩ ණය සේවාකරණය සහතික කිරීම සඳහා පියවර ගණනාවක් අපි ගත්තා. කොවිඩ් 19 වසංගතය, සංචාරක ඉපැයීම් සහ සමහර ආයෝජන ලැබීම් කෙරෙහි අවාසිදායක ලෙස විශාල වශයෙන් බලපාලා තිබෙනවා. අත්‍යාවහ්‍ය නොවන විදේශීය ගෙවීම් සීමා කිරීමට පියවර ගෙන තිබෙනවා. මෙම පියවර නිසා ආර්ථිකයේ සමහර අංශවල අහිතකර බලපෑම් ඇතිවිය හැකි වුවත් මෙම පියවර ගන්නේ සමස්තයක් ලෙස රටේ අභිවෘද්ධිය සඳහා යන්න අවධාරණය කළ යුතුයි. සැලකිය යුතු ණය සේවාකකරණ වගකීම් විශාල ප්‍රමාණයක් සපුරාලන අතරේම නිල විදේශීය සංචිත 2021 ජුනි මාසයේදීත් අපි ඊට පෙර මාසයේ පැවති තත්ත්වයේම නොවෙනස්ව පවත්වා ගැනීමට පුළුවන්කම ලැබුවා.“
“මීට දින කිහිපයකට පෙර නිකුත් කරන ලද සවිස්තර මාධ්‍ය නිවේදනයක් මගින් රජයට, මහ බැංකුවට, මූල්‍ය අංශයට සහ සමාගම් අංශයට අපේක්ෂිත ලැබීම් පිළිබඳව මා කිසියම් විස්තරයක් කර තිබෙනවා. අපගේ විදේශීය අංශයේ තත්ත්වය කාලයත් සමඟ ක්‍රමයෙන් වැඩිදියුණු වීමක් සිදුවනු ඇතැයි අප විශ්වාස කරන බව නැවතත් අවධාරණය කරන්නට කැමතියි. අනවශ්‍ය ලෙස ආර්ථිකය යහපතට වඩා හානියක් කළ හැකි සමපෙක්ෂණවලට එරෙහිව රට වෙනුවෙන් අප සමග කටයුතු කරන ලෙස මා මාධ්‍යවේදීන්ගෙන්, ව්‍යාපාරික ප්‍රජාවෙන් සහ මහජනතාවගෙන් ඉල්ලා සිටිනවා.“
“ආර්ථික ක්‍රියාකාරකම් සැලකූ විට විශේෂයෙන් පළමු කාර්තුවේ බොහෝ අංශවල ධනාත්මක වර්ධනයක් දක්නට ලැබුණු බව අපි සතුටෙන් මතක් කරන්න කැමතියි. කාර්මික නිෂ්පාදන දර්ශකය, කෘෂිකාර්මික අංශයේ ක්‍රියාකාරීත්වය, විදේශීය වෙළෙඳාම හා බැංකු ණය වැනි දැනට පවත්නා දත්ත මත පදනම්ව පළමු කාර්තුව සඳහා කලින් අපේක්ෂා කළ වර්ධනයට වඩා ඉහළ වර්ධනයක් අපි අපෙක්ෂා කරමින් ඉන්නවා. කොවිඩ් ආශ්‍රිතව රට වසා දැමීම ක්‍රමයෙන් ඉවත් කිරීමත්, එන්නත් කිරීමේ ක්‍රියාවලිය පූර්ණ ලෙස සිදුවීමත් සමඟ වසරේ අවසාන කාර්තුව වන විට ආර්ථිකය සැලකිය යුතු ලෙස යථා තත්ත්වයට පත්වනු ඇතැයි අපි අපේක්ෂා කරනවා. රාජ්‍ය මූල්‍ය සහ මූල්‍ය ප්‍රතිපත්ති, ෆිස්කල් සහ මූල්‍ය ප්‍රතිපත්ති සහයෝගය මෙන්ම දේශීය ව්‍යවසායකයන් සඳහා සහාය වන රජයේ වර්ධන ආධාරක ප්‍රතිපත්ති ආර්ථිකයේ අපේක්ෂිත ඉහළ වර්ධන මාවත කරා යොමුකිරීමට උපකාරී වනු ඇත. එසේම වරාය නගර සංවර්ධන ව්‍යාපෘතිය සාර්ථකව ක්‍රියාත්මක කිරීම ආර්ථිකයට අමතර උත්තේජනයක් ලබා දෙනු නිසැකයි.“
“මීට පෙර අවස්ථා ගණනාවක දී සඳහන් කර ඇති පරිදි අපි ‘ණය රහිත රටක්‘ යන පරමාදර්ශය කරා ගමන් කිරීමට කටයුතු කරමින් ඉන්නේ. ‘ණය රහිත‘ යනු ණය ශූන්‍ය යන අර්ථය නොව, පහසුවෙන් කළමනාකරණය කළ හැකි මට්ටමක ණය ප්‍රමාණයක් පවත්වා ගැනීම යනුවෙන් මා නිර්වචනය කරනවා. පරමාදර්ශ යනු සාක්ෂාත් කර ගැනීම දුෂ්කර නමුත්, අපට මඟ පෙන්වීම සඳහා හැමවිටම පැවතිය යුතු මූලික හරයක්. මෙයින් අදහස් වන්නේ අප විදේශීය හා දේශීය ණය යන දෙකම මැනවින් හසුරුවා ගත යුතු බවයි. ඉහත පරමාදර්ශය සාක්ෂාත් කර ගැනීමට උත්සාහ කිරීමේ දී ඕනෑම රටකට විවෘතව ඇති හොඳම විකල්පය ස්ථායිතාව පිළිබඳ අරමුණ ගැන අමතක නොකර මූර්ත අංශයේ සංවර්ධනය කෙරෙහි අවධානය යොමු කිරීමයි.“
The post ශ්‍රී ලංකාව ‘ණය රහිත රටක‘ පරමාදර්ශය කරා – මහ බැංකු අධිපති appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka