ජනාධිපති රනිල් වික්‍රමසිංහ මැතිතුමා ශ්‍රී ලංකාවේ 75 වැනි නිදහස් දින සංවත්සරය අතරතුර “Look Africa” යනුවෙන් අරඹන ලද මුලපිරීමේ පසු විපරමක් වශයෙන් මෙම සංවාදය පවත්වන ලදී. ඒ අනුව, ශ්‍රී ලංකාවේ 75 වැනි නිදහස් දින උත්සවයට සමගාමීව 2023 පෙබරවාරි 3 වැනි දින විදේශ කටයුතු අමාත්‍යංශයේ දී පළමු ශ්‍රී ලංකා-අප්‍රිකා ව්‍යාපාරික සංවාදය පවත්වන ලදී.
මෙම පසු විපරම් සංවාදයේ ආරම්භක දේශනය සිදු කළ විදේශ කටයුතු අමාත්‍ය අලි සබ්රි මැතිතුමා, ශ්‍රී ලංකාවේ දේශපාලන හා ආර්ථික න්‍යාය පත්‍රය අප්‍රිකාව තුළ යළි පුබුදුවාළීම, වේගවත් කිරීම සහ තීව්‍ර කිරීම සම්බන්ධයෙන් රජය සතු ප්‍රතිපත්තිවල කාලෝචිත ස්වභාවය පිළිබඳව අවධාරණය කළ අතර, අප්‍රිකානු රටවල් සමඟ සහයෝගිතාව ගොඩනැගීම සඳහා වඩාත් සමීප ආර්ථික උපායමාර්ග යොදාගැනීමේ වැදගත්කම ද පෙන්වා දුන්නේ ය. ශ්‍රී ලංකාවේ සමාගම්වලට සාපේක්ෂ වශයෙන් ප්‍රතිලාභ හිමි වන ඉලක්කගත ප්‍රමුඛතා ක්ෂේත්‍ර පිළිබඳව ශ්‍රී ලංකාවේ ව්‍යවසායකයින් සිය අවධානය යොමු කළ යුතු බවද අමාත්‍යවරයා මෙහිදී වැඩිදුරටත් ප්‍රකාශ කළේ ය.
ප්‍රයිස් වෝටර්හවුස් කූපර්ස් මහතා, ශක්තිමත් ආර්ථික හවුල්කාරිත්වයක් වර්ධනය කරගැනීම සඳහා ශ්‍රී ලාංකික සමාගම්වලට අප්‍රිකානු කලාපය තුළ නිරත විය හැකි ශක්‍යතා සහිත ක්ෂේත්‍ර පිළිබඳ ඉදිරිපත් කිරීමක් සිදු කළ අතර, LOLC සමාගමේ නියෝජිතයෙකු, ක්ෂුද්‍ර මූල්‍ය සහ මූල්‍ය ක්ෂේත්‍රවලට අදාළව අප්‍රිකානු කලාපය තුළ එම සමාගම ලද සාර්ථකත්වය පිළිබඳව විස්තර කළේ ය.
විදේශ කටයුතු රාජ්‍ය අමාත්‍ය තාරක බාලසූරිය මැතිතුමා, විදේශ කටයුතු ලේකම් අරුණි විජේවර්ධන මහත්මිය සහ විදේශ කටයුතු අමාත්‍යංශයේ ජ්‍යෙෂ්ඨ නිලධාරිහු මෙම අන්තර් ක්‍රියාකාරී සංවාදය සඳහා සහභාගි වූහ. අප්‍රිකාව සඳහා අක්ත ගන්වන ලද ශ්‍රී ලංකා දූත මණ්ඩල ප්‍රධානීහු සහ අප්‍රිකාවේ සිටින ශ්‍රී ලංකා නිර්වේතනික කොන්සල්වරු ද මෙම අවස්ථාවට අතථ්‍ය අයුරින් සහභාගි වූහ. ශ්‍රී ලංකාවේ සිටින අප්‍රිකානු නිර්වේතනික කොන්සල්වරු ද මෙම සංවාදයට සම්බන්ධ වූහ. අප්‍රිකානු මහාද්වීපය තුළ සිය අත්දැකීම් බෙදාහදා ගැනීමටත්, තම ව්‍යාපාර පුළුල් කිරීමටත් අපේක්ෂා කරන ප්‍රමුඛ පෙළේ ව්‍යාපාරික නායකයන් සහ සමාගම් විශාල සංඛ්‍යාවක් මෙම සංවාදය සඳහා සක්‍රීයව සහභාගි වූහ.
The post ශ්‍රී ලංකා – අප්‍රිකා හවුල්කාරිත්වය වේගවත් කිරීම සඳහා විදේශ කටයුතු අමාත්‍යංශයෙන් ව්‍යාපාර සංවාදයක් appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka