මේ සම්බන්ධයෙන් ජනාධිපතිවරයා වෙත යවන ලද සම්පූර්ණ ලිපිය පහතින් දැක්වේ.
2022 අප්‍රේල් 19
අතිගරු ජනාධිපති ගෝඨාභය රාජපක්ෂ,
ශ්‍රී ලංකා ප්‍රජාතාන්ත්‍රික සමාජවාදී ජනරජය,
ජනාධිපති ලේකම් කාර්යාලය,
කොළඹ 01
අතිගරු ජනාධිපතිතුමනි,
වත්මන් ආර්ථික හා දේශපාලන තත්වය
පෞද්ගලික අංශයේ නියෝජිතයන් වන ඒකාබද්ධ වාණිජ මණ්ඩලයන් විසින් ශ්‍රී ලංකා රජය ජාත්‍යන්තර මූල්‍ය අරමුදල සමඟ සාකච්ඡා ආරම්භ කරමින්, ණය ප්‍රතිව්‍යුහගත කිරීමේ ක්‍රියාවලියට මඟ පෙන්වීම සඳහා නීතිමය හා මූල්‍ය උපදේශකයින් තෝරා ගැනීම සහ එම ක්‍රියාවලියේ පළමු පියවර ලෙස විදේශ ණය ආපසු ගෙවීම අත්හිටුවීමට ගත් පියවර සාදරයෙන් පිළිගනී.
මෙම පියවර සමග අන්තර් කලීන මූල්‍යකරණ ක්‍රමවේද ක්‍රියාත්මක කිරීම තුළ දෛනික ජීවිතයට සහ ව්‍යාපාරික කටයුතුවලට දිගින් දිගටම බාධා ඇති කරන විදුලිය විසන්ධි කිරීම අවම කිරීම සඳහා අවකාශ ලැබෙනු ඇතැයි අපි බලාපොරොත්තු වෙමු.
රට මුහුණ දී ඇති බරපතල ආර්ථික අර්බුදය විසඳීම සඳහා ගෙන ඇති සාධනීය ක්‍රියාමාර්ගවලට වත්මන් දේශපාලන අර්බුදය සහ මහජන නොසන්සුන්තාවයන් හේතුවෙන් සිදුවන බාධා පිළිබඳව ඒකාබද්ධ වාණිජ මණ්ඩල සැලකිලිමත් වන අතර මෙතෙක් ගෙන ඇති මුලපිරීම් සාර්ථක හා ඉක්මන් ලෙස නිම කිරීම සඳහා රට තුළ දේශපාලන ස්ථාවරත්වයක් ඇති කල යුතු බව අපගේ අදහසයි.
ඒ සඳහා අවශ්‍ය පසුබිම සැකසීමට, 20 වැනි ආණ්ඩුක්‍රම ව්‍යවස්ථා සංශෝධනය අහෝසි කිරීමට අවශ්‍ය ව්‍යවස්ථාපිත ක්‍රියාමාර්ග වහාම ආරම්භ කරන ලෙස ඒකාබද්ධ වාණිජ මණ්ඩල අතිගරු ජනාධිපතිතුමාගෙන් ඉල්ලා සිටී. වත්මන් තත්ත්වයට රට පත්වීමටද හේතු සාධක වූ 20 වැනි ආණ්ඩුක්‍රම ව්‍යවස්ථා සංශෝධනය අහෝසි කිරීම, දේශපාලනික හා ආර්ථික වශයෙන් මේ රටේ ඓතිහාසික සාධනීය වර්ධනයක් ලෙස සැලකෙනු ඇත
මේ හරහා විධායකය සහ ව්‍යවස්ථාදායකය අතර වඩා හොඳ බල තුලනයක් සහතික කරනු ඇති බවත් ව්‍යවස්ථාදායක සභාව සහ අනෙකුත් ස්වාධීන කොමිෂන් සභා නැවත ස්ථාපිත කිරීම තුළ සාධනීය දේශපාලනික රාමුවක් තුළ වත්මන් ගැටලු විසඳා ගත හැකි බවත් අපි විශ්වාස කරමු.
සම්මුතිවාදී ප්‍රවේශයකින් මෙය සිදු වූ පසු, ද්විපාර්ශ්වික ජාතික රජයක් ස්ථාපිත කිරීම නිර්දේශ කෙරේ. එමගින් වත්මන් ආර්ථික අර්බුදයෙන් රට ගොඩ ගොඩගැනීමට අවශ්‍ය පසුබිම ආර්ථික කළමනාකරණ කණ්ඩායමට ලැබෙන අතර එමගින් ඉන්ධන, විදුලිය, ගෑස් ඇතුළු සැපයුම් දාමයන් හා සම්බන්ධ ගැටලු විසඳාගැනීමටද අවකාශ සැලසෙනු ඇත.
මෙම මුලපිරීම් තුළ ශ්‍රී ලාංකික ජනතාවට යහපත් අනාගතයක් තහවුරු කිරීමට ධනාත්මක සහතිකයක් ලබා දිය හැකි බව අපි බලාපොරොත්තු වෙමු.
මෙම ආයාචනය සදහා ඔබතුමාගේ නිසි අවධානය ලබා දෙනු ඇතැයි අපි විශ්වාස කරමු.
මෙයට විශ්වාසී,
The post විස්ස අහෝසි කරන්න – වානිජ මණ්ඩල සියල්ල එක හඬින් ජනපතිට කියයි appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka