ලිට්රෝ ගෑස් සභාපතිගෙන් පැහැදිලි කිරීමක්

ලිට්රෝ ගෑස් ලංකා සමාගම සේවක වැටුප් පිළිබඳව පැහැදිලි කරයි.

2019 වසරට පෙර රුපියල් මිලියන 500කට වඩා අධික ලාභයක් ඉපයූ ශ්‍රී ලංකාවේ ජාතික LP ගෑස් සැපයුම්කරු වන ලිට්රෝ ගෑස් ලංකා සමාගමේ කාර්ය මණ්ඩලයේ වැටුප් ව්‍යූහය පිළිබඳව රට තුල පලවී තිබෙන අසත්‍ය තොරතුරු සම්බන්ධව එම සමාගමේ සභාපති / ප්‍රධාන විධායක නිලධාරී මුදිත පීරිස් මහතා පැහැදිලි කරයි.

ගෝලීය LP ගෑස් මිල ඉහළ යාම සහ විනිමය අනුපාතය ඉහල යම් තුල LP ගෑස් ආනයන සඳහා විශාල පිරිවැයක් දැරීමට සිදුවුවද ශ්‍රී ලංකාවේ LP ගෑස් මිල වැඩි නොකිරීම නිසා සමාගමේ පැවැත්මට දැඩි බලපෑමක් එල්ල වී ඇත. විශාල වර්ධනයක් සහිතව ශක්තිමත් ආයතනයක් ලෙස අඛණ්ඩව පවත්වාගෙන ගිය ලිට්රෝ ගෑස් ලංකා සමාගම පාරිභෝගිකයන් වෙත පිරිවැය ප්‍රතිලාභය ලබා දීම නිසා මේ වන විට පාඩු ලබන ආයතනයක් බවට පත්වී ඇති බව පීරිස් මහතා පවසයි.

ශ්‍රී ලංකා රක්ෂණ සංස්ථාවේ පූර්ණ අනුබද්ධිත ආයතනයක් වන ලිට්රෝ ගෑස් ලංකා සමාගම ආරම්භයේ සිටම රටේ ආර්ථිකයට විශාල දායකත්වයක් ලබා දෙමින් රටට ශක්තියක් වී ඇත . කාර්යක්ෂමතාව සහ වෘත්තීය නිපුණත්වය මනාව ප්‍රගුණ කරන ලද සේවක මණ්ඩලයක් සමාගමේ සේවය කරන අතර එහි සාර්ථකත්වය සඳහා ඔවුන් ඍජුවම දායකවී තිබේ.

200කට අඩු සේවක මණ්ඩලයක් සේවය කරන අතර වැටුප් සඳහා වැය කරනුයේ මුළු වාර්ෂික පිරිවැටුමෙන් 2% කටත් වඩා අඩු ප්‍රමාණයකි. මෙහි බොහෝ සේවකයින් ලංකා ගෑස් සමාගම සහ ජාත්‍යන්තර ෂෙල් ගෑස් සමාගමේ සිට මේ දක්වා වසර 20කට වැඩි කාලයක් සේවය කරති.

“අපගේ සේවක මඩුල්ලට බලශක්ති ක්ෂේත්‍රය පිළිබඳව ගෝලීය විශේෂඥ දැනුම සහ දේශීය අත්දැකීම් සහිත බොහෝ වෘත්තිකයින් අයත් වෙන අතර රාජ්‍ය භාන්ඩාගාරයෙන් විශ්‍රාම වැටුප් ,වෙනත් බදු රහිත දිරි දීමනා හෝ රජයේ සේවකයින් සඳහා ලබා දෙන වෙනත් පහසුකම් අපගේ සේවකයින් සඳහා නොගෙවන බව පීරිස් මහතා පෙන්වා දෙයි”.

ලිට්රෝ ගෑස් ලංකා සමාගමේ වැටුප් ව්‍යූහය 2007 අංක 07 දරන සමාගම් පනත මගින් පාලනය වන අතර අනෙකුත් රාජ්‍ය වයවසායන් හා සමානවන ලෙස එය නියාමනය කර තිබේ. එබැවින් සමාජ මාධ්‍ය වල ප්‍රචාරය වන අසත්‍ය තොරතුරු කිසිසේත්ම අපගේ සමාගමේ සිදු නොවන බව ඔහු නැවත අවධාරණය කරයි.

සමාගම කෙරෙහි පාරිභෝගිකයින් තුල පවතින විශ්වාසයට අහිතකර බලපෑමක් ඇති කිරීමේ අරමුණින් මෙවැනි පදනම් විරහිත චෝදනා ප්‍රකාශ කරන බව සමාගම පවසයි. එබැවින් සමාගම විසින් එම චෝදනා තරයේ ප්‍රතික්ෂේප කරන අතර, ලිට්රෝ ගෑස් ලංකා සමාගම වසර ගණනාවක් පුරා මෙරට ප්‍රමුඛතම LP ගෑස් සැපයුම්කරු ලෙස අත්කර තිබෙන කීර්ති නාමයට විශාල හානියක් සිදුකිරීමේ අරමුණින් සිතාමතාම කරන ලද ක්‍රියාවක් බව නැවත අවධාරණය කරයි

The post ලිට්රෝ ගෑස් සභාපතිගෙන් පැහැදිලි කිරීමක් appeared first on Adaderana Biz Sinhala | Sri Lanka Business News.