රුපියල පා කළත් ඩොලර් ප්‍රශ්නය මෙතෙක් විසඳී නැහැ – කර්මාන්තකරුවෝ කියති

ශ්‍රී ලංකා මහ බැංකුව විසින් රුපියලේ අගය පා කිරීමත් සමඟම මේ වන විට එක්සත් ජනපද ඩොලරයක මිල රු. 275 දක්වා ඉහළ ගොස් ඇති බව වෙළෙඳපොළ ආරංචි මාර්ග පෙන්වා දේ. කෙසේවෙතත් මෙරට කර්මාන්තකරුවන් පවසන්නේ එම මිලට පවා ඩොලර් සොයා ගැනීමට තවමත් නොහැකි වී ඇති බවයි.

මේ සම්බන්ධයෙන් අදහස් දක්වමින් INSEE සිමෙන්ති සමාගමේ සභාපති නන්දන ඒකනායක මහතා පැවසුවේ රුපියල පා කිරීම තම සමාගමේ පිරිවැයට විශේෂයෙන් බලපා ඇති බවත්, ඩොලර් ප්‍රශ්නය මෙතෙක් සියයට සියයක් විසඳී නොමැති බවත්ය.

“රුපියල පා කිරීම විශේෂයෙන්ම අපේ පිරිවැයට බලපාලා තියෙනවා. නමුත් ඊට වඩා අපි බලාපොරොත්තු වුණා, මේ පා කිරීමෙන් දවස් දෙක තුනකට හරි පස්සේ අපිට කීයට හරි බැංකුවලින් ඩොලර් ගන්න පුළුවන් වෙයි කියලා. නමුත් ඒක වුණේ නැහැ.“

“අපේ නොයෙකුත් අමුද්‍රව්‍ය ආනයනය කරන්න, අපිට ඩොලර් මිලියන 10 ක් විතර මාසයකට අවශ්‍යයි. නමුත් අපිට පහුගිය සතිය තුළම ඩොලර් ලක්ෂ 5කට වඩා බැංකුවෙන් සාමාන්‍ය විදියට ගන්න බැරි වුණා. ඒකත් අපි ගත්තේ රු. 275 ට. එච්චරමයි අපිට බැංකුවකින් හම්බවුණේ. ඒක නිසා මම හිතන්නේ තාමත් මේ ප්‍රශ්නය සියයට සියයක් විසඳීලා නැහැ. මම හිතන්නේ තව ටික දවසක් යන කොට ඊට වඩා ඉහළ අගයයකට ඇවිල්ලා, කොහොම හරි මේ ප්‍රශ්නය විසඳෙයි කියලා.“

The post රුපියල පා කළත් ඩොලර් ප්‍රශ්නය මෙතෙක් විසඳී නැහැ – කර්මාන්තකරුවෝ කියති appeared first on Adaderana Biz Sinhala | Sri Lanka Business News.