මුදල් ප්‍රතිපත්ති තීරණය සඳහා ශ්‍රී ලංකා මහ බැංකුවේ මුදල් මණ්ඩලය අද (04) දින රැස්වීමට නියමිත වූ අතර මුදල් මණ්ඩල සභාපතිත්වය දරන ශ්‍රී ලංකා මහ බැංකු අධිපති අජිත් නිවාඩ් කබ්රාල් මහතා සිය ධූරයෙන් ඉල්ලා අස්වන බවට අද පෙරවරුවේ දැනුම් දීමත් සමඟම අදාළ රැස්වීම අවලංගු වී ඇත.
මහ බැංකුව වැඩිදුරටත් පවසන්නේ මුදල් ප්‍රතිපත්ති විවරණය නිවේදනය කරන දිනය ඉදිරියේ දී දැනුම් දෙනු ලබන බවයි.
බාහිර කම්පනවල දැඩි බව සහ දේශීය ආර්ථික කටයුතු සඳහා අඛණ්ඩව බාධා ඇතිවීම් සැලකිල්ලට ගනිමින්, එවැනි ආර්ථික තත්ත්වයන්ට මුහුණ දීම සඳහා සාම්ප්‍රදායික සහ සාම්ප්‍රදායික නොවන ක්‍රියාමාර්ග ඇතුළත් ප්‍රතිපත්ති මාලාවක් සහ සමස්ත ආර්ථිකයට බලපානු ලබන අනෙකුත් ක්‍රියාමාර්ග අත්‍යවශ්‍ය බව මීට පෙර එනම් 2022 මාර්තු 03 වැනි දින පැවති මුදල් මණ්ඩල රැස්වීමේ අදහස විය.
එහිදී ශ්‍රී ලංකා මහ බැංකුවේ නිත්‍ය තැන්පතු පහසුකම් අනුපාතිකය (SDFR) සහ නිත්‍ය ණය පහසුකම් අනුපාතිකය (SLFR) පදනම් අංක 100 බැගින් ඉහළ දැමිය යුතු බව මුදල් මණ්ඩලය තීරණය කළේය.
දැනට රට තුළ පවතින අධි උද්ධමනකාරී තත්ත්වය හේතුවෙන් ප්‍රතිපත්ති පොලී අනුපාතිකවල විශාල වැඩිවීමක් මෙවර සිදුවනු ඇති බවට ද විශ්ලේෂකයින් පුරෝකථනය කර තිබුණි.
The post මුදල් මණ්ඩලය රටට වැදගත් තීරණයක් ගැනීම කල් දමයි appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka