සී ෂෙල්ස් සිට තායිලන්තය දක්වා ටුනා මත්ස්‍යයින් ගබඩා කළ බහාළුම් රැගත් CMA CGM Kailas නැමති නෞකාව කොළඹ වරායට ආසන්න මුහුදු ප්‍රදේශයේදී කාර්මික දෝෂයකට ලක්ව විදුලි සැපයුම් නතර වීම හේතුවෙන් ශ්‍රී ලංකා වරාය අධිකාරිය විසින් අදාළ නැව මෙරට තුළම නවතා අවශ්‍ය පියවර ගැනීමට කටයුතු කර තිබුණ අතර ඒ් වන විට එම නැව තුළ තිබූ මාළු බහාළුම් 102 ක් නරක් වී ඇති බවත් එම තොග නැවත අපනයනකරු භාර නොගන්නා බවත් පවසා නැව් නියෝජිත ආයතනය රේගුවේ උපකාර ඇතිව ඒම මාළු තොගය පිටස්තර පාර්ශවයකට සත්ව ආහාර හා කාබනික පොහොර සැකසීමට ලබාදීම සඳහා රේගුව මඟින් නිදහස් කිරීමට කටයුතු කිරීම මෙන්ම මෙරට නැව් නියෝජිත ආයතනයට දැනුම් නොදී ඊට පටහැනි ලෙස මෙම නුසුදුසු මාළු තොගය ශ්‍රී ලංකාව තුළට නිදහස් කිරීමටද රේගුව කටයුතු කර ඇති බව විගණකාධිපති වාර්තාවක් පෙන්වා දේ.
2022 වර්ෂය සඳහා ශ්‍රී ලංකා රේගුවේ වාර්ෂික කාර්ය සාධන වාර්තාව පසුගිය දා පාර්ලිමේන්තුවට පිළිගැන්වූ අතර එහි මේ බව සඳහන් වේ.
අදාළ වාර්තාවෙහි වැඩිදුරටත් මෙසේ සඳහන් ව තිබේ.
(1) මෙම මාළු තොගය අඩංගු නෞකාවෙහි ස්වභාවය Transshipment Status වුවද Import cargo status ලෙස වෙනස් කිරීමට ජ්‍යෙෂ්ඨ රේගු අධ්‍යක්ෂවරයා පත් කරන ලද කමිටුව විසින් තීරණය කර තිබුණ ද ඒ සඳහා HS Code වර්ගීකරණ කමිටුවක විධිමත් අනුමැතියක් ලබා ගෙන නොතිබුණු අතර මෙම මාළු තොගය නරක් වූ ස්වභාවයක් ගෙන ඇති බව වාර්තා කළ ද, HS Code 511.91.10 යටතේ Whole Round Tuna In Bulk ලෙස රේගු සටහන්තරයේ ඇතුළත් කර ඒ අනුව රේගුව විසින් රු. 6,288,357 බදු අයකරගෙන තිබුණි.
ii) ආනයන බලපත්‍රයක් ලබා ගැනීම සඳහා ආනයන අපනයන පාලක ජනරාල්වරියගෙන් අයදුම් කළ යුත්තේ මෙම මාළු තොගය මිලට ගත් Echo N Rich සමාගම වුව ද, නියෝජ්‍ය රේගු අධ්‍යක්ෂ, මධ්‍යම අපහරණ අංශය (Central Disposal Directorate) විසින් 2022 මැයි 22 දින ආනයන පාලන බලපත්‍රයක් අවශ්‍ය බවට ආනයන හා අපනයන පාලකවරියට දැනුම් දී තිබුණි.
(iii) පොහොර නිෂ්පාදකයාගේ ධාරිතාවය පිළිබඳව නොසලකා හැර විශාල මාළු තොගයක් පොහොර නිපදවිමට ලබාදීමෙන් ප්‍රමාණවත් ධාරිතාවයෙන් යුතුව කටයුතු සිදු නොවීම (ප්‍රමාණවත් ශ්‍රමය හා උපකරණ නොමැති නිසා) හා ඇතැම් බහාළුම්වල ශීතකරණ සඳහා විදුලිය සැපයීම ඇණ හිටීමෙන් එම මාළු ගබඩා ආශ්‍රිතව සෞඛ්‍යට අහිතකර තත්ත්වයක් නිර්මාණය වී අධික දුගඳ හමන තත්ත්වයක් හා බහාලුම්වලින් ගලන අපවිත්‍ර ද්‍රාවණයන් හේතුවෙන් අවට පරිසරය අපවිත්‍ර වීමේ තත්ත්වයක් උද්ගත වී ඇති බවත් එම ගබඩා පරිශ්‍රයන්ට අදාළව 2022 අගෝස්තු 16 දින සිදු කළ ස්ථානීය පරීක්ෂාවේ දී නිරීක්ෂණය වූ අතර මේ හේතුවෙන් ප්‍රදේශවාසීන්ගෙන් චෝදනා එල්ල වී තිබුණු අතර, 2022 ජූලි 07 දින මහබාගේ පොලිස් ස්ථානාධිපතිවරයා විසින් සි කන්ටේනර් සර්විස් සමාගම යටතේ ගබඩා කර ඇති බහාළුම් 60 ක් ඉවත් කර ගන්නා ලෙස ද දැනුම් දී තිබුණු බව ද නිරීක්ෂණය විය.
(iv) හදිසි අවස්ථාවක දී නෞකාවට සිදුවන දෝෂයන්ට ආසන්නතම වරායේ යම් පහසුකම් සැපයීමක් ලබා දීම සිදුකළ ද, රේගු ආඥා පනතේ (අ) උපලේඛනයට අනුව රට තුළට ගෙන්වීම තහනම් සහ සීමා කරන ලද භාණ්ඩ අතරට එම උපලේඛනයේ (12) වගන්තිය අනුව පළුඳු වූ දුගඳ හමන හෝ අප්‍රිය තත්වයේ හෝ ආහාරයට නුසුදුසු සහ නීත්‍යානුකූල පාවිච්චියට නුසුදුසු හෝ ස්පර්ශයට නුසුදුසු හෝ ලෙඩ රෝග සෑදෙන සුළු මාළු වර්ග, ධාන්‍ය වර්ග හා වෙනත් දේ ආනයනය තහනම් කර තිබිය දී සහ රේගු ආඥා පනතේ විධිවිධාන ප්‍රකාරව ප්‍රතිඅපනයනය කිරීමට මෙරට නැව් නියෝජිත ආයතනයට දැනුම් නොදී ඊට පටහැනි ලෙස රේගුව විසින් මෙම නුසුදුසු මාළු තොගය ශ්‍රී ලංකාව තුළට නිදහස් කිරීමට තීරණය කර තිබුණි.
(v) මාළු තොග නිදහස් කිරීමේ දී රේගු සටහන්කර 17 ක් පිළිගෙන ඉහත සඳහන් ආයතනය වෙත නිදහස් කිරීමට පියවර ගෙන තිබුණු අතර මෙම රේගු සටහන්කර සැකසීමට දේශීයව සැකසූ Way Bill, Invoice, Packing List උපයෝගී කර ගැනීම විගණනයේ දී ප්‍රශ්නගත විය.
(vi) කාර්මික දෝෂයකට ලක් වූ බව පවසන CMA CGM KAILAS නෞකාව ලංකා වරායට ලඟා වූ දිනය 2022 ජනවාරි 13 ලෙස නැව් නියෝජිත ආයතනයේ ලිපිවල සඳහන්ව තිබිය දී රේගු සටහන්කරවල නැව වරායට ලඟා වූ දිනය 2022 පෙබරවාරි 08 ලෙස සටහන් කර තිබුණි.
(vii) රේගු ආඥා පනතේ 162 වගන්තිය ප්‍රකාරව මාළු තොගය නීතිවිරෝධී බව ප්‍රකාශකිරීමක් සිදු නොකර රේගු අධ්‍යක්ෂ ජනරාල්වරයාට රේගු ආඥා පනතේ 12 සහ 43 වගන්ති ප්‍රකාරව අපහරණය කළ නොහැකි වුව ද එවැනි ප්‍රකාශ කිරීමකින් තොරව අපහරණය සිදු වී තිබුණි.
(viii) රේගු ආඥා පනතේ 34(1) වගන්තිය අනුව ශ්‍රී ලංකා වරායට බඩු බෑම සඳහා රේගු අධ්‍යක්ෂ ජනරාල්වරයා විසින් අවසර පත්‍රයක් දෙනු ලැබී නම් මිස යම් නැවකින් කිසිම භාණ්ඩයක් ගොඩ නොබෑ යුතු අතර ගොඩබානු ලබන සියළුම බහාළුම් සඳහා ශ්‍රි ලංකා රේගුවේ අවසරය හා අනුමැතිය අවශ්‍ය වුව ද අදාළ ගොනු පරීක්ෂා කිරීමේ දී එවැනි අවධානයක් රේගුව යොමු කළ බවට සාක්ෂි නොතිබුණි.
The post මිනිස් පරිභෝජනයට නුසුදුසු මාළු කන්ටේනර් 102 ක් රේගුවෙන් නිදහස් කරලා appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka