සමස්ත ව්‍යාපාරික ප්‍රජාව නියෝජනය නොකරන ණය පැහැර හරින්නන් කිහිප දෙනෙකුගේ බලපෑම්වලට ප්‍රතිචාරයක් ලෙස පරාටේ නීතිය හරහා ණය අයකර ගැනීම අත්හිටුවමින් ආණ්ඩුව ගත් ඒකපාර්ශවීය තීරණය මෙරට ආර්ථිකයේ හදවත හා ජීවනාලිය බඳු වූ බැංකු ක්ෂේත්‍රයට විශාල සෘණාත්මක බලපෑමක් ඇති කරනු ඇති බව ශ්‍රී ලංකා බැංකු සංගමය (SLBA) ප්‍රකාශ කරන ලදී.
ශ්‍රී ලංකා මහ බැංකුවේ (CBSL) බලපත්‍රලාභී රාජ්‍ය බැංකු, ලැයිස්තුගත පෞද්ගලික බැංකු සහ ජාත්‍යන්තර බැංකුවල ශාඛා කාර්යාල ආදී සියලුම බැංකු නියෝජනය කරන ශ්‍රී ලංකා බැංකු සංගමය (SLBA) පැවසූයේ, ණය අයකර ගැනීමේ නීති මැඬ පැවැත්වීම සඳහා රජයේ මැදිහත් වීම අනතුරු ඇඟවීමක් වන බවයි. මේ පිළිබඳව බැංකු සමඟ කිසිඳු සාකච්ඡාවක් සිදුකර නොමැති බව පෙන්වා දුන් සංගමය රජයේ මෙම තීරණය හේතුවෙන් සියලුම ව්‍යාපාරිකයන්ට ණය ලබා ගැනීමේ පිරිවැය වැඩි වනු ඇති බව පැවසීය.
එම සංගමය තවදුරටත් අවධාරණය කළේ පරාටේ ක්‍රමය ක්‍රියාත්මක කිරීම අත්හිටුවීම මගින් ණය පැහැර හැරූ පුද්ගලයින්ගේ උකසට තැබූ වත්කම් සුරැකීමට නොහැකි බවත්, බැංකු විසින් අධිකරණය හරහා උකස් වත්කම් සම්බන්ධ නෛතික ක්‍රියාමාර්ග පෙර සේම සිදු කරන බවත් ය. පරාටේ ක්‍රමය මෙම ක්‍රියාවලියේ ප්‍රමාද වීම් නිසා ඇතිවන බලපෑම් අවම කරන නමුත්, ණය අයකර ගැනීම සඳහා බැංකුවලට ඇති විකල්ප ක්‍රම අතරින් එය එකක් පමණක් වන බව ශ්‍රී ලංකා බැංකු සංගමය (SLBA) පෙන්වා දුන්නේය.
පාර්ලිමේන්තුව හරහා පවතින නීති සංශෝධනය කරන තුරු, බැංකු විසින් සුදුසු අවස්ථාවන්හි දී, අධිකරණයට යාමට පෙර සිදුකළ හැකි අවසාන විකල්පය ලෙස, පරාටේ ප්‍රතිකර්මය භාවිතා කරනු ඇතැයි ද සංගමය ප්‍රකාශ කළේය. මෙම ක්‍රියාවලියේ දී එක් එක් ණය පැහැර හැරීමට අදාළ පැමිණිල්ල එම බැංකුවල අධ්‍යක්ෂක මණ්ඩල වෙත ඉදිරිපත් කිරීම සහ මාධ්‍ය දැන්වීම් පළ කිරීම අත්‍යවශ්‍ය වේ. එම නිසා යම් බැංකු නිලධාරියෙකුගේ අභිමතය පරිදි පරාටේ නීතිය ක්‍රියාත්මක කළ හැකි ක්‍රියාපටිපාටියක් නොවන බව ශ්‍රී ලංකා බැංකු සංගමය පෙන්වා දුන්නේය.
සිය ප්‍රකාශ තුළින් SLBA පෙන්වා දුන් ප්‍රධාන කරුණු කිහිපයක් මෙසේ ය:
■ ණය පැහැරහරින්නන් අතලොස්සක් පමණ ණය අයකර ගැනීමේ දැනට පවතින නීති සංශෝධනය කිරීම සඳහා බලපෑම් කරයි.
■ බැංකු විසින් තවදුරටත් සුපරීක්ෂාකාරී වන බැවින් යහපත් ණය ඉල්ලුම්කරුවන් හට වූවද අරමුදල් ලබා දීම මත බලපෑමක් ඇති වනු ඇත.
■ බැංකු වලට ණය අවධානමට මුහුණ දීම සඳහා ද අමතර පිරිවැයක් දැරීමට සිදුවන බැවින් සියලු ණය සඳහා ණය පිරිවැය වැඩි වනු ඇත.
■ මෙමගින් ජාතික ආර්ථික පුනර්ජීවනය උදෙසා බැංකු ක්ෂේත්‍රයේ ප්‍රයත්නයන් කෙරෙහි සෘණාත්මක බලපෑමක් ඇති කරනු ඇත.
■ ජනතාව වෙත ණය ලබාදීමට තැන්පත්කරුවන්ගේ අරමුදල් යෙදවීම සහ ණය නොගෙවන්නන්ගෙන් අයවිය යුතු මුදල් අයකර ගැනීමට නොහැකි විම හෝ මුදල් අයකර ගැනීමේ දී සිදුවන දීර්ඝ ප්‍රමාදයන් හේතුවෙන් මහජන තැන්පතු අවදානමට ලක් විය හැක.
■ පරාටේ ක්‍රමය ක්‍රියාත්මක කිරීම අත්හිටුවීම මගින් IMF, ලෝක බැංකු සමූහය සහ ADB මෙන් ම මහ බැංකුව වැනි ආයතන සමඟ දැනට ක්‍රියාත්මක වන මුලපිරීම්වලට බාධා වීමට හා ඇනහිටීමට හේතු වනු ඇත. එම ආයතන බැංකු සමඟ එක්ව, බැංකුවල ගැටළු සහගත ණය නැවත ප්‍රකෘති තත්ත්වයට පත් කිරීම සඳහා විසර්ජන ක්‍රියාවලියක් ස්ථාපිත කිරීමට උත්සාහ කරමින් පවතී. එනම් අදාළ ණයගැතියන් හට නැගීසිටීමට උපකාර කරමින් එවැනි ව්‍යාපාරික වත්කම්වල අවශේෂ වටිනාකම සංරක්ෂණය කිරීම මගිනි.
■ 2019 අප්‍රේල් ත්‍රස්ත ප්‍රහාර, COVID වසංගතය සහ පවතින ආර්ථික අර්බුදය ඇතුළු ආර්ථිකයට බලපාන මෑත කාලීන අර්බුදවලදී, විශේෂයෙන් ක්‍ෂුද්‍ර, කුඩා සහ මධ්‍ය පරිමාණ ණයගැතියන්හට සහන ණය කාලයන් ලබා දීමේ පිරිවැය බැංකු විසින් දැනටමත් අවශෝෂණය කරගෙන ඇති අතර එය හැකිතාක් දුරට පරාටේ ක්‍රියාවලිය අත්හිටුවමින් සිදු කර ඇත.
ශ්‍රී ලංකා බැංකු සංගමය (SLBA) පැවසුවේ දැනට පවතින නීති යටතේ බැංකුව සතුව ඇති ණය අයකර ගැනීමේ ක්‍රමෝපායන් සංශෝධනය කිරීමට, අමාත්‍ය මණ්ඩලය විසින් ගනු ලැබූ තීරණයකට අදාල ප්‍රකාශයන්, එහි සාමාජිකයින් චකිතයකින් යුතුව නිරීක්ෂණය කරන බවයි.
“මෙම තීරණය සහ එහි පුළුල් ප්‍රචාරණය දිගු කලක් තිස්සේ තම ණය වගකීම් පැහැර හැර ඇති කුඩා පිරිසකගේ දැඩි බලපෑම්වලට ප්‍රතිචාරයක් ලෙස පෙනේ. කෙසේ වෙතත් මෙසේ බලපෑම් සිදුකරන කණ්ඩායම ශ්‍රී ලංකාවේ පුළුල් ව්‍යාපාරික ප්‍රජාව නියෝජනය නොකරන බව ශ්‍රී ලංකා බැංකු සංගමය (SLBA) හි අදහස වේ,” යනුවෙන් ප්‍රකාශය සඳහන් කළේය.
“වාර්තා වූ අමාත්‍ය මණ්ඩලයේ මෙම ඒකපාර්ශවික මැදිහත් වීම අනවශ්‍ය දෙයක් වන බව බැංකු වල විශ්වාසයයි. එමගින් රටේ ආර්ථික පුනර්ජීවනයට සහාය වීම උදෙසා බැංකුවලට පැවරී ඇති කාර්යභාරය ඉටු කිරීම සඳහා බැංකු සතුව ඇති ශක්තිය දුර්වල කරනු ඇත.”
The post බැංකු අනතුරු අඟවයි appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka