බලධාරීන් අඩියක් පසුපසට. නව නියාමන ක්‍රියාමාර්ග හකුලාගනී

තැරැව්කාර සමාගම් විසින් සිය සේවාදායකයින් වෙත සලසනු ලබන ආන්තික ණය පහසුකම් නිරීක්ෂණය සඳහා හඳුන්වා දීමට සැලසුම්කර තිබුණු නව නියාමන ක්‍රියාමාර්ග, ක්‍රියාත්මක නොකිරීමට තීරණය කර ඇති බව කොළඹ කොටස් වෙළෙඳපොළ ප්‍රධාන නියාමන නිලධාරීවරයා විසින්, කොටස් වෙළෙඳපොළ සාමාජික ආයතන/ වෙළෙඳ ආයතනවල ප්‍රධාන විධායක නිලධාරීන් වෙත දැනුම් දී සිටී.

මේ සම්බන්ධයෙන් යවන ලද ලිපියක සඳහන් වන්නේ තැරැව්කාර සමාගම්වල නියෝජිතයින් විසින් මෙම යෝජනා ක්‍රියාවට නැංවීමේ දී මුහුණ පාන්නට සිදුවන පද්ධති සීමාවන් සහ ප්‍රායෝගික ගැටළු සම්බන්ධයෙන් කරුණු දක්වා ඇති බවයි. 2021 ජනවාරි 29 දින නිකුත් කරන ලද අංක 06-01.2021 සහ 2021 පෙබරවාරි 01 දින නිකුත් කරන ලද  අංක 01.-02-2021 දරන චක්‍රලේඛවලට අදාළව තොරතුරු ලබා දීමේ දී මෙම ගැටළු පැන නැගී ඇති බව තැරැව්කාර සමාගම් විසින් සඳහන් කර ඇත.

මේ අනුව, එම අවශ්‍යතා අනුව කටයුතු නොකිරීමට තීරණය කර ඇති බව කොටස් වෙළෙඳපොළ ප්‍රධාන නියාමන නිලධාරී රේනුක විජයවර්ධන විසින් තැරැව්කාර ආයතන වෙත ලිපියක් යවමින් මෙම දැනුම් දීම තර තිබේ.

The post බලධාරීන් අඩියක් පසුපසට. නව නියාමන ක්‍රියාමාර්ග හකුලාගනී appeared first on Adaderana Biz Sinhala | Sri Lanka Business News.