- පාර්ලිමේන්තුව මග හැරීම පිළිබද පිළිබඳ අප්‍රසාදය
- චක්‍රලේඛවලට පටහැනිව කාර්ය මණ්ඩලයට දීමනා ලබාදීම පිළිබඳ කඩිනම් විමර්ශන
- අමාත්‍යාංශයට සහ මහා මණ්ඩලයට වැඩි වගකීමක්
- අධ්‍යක්ෂ ජනරාල් පත්වීම සම්බන්ධයෙන් විවිධ පාර්ශව නගා ඇති චෝදනා විමසීමේ වගකීම අමාත්‍යංශ ලේකම්ට
- කාර්ය මණ්ඩල දුක් ගැනවිලි සම්බන්ධයෙන්ද ස්වාධීන කොමිසම් වාර්තාවක් කැදවයි
- පසුගිය වසර 5ක කාල සීමාව තුළ සිදුවී ඇති අක්‍රමිකතා ඇතුළු කටයුතු සම්බන්ධව ස්වාධීන පරීක්ෂණයක් සිදු කිරීමටත් නියෝග
- ආයතනයේ ක්‍රියාවලිය පුළුල් කිරීම සදහා ජාතික විශ්ව විද්‍යාල ඇතුළු පෞද්ගලික අංශයේද සහය ලබා ගැනීමටත් නිර්දේශ
- මාස තුනකින් නැවත කැඳවීමක්
පාර්ලිමේන්තු මන්ත්‍රී මහාචාර්ය රංජිත් බණ්ඩාර මහතාගේ සභාපතීත්වයෙන් 2023.11.08 දින රැස්වූ පොදු ව්‍යාපාර පිළිබද කාරක සභාවට (කෝප් කමිටුව) ශ්‍රී ලංකා ප්‍රමිති ආයතනය කැඳවා තිබිණි. ශ්‍රී ලංකා ප්‍රමිති ආයතනය කෝප් කමිටුව හමුවට මීට පෙර කැදවා තිබුණේ 2013 වසරේදීය.
මෙහිදී එම ආයතනයේ 2020, 2021 විගණකාධිපති වාර්තා සහ වර්තමාන කාරය සාධනය පරීක්ෂා කිරීම සිදුවිය. තාක්ෂණ අමාත්‍ය ලේකම් මහාචාර්ය නිරංජන් ගුණවර්ධන, ශ්‍රී ලංකා ප්‍රමිති ආයතනයේ සභාපති අසංග රණසිංහ, අධ්‍යක්ෂ ජනරාල් සිද්ධිකා සේනාරත්න යන මහත්ම මහත්මීන් ඇතුළු නිලධාරීහු පිරිසක් මෙම අවස්ථාවට කැඳවා තිබිණි.
එහිදී පහත සදහන් කෙරෙහි විශේෂ අවධානය යොමුවිය.
- වාර්ෂික වාර්තා ප්‍රමාදය
ආයතනයේ වාර්ෂික වාර්තා 2020 වසරේ සිට ඉදිරිපත් නොකිරීම පිළිබඳ කෝප් කමිටුවේ අප්‍රසාදය පළ විය. ප්‍රමිතිය පිළිබද කටයුතු කරන ආයතනයක් වන ප්‍රමිති ආයතනයේ ප්‍රමිතිය පිළිබද ගැටලුවක් ඇති බැවින් මීට වඩා වගකීමෙන් යුතුව කටයුතු කිරීමේ අවශ්‍යතාව මෙහිදී අවධාරණය කෙරිණි. ආයතනයේ අධ්‍යක්ෂ ජනරාල් ඇතුළු පරිපාලනයට මේ සම්බන්ධ ඍජු වගකීමක් ඇති බැවින් එම වාර්ෂික වාර්තා කඩිනමින් ඉදිරිපත් කරන ලෙස නියෝග කෙරිණි.
මේ සම්බන්ධ ලේකම්වරයාගේ ඍජු මැදිහත්වීම යොමු කරන ලෙසද උපදෙස් ලබා දුන්නේය.
- රාජ්‍ය මූල්‍ය චක්‍රලේඛවලට පටහැනිව සේවකයන් සදහා දීමනා ගෙවීම
2020 ජනවාරි 11 දිනැති රාජ්‍ය මූල්‍ය චක්‍රලේඛයට පටහැනිව අභිප්‍රේරණ දීමනා ඇතුළු විවිධ දීමනා ගෙවා තිබීම පිළිබදව අවධානය යොමු විය. මෙම දීමනා නොගෙවීම නිසා සේවකයන් වර්ජනයක් ක්‍රියාත්මක කළ බැවින් මෙම තීරණය ගත් බව අධ්‍යක්ෂ ජනරාල්වරිය මෙහිදී පැවසීය. සේවකයන් වර්ජනය කළ පමණින් අනුමතියකින් තොරව එසේ කිරීම අනීතික බව පෙන්වා දුන් කෝප් කමිටුව පෙන්වා දුන්නේ මේ සම්බන්ධව තීරණය ගත් නිලධාරීන් වගකිව යුතු බවත් මීට එරෙහිව වහාම පියවර ගත යුතු බවත්ය. මේ අනුව මෙම සිදුවීම සම්බන්ධයෙන් වහාම ස්වාධීන විමර්ශනයක් සිදු කර වාර්තාවක් මසක් ඇතුළත ලබා දෙන ලෙස අමාත්‍යාංශ ලේකම්වරයාට කෝප් සභාපතිවරයා විසින් උපදෙස් ලබා දෙන ලදී.
- අමාත්‍යාංශයේ සහ අධ්‍යක්ෂ මණ්ඩලයේ මැදිහත්වීම වැඩි කිරීම
ආයතනයේ ඉදිරි කටයුතු සදහා ශුභාසිංශන එක් කළ කෝප් කමිටු සභාපතිවරයා පවසා සිටියේය අමාත්‍යාංශය මෙන්ම මහා මණ්ඩලය නමින් හැදින්වෙන ආයතනයේ අධ්‍යක්ෂ මණ්ඩලය ද ආයතනයේ කටයුතු කෙරෙහි සිදු කරන මැදිහත් වීම වැඩි කළ යුතු බව ද කමිටු සභාපතිවරයා නිර්දේශ කළේය.
- අධ්‍යකෂ ජනරාල් පත්වීම සම්බන්ධයෙන් විවිධ පාර්ශව නගා ඇති චෝදනා විමසීමේ වගකීම අමාත්‍යංශ ලේකම්ට
ආයතනයේ අධ්‍යක්ෂ ජනරාල් තනතුර සදහා අදාළ සුදුසුකම් සම්පූර්ණ නොකළ නිලධාරියෙකු අධ්‍යක්ෂ ජනරාල් ලෙස බදවා ගෙන තිබීම පිළිබදවත් මෙහිදී සාකච්ඡා විය. ඒ සම්බන්ධයෙන් විමර්ශනය කර වාර්තාවක් සති දෙකක් තුළ ලබා දෙන ලෙස අමාත්‍යාංශ ලේකම්වරයාට නිර්දේශ කෙරිණි.
- කාර්ය මණ්ඩල දුක් ගැනවිලි සම්බන්ධයෙන් වාර්තාවක් කැඳවයි
දිගින් දිගටම කාර්ය මණ්ඩල දුක් ගැනවිලි කාරක සභාව වෙත ඉදිරිපත් වී ඇති බැවින් ඒ සම්බන්ධයෙන් සුදුසු ස්වාධින කණ්ඩායමක සහය ලබාගෙන කටයුතු කරන ලෙසත් වාර්තාවක් ලබා දෙන ලෙසත් නිර්දේශ කළේය.
- පසුගිය වසර 5ක කාල සීමාව තුළ සිදුවී ඇති අක්‍රමිකතා ඇතුළු කටයුතු සම්බන්ධව ස්වාධීන පරීක්ෂණයක් සිදු කිරීමටත් නියෝග
තවද පසුගිය වසර 5ක කාල සීමාව තුළ සිදුවී ඇති අක්‍රමිකතා ඇතුළු කටයුතු සම්බන්ධව ස්වාධීන පරීක්ෂණයක් සිදු කළ යුතු වටත් නියෝග කෙරිණි.
- ආයතනයේ ක්‍රියාවලිය පුළුල් කිරීම සදහා ජාතික විශ්ව විද්‍යාල ඇතුළු පෞද්ගලික අංශයේද සහය ලබා ගන්නා ලෙස ද කෝප් කමිටුව විසින් නිර්දේශ කරන ලදී.
SLS ලාංඡනය නොමැති ටින් මාළු වෙළදපොළේ ඇති බවද මෙහිදී හෙළිවිය. SLS ලාංඡනය ලබා ගෙන ඇත්තේ ටින් මාළු ආයතන 15ක් පමණක් බවත් මෙහිදී ආයතනයේ සභාපතිවරයා පැවසීය. මෙම කටයුතුවලදී පාරිභෝගික කටයුතු අධිකාරිය සමග එක්ව කටයුතු කිරීමේ අවශ්‍යතාව මෙහිදී මෙහිදී අවධාරණය කෙරිණි.
මාස තුනකින් ශ්‍රී ලංකා ප්‍රමිති ආයතනය නැවත කැදවීමටත් තීරණය කෙරිණි.
The post ප්‍රමිති ආයතනයේ ප්‍රමිතිය ගැන කෝප් කමිටුවේ දී විමසයි appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka